Jana raspaviała, što pra kryminalnuju spravu joj paviedamili jaje padpisčyki.
— Šmat chto padtrymlivaŭ, pisali, prapanoŭvali supracoŭnictva. Taksama byli i kamientary niehatyŭnyja, nakštałt, jak ja mahła aśmielicca takoje zrabić. Mnie ŭsio roŭna, ja ich nie ŭsprymaju ŭsurjoz, tamu što… nu, chaj hetyja ludzi prosta voźmuć i pakažuć svoj braŭzer, što jany tam hladziać, a potym kahości abmiarkoŭvajuć, — skazała Łoli.
Jana kaža, što «hołych» zdymkaŭ u jaje kanale niama.
— U mianie tam niama parnahrafii. U mianie tam fatahrafii ŭ bialiźnie, u kupalniku, u mory. Ja lublu kuplać kamplekty pryhožaj bializny i demanstravać. Hołaha ŭ mianie naohuł ničoha tam niama.
Viadoŭca spytaŭ, čamu mienavita jaje ŭziali ŭ raspracoŭku.
— Mnie zdajecca, chtości sačyŭ za mnoj, ja — papularny błohier. Chtości sačyŭ za mnoj i niejak daviedaŭsia, što ja znachodžusia ŭ Biełarusi.
Hety čałaviek, jaki viadzie spravu, jon pa fakcie mnie ličycca adnakłaśnikam. I było vielmi dziŭna… Kali ja była ŭ pastarunku, jon nie ździviŭsia.
Viadoŭca spytaŭ, čamu tak, jany nie siabravali ŭ škole abo niejkaje niepadzielenaje kachańnie?
— Ja była ŭ jaho na viasielli. Moža jamu padarunak moj nie spadabaŭsia, — pažartavała Łoli.
Jana raspaviadaje, što hetyja zdymki jana pačała rabić u 2020 hodzie. Tady jana ŭžo nie žyła ŭ Biełarusi.
Pryjechała dadomu 10 maja, i jaje zatrymali. Pryviali ŭ milicyju, potym — u kvateru. U pratakole, jaki napisali milicyjanty, jana dadała, što nie žyvie ŭ Biełarusi z 2020 hoda i ŭsie zdymki rabiła pa-za miežami krainy.
Ciapier dziaŭčyna ŭ Dubai, chutka lacić u Irłandyju.
Učora supracoŭniki MUS raspaŭsiudziŭ infarmacyju pra toje, što jany vyjavili ŭ Bierastavickim rajonie pornastudyju. 24-hadovaja dziaŭčyna, pavodle ich, zdymała tam parnahrafiju i zarabiła na hetym za try hady 70 tysiač dalaraŭ. Zaviedzienaja kryminalnaja sprava, dziaŭčynie pahražaje da čatyroch hadoŭ źniavoleńnia.
Na našym sajcie infarmacyja taksama vyklikała šmat kamientaroŭ, samym papularnym staŭ taki: «Sadžać za toje, što ŭ cyvilizavanych krainach ličycca normaj…. A chto paciarpieły? Mient z mazalami na rukach?»
