Toyota Arene

Hienieralny dyrektar Toyota Motor Corp. Kodzi Sato na bryfinhu padčas aŭtašou ŭ Tokia staić pamiž spartyŭnym FT-Se (źleva) i ŭsiedarožnikam FT-3e. 25 kastryčnika 2023 hoda. Fota: AP Photo/Hiro Komae

Jak piša The Wall Street Journal, u 2021 hodzie Toyota stvaryła svoj ułasny technałahičny startap, jaki praduhledžvaŭ raspracoŭku apieracyjnaj sistemy Arene, jakaja pavinna była stać standartam dla ŭsioj haliny, i dać mahčymaść vadzicielam, pa anałohii jak u Tesla, ździajśniać biespravadnuju zahruzku šyrokaha śpiektru abnaŭleńniaŭ.

Transpartnyja srodki na bazie Arene pavinny byli atrymać mahčymaść padłučeńnia da vobłačnaj sietki, zboru i abmienu danymi pamiž miljonami transpartnych srodkaŭ, razumnych damoŭ i haradskoj infrastrukturaj. U płanach bačyłasia, što raspracoŭščyki za miežami Toyota zmohuć vykarystoŭvać Arene dla stvareńnia svaich ułasnych prykładańniaŭ i pasłuh dla aŭtamabilaŭ, što apieracyjnaja sistema budzie adkrytaja dla vykarystańnia i inšymi aŭtavytvorcami.

Ambicyi startapa byli nastolki vialikimi, što adnym ź jaho prajektaŭ była pabudova cełaha novaha horada — Woven City, — dzie možna było b žyć u razumnych damach i pravodzić vyprabavańni aŭtamabilaŭ, jakija ruchajucca biez kiroŭcy i pracujuć na vadarodnym palivie.

U kampanii było stvorana padraździaleńnie, jakoje pačało zajmacca raspracoŭkaj intelektualnaha prahramnaha zabieśpiačeńnia, — Woven Planet («Tkanaja płanieta»). Nazva była abranaja, kab padkreślić z adnaho boku intehracyju roznych funkcyj u adnu sietku, a z druhoha boku, nahadać ab historyi kampanii, jakaja pačynałasia z vytvorčaści tkackich stankoŭ u 1920-ja hady. Sama ž štab-kvatera Woven Planet była raspracavana ŭ styli Silikonavaj daliny.

Woven City

Woven City maje raźmiaścicca la padnožža hary Fudzijama. Skrynšot z wovencity6108 / YouTube

Ciapier ža kampanija vymušana adłaści svaje płany ŭ doŭhuju skryniu. Jak adznačaje vydańnie, Woven Planet sutyknułasia ź ciažkaściami ŭ svajoj pracy z-za nieadpaviednaści pamiž svaimi ambicyjami i čakańniami maciarynskaj kampanii, jakaja chacieła chutkaha ŭkaranieńnia raspracovak.

Zadača stvareńnia prahramnaha zabieśpiačeńnia taksama była ŭskładniena tym, što kampanija chacieła, kab jano pracavała na mnohich typach transpartnych srodkaŭ — elektramabilach, hibrydnych madelach, aŭtamabilach ź bienzinavym i vadarodnym ruchavikom.

U vyniku raspracoŭka Arene zaniała bolš času, čym płanavałasia. Spačatku metaj było vypuścić paŭnavartasnuju viersiju ŭ 2025 hodzie. Ale paźniej termin byŭ pieraniesieny na 2027 hod.

U minułym hodzie, jak adznačaje vydańnie, Woven Planet pačała ssoŭvać svaju ŭvahu na raspracoŭku prahramnaha zabieśpiačeńnia, jakoje moža być pastaŭlena chutkim časam. Heta aznačała zasiarodžańnie ŭvahi tolki na aŭtamabilach Toyota.

U vyniku zamiest nazvy Woven Planet źjaviłasia Woven by Toyota. Ciapier płanujecca, što poŭnamaštabnaje razhortvańnie prahramnaha zabieśpiačeńnia na aŭtamabilach kancernu adbudziecca ŭ 2026 hodzie.

Tesla i Toyota

Historyja Woven Planet, jak adznačaje vydańnie, vydatny prykład inšym tradycyjnym kampanijam, jakija razumiejuć, što im patrebny inavacyi, ale jakim ciažka intehravać ich u svaje staryja ałharytmy.

Vydańnie adznačaje, što Toyota nie adziny vytvorca, jaki sutyknuŭsia z prablemami ŭ vobłaści prahramnaha zabieśpiačeńnia.

Na minułym tydni General Motors prypyniła vykarystańnie aŭtamabilaŭ biez vadziciela z-za aściaroh z nahody biaśpieki, paśla taho jak taki aŭtamabil źbiŭ žančynu.

Volkswagen, druhi pa vieličyni aŭtavytvorca ŭ śviecie, vydatkavaŭ miljardy i naniaŭ armiju inžynieraŭ dla svajho ŭłasnaha prahramnaha prajekta, ale ŭ kančatkovym vyniku taksama vymušany byŭ adkłaści svaje płany. Hety pralik pryvioŭ da zatrymak vytvorčaści madelaŭ i staŭ dadatkovym arhumientam dla adstaŭki hienieralnaha dyrektara.

Z druhoha boku, novyja hulcy ŭ aŭtaindustryi paśpiachova raźvivajuć aŭtamabili, jakija padobnyja da kampjutaraŭ na kołach. Tesla, kitajski BYD i inšyja šyroka vykarystoŭvajuć prahramnaje zabieśpiačeńnie dla kiravańnia funkcyjami aŭtamabila.

U ich madelach usio, pačynajučy ad zapasu chodu batarei da funkcyj aŭtanomnaha vadžeńnia, moža być palepšana praz prykładańnie na telefonie.

Hetyja kampanii mohuć chutka adaptavacca da źmienaŭ, što daje im pieravahi pierad tradycyjnymi aŭtavytvorcami, jakija mienš hnutkija i bolš kansiervatyŭnyja ŭ svaich padychodach.

Čytajcie jašče:

Toyota zajaŭlaje, što jaje elektramabili nastupnaha pakaleńnia buduć mieć zapas chodu 1000 km

Hety aŭtamabil ciapier samy pradavany ŭ śviecie

Budučynia vadarodnych aŭtamabilaŭ u Jeŭropie pad sumnieńniem. U toj ža čas u Azii prodaž raście

Jak kitajski BYD staŭ samaj vialikaj pahrozaj dla Tesla

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?