Ilustracyjnaje fota: bsmu.by
Miedyki salidarnyja ŭ tym, što novuju redakcyju zakona «Ab achovie zdaroŭja» pryniali, kab spynić adtok kadraŭ ź miedycyny. Zhodna z nacyjanalnym bankam vakansij, u krainie šukajuć 6614 daktaroŭ-śpiecyjalistaŭ, 3975 miedsiaścior, 3054 sanitaraŭ. Niedachop miedrabotnikaŭ u balnicach i paliklinikach katastrafičny. Niamała kvalifikavanych śpiecyjalistaŭ źjechali z krainy i za miažoju zmahli ŭładkavacca pa śpiecyjalnaści.
Z hetaha čynoŭnikami mahła być zroblena vysnova ab dobrym uzroŭni navučańnia. Biełaruskija daktary sapraŭdy naležnaha ŭzroŭniu prafiesijanalizmu, kažuć miedyki, ź jakimi pahavaryła «Naša Niva», adnak jość niuansy.
«Paśladypłomnaja adukacyja ŭ Biełarusi znachodzicca na vielmi nizkim uzroŭni. Reč u drennaj materyjalna-techničnaj bazie kafiedraŭ i nizkaj apłacie pracy supracoŭnikaŭ», — adznačaje adzin z daktaroŭ.
Jon śćviardžaje, što jaho kalehi iduć u ardynaturu dziela dypłomu, bo isnujučyja prahramy navučańnia nie prapanujuć pryncypova ničoha novaha. Ale ciapier achvotniki zadumajucca, «ci varta papadać u kabału na 5 hadoŭ paśla ardynatury».
Na jaho pohlad, chutčej za ŭsio «dziaržava prydumaje niejki sposab, kab nie pakinuć prafiesarska-vykładčycki skład univiersitetaŭ biez pracy».
Naprykład, pry pryznačeńni na pasadu zahadčyka adździaleńnia buduć patrabavać najaŭnaść ardynatury, ci dla adkryćcia pryvatnaha kabinieta taksama ŭviaduć abaviazkovuju ŭmovu — prachodžańnie ardynatury pa śpiecyjalnaści, razvažaje miedyk.
«Biełaruski dypłom ab adukacyi pa-raniejšamu pryznajecca tolki ŭ abmiežavanym šerahu krain, i najaŭnaść ardynatury za plačyma nie mocna dapamoža suiskalnikam», — zaŭvažaje jon.
Doktar dadaje, što pavieličeńnie terminaŭ navučańnia ŭ ardynatury i jaje biaspłatnaść laža ciažaram na biudžet, tamu buduć šukać krynicy jaho papaŭnieńnia.
Na dumku surazmoŭcaŭ, novyja normy zakona nie źmienšać kolkaść achvotnych stać miedykami, ale ci dapamoža jon pryviazać ich da balnic i paliklinik, pakaža čas.
Inšy doktar, jaki pracuje ŭ paliklinicy, adznačaje, što ŭ ich ustanovie mała chto z supracoŭnikaŭ skančaŭ ardynaturu. Heta dadatkovaja adukacyja nie patrabujecca dla pracy ŭ paliklinicy. Tamu składana skazać, nakolki źmieny ŭ zakonie zakranuć zvyčajnych daktaroŭ.
Stamatołah z 20-hadovym stažam zaŭvažaje, što maładyja daktary, jakija prychodziać na internaturu ŭ palikliniku, časta sutykajucca z materyjałami i technałohijami minułaha stahodździa.
Mnohija ź ich padčas vučoby va ŭniviersitecie padzarablali asistentami stamatołahaŭ u pryvatnych klinikach, tamu im jość z čym paraŭnoŭvać. Adsiul ciakučka kadraŭ u dziaržstamatałohii.
«Adna z pryčyn, čamu moładź sychodzić z paliklinik, pastupaje ŭ ardynaturu, zusim nie ŭ tym, kab nabyć novyja viedy i navyki. Na žal, nijakich praryŭnych adkryćciaŭ u ajčynnaj stamatałahičnaj navucy ja nie zhadaju. Pryčyna ŭ tym, što padčas vučoby ŭ ardynatury možna adnačasna padzarablać u pryvatnych klinikach stalicy. Praktyčna ŭ kožnaha prafiesara, dacenta ci asistenta jość svoj kabiniet ci klinika», — davodzić jon.
Na jaho pohlad, ułady nie abmiažujucca ŭviadzieńniem novych normaŭ u zakon «Ab achovie zdaroŭja» i buduć prydumlać dadatkovyja zachady, kab nie dapuskać adtoku kadraŭ.
Surazmoŭcy kažuć, što ŭ mnohich balnicach, asabliva pravincyjnych, šmat moładzi, jakoj nie chapaje dośviedu, a pieraniać jaho niama ŭ kaho. Śpiecyjalistaŭ z 10-15 hadovym stažam niama. Byvaje, što pacyjentam nie mohuć chutka pastavić dyjahnaz. Na pracu viartajuć piensijanieraŭ.
«Adtok miedrabotnikaŭ nie spyniajecca. Situacyja nasamreč užo na miažy. Dachodzić da taho, što lačyć niama kamu. Nahruzka na miedpiersanał kałasalnaja. Dyk voś tamu i zrabili zakon. Uzmacnili žorstkaść. Kab pryviazać miedykaŭ na 10 hod», — adznačaje jašče adzin miedyk.
Jon miarkuje, što siłavikam dali ŭstanoŭku nie zakryvać miedykaŭ na sutki: niadaŭna ŭziali lekara ŭ Mahilovie i adpuścili sa štrafam za raspaŭsiud ekstremisckich materyjałaŭ. Na pohlad surazmoŭcy, heta parušaje ŭžo zvykłuju praktyku pieraśledu.
U cełym staŭleńnie da miedykaŭ niepavažlivaje, praciahvaje inšy surazmoŭca. Jon nahadvaje, što niamała ich zvolnili z-za taho, što ŭhledzieli ŭ ich pavodzinach niełajalnaść.
«Heta vydatna adlustravana ŭ losie doktara Andreja Uładzimiraviča Lubieckaha. Doktara, jaki pravodziŭ unikalnyja apieracyi dzieciam z pryrodžanaj patałohijaj, spačatku zvolnili za jaho pazicyju z balnicy. A potym kinuli za kraty. Jon adbyvaje termin u kałonii pa palityčnych artykułach i ŭniesieny ŭ pieralik ekstremistaŭ», — ilustruje prykładam staŭleńnie da miedykaŭ adzin ź ich.
Surazmoŭcy ličać, što novaŭviadzieńni ŭ zakon — vynik kompleksnaj pravierki miedyčnych ustanoŭ kamisijaj hałoŭnaj doktarkaj Respublikanskaha kliničnaha miedcentra Kiraŭnictva spraŭ Łukašenki Irynaj Abielskaj.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Piać hadoŭ paśla ardynatury, vialikija hrošy kampiensacyi. Łukašenka ŭvioŭ pryhon dla miedykaŭ
