Fota: vecteezy
Volha:
«Moj sposab: 7 hadzin snu i zbałansavanaje charčavańnie. Kali jość mahčymaść, starajusia hulać na śviežym pavietry minimum dźvie hadziny na dzień. U maje 30 hadoŭ mnie hetaha chapaje, kab trymać siabie bolš-mienš u tonusie».
Jaŭhien:
«Byvajuć dni, kali ja na miažy isteryki abo paniki, i heta moža zdarycca z-za prostaha słova ci navat śloz kaho-niebudź, kamu ja darahi. Ja pra mamu kažu, pra ciešču, žonku.
I što cikava, hetaje napružańnie prymušaje mianie maŭčać, nie abmiarkoŭvać svaich turbot. Rablu vyhlad, što ja ŭ normie, nie mahu kanstruktyŭna abmierkavać, što turbuje, u razmovach prosta padkreślivaju niehatyŭnyja momanty i pradkazvaju horšyja vyniki, ale ničoha nie rablu.
Ja nie chaču pačać pić, hulać, tamu ŭ mianie jość psichołah, jaki mnie i patłumačyŭ, što treba rabić, kali niekanstruktyŭnaje abmierkavańnie navin nie prynosić rašeńniaŭ. Treba pačać havaryć, što my možam zrabić. My pavinny raspracoŭvać płany, abmiarkoŭvać, jakija kroki buduć najbolš efiektyŭnymi, i jakija stratehii pavodzin dapamohuć viarnuć nam narmalnaść u žyćci».
Ała:
«Vykładaju ŭ škole i znachodžusia ŭ surjoznaj ryzycy pastajanna. Siabroŭki dapamahajuć, u mianie ich dastatkova, kab nie źjechać z hłuzdu. Adna doktarka vypisvaje tabletki…
Kali adčuvaju, što pierastaju vałodać saboj, mahu vypić, choć heta dapamahaje horš».
Lena:
«Maje sens zaniacca sportam, hulać na śviežym pavietry, zachapicca naviadzieńniem paradku. Prosta skončyć niejkija adkładzienyja chatnija spravy, prybrać, razabracca z dakumientami.
Samaje kontrpraduktyŭnaje — heta nahniatać historyju biaskoncymi prahladami videa i čytańniem pra adno i toje ž, dzie kanstatujucca žudasnyja fakty i dajucca žudasnyja prahnozy, ale biez sposabu rašeńnia. Heta ŭsio niekanstruktyŭna, ničoha nie daje».
Alaksandr:
«Kukucha» jedzie, i ja ničoha nie mahu z hetym zrabić. Pracuju ŭ biblijatecy i baču, jakim strašnym, ideałahizavanym staŭ hety naš śviet u Biełarusi.
Vyratavańnie: čytać kłasiku, zusim dalokija ad našaj rečaisnaści tvory — Džeka Łondana, Valtera Skota, Dziuma. Darečy, hetaja litaratura ciapier popytam karystajecca bolš, čym ekšn. Napeŭna, ludzi, sami taho nie razumiejučy, znachodziać srodak abstrahavacca ad rečaisnaści, choć nienadoŭha.
A jašče ŭ mianie jość znajomaja, jana KVZ pačatku stahodździa hladzić u Youtube, tok-šou staryja, kamiedyi roznyja, mieładramy. Pad usio heta zasynaje i kaža, što vysypajecca, a, značyć, ranicaj ustaje dziejazdolnaja».
Maryna:
«Ja narychtoŭkami zajmałasia ŭsiu vosień, mnie padabajecca heta adčuvańnie «kansiervavaha zavoda» na majoj kuchni. Heta kožny hod taki erzac, heta značyć nie całkam paŭnavartasny zamieńnik ščaślivaha žyćcia.
Kuplać tańniej, ale chadzić pa lesie, pa harodzie i sadzie, dzialicca receptami, narazać, kipiacić, zakručvać, zamarožvać — heta ŭsio elemienty majoj psichaterapii».
Andrej:
«Kali prajšli vybary, a potym pačałasia vajna, ja byŭ na piku razhublenaści i stresu. Bolš-mienš pryjšoŭ u prytomnaść, kali my z žonkaj abmierkavali i zrabili nastupnaje:
- viza;
- nataryjalnyja davieranaści na ŭsiu majomaść, rachunki;
- napisali tastamienty;
- zapisali paroli ŭsich kartak i sacsietak adno adnaho, schavali ich u nadziejnym miescy;
- źviarnulisia da psichaterapieŭtaŭ, prachodzim kurs;
- prymajem leki.
Čytajcie taksama:
«Pačałosia žyćcio paśla śmierci». Što byłyja pratestoŭcy kažuć pra žyćcio ŭ krainie paśla 2020 hoda
