Śviatłana Cichanoŭskaja dała vialikaje intervju rasijskamu vydańniu «Novaja hazieta. Jevropa». Padčas hutarki jana niekalki razoŭ padkreśliła, što pamiž rasijanami i biełarusami jość istotnaja roźnica, tamu, naprykład, niespraviadliva ŭvodzić dla ich u Jeŭropie adnolkavyja abmiežavańni.
«My ž bačym znaki Z na vulicach u Rasii, bačym rasijan, vielmi ahresiŭna suprać Ukrainy nastrojenych. U Biełarusi vy takoha nie ŭbačycie nikoli. U nas biełarusy prosta nie razumiejuć, jak možna napaści na susiedniuju krainu, na blizkuju krainu», — skazała jana.
«U rasijan usio ž taki jość impieryjalistyčnyja ambicyi, i jany raspaŭsiudžvajucca na bolšaść nasielnictva, na žal», — zaŭvažyła Cichanoŭskaja.
Jana dadała, što Pucina, u adroźnieńnie ad Łukašenki, pryznajuć lehitymnym kiraŭnikom.
«Z hetaj razmovy ja zrazumieŭ, što vy naohuł nie kamunikujecie z rasijskaj apazicyjaj za miažoj. U hetym niama sensu? Ci čamu tak?» — spytaŭ jaje žurnalist Ilja Azar.
Śviatłana Cichanoŭskaja adkazała, što viedaje mnohich dziejačaŭ rasijskaj apazicyi (z Kara-Murzoj sustrakałasia, naprykład) i vitaje namahańni, nakiravanyja na pasłableńnie rasijskaha režymu i vyzvaleńnie ŭsich palitviaźniaŭ.
«Ja ŭpeŭnienaja, što našy miedyja niečamu vučacca ŭ rasijskich apazicyjnych miedyja, mahčyma, hramadskija inicyjatyvy našych krain taksama majuć znosiny.
Ale i jarka vyjaŭlenaha zapytu [na znosiny] niama, kali ščyra. Jość niejkija ahulnyja kanfierencyi, dzie prysutničajuć biełaruskija demakratyčnyja siły i rasijskija apazicyjaniery. Napeŭna, pakul hetaha dastatkova», — skazała jana.
Pavodle słoŭ Cichanoŭskaj, ahulnych prajektaŭ z rasijskaj apazicyjaj u jaje niama.
«Viadoma, jość ahulnyja padychody, ale kantekst u dźviuch krain absalutna rozny».
«A mnie zdajecca, što davoli padobny kantekst, ale vam lepš vidać», — zaŭvažyŭ Azar.
«Mnie lepš vidać, bo ja taksama saču za rasijskim paradkam dnia i viedaju, što kali čałavieka ŭ Biełarusi spytać pra vajnu, to jon pramaŭčyć, nie skaža, što suprać, bo viedaje, što paśla takich słoŭ jaho mohuć u turmu pasadzić. Ale jon nikoli nie skaža, što jon za, što pravilna tam [Rasija] ŭsio robić. Nikoli.
I ŭ hetym vialikaja roźnica. Mahčyma, vy jaje nie adčuvajecie, ale dla mianie heta prosta kałasalny gap [razryŭ]».
Heta intervju aburyła niekatorych rasijskich apazicyjanieraŭ.
«Voś vam zdraście», — prakamientavaŭ Maksim Kac jaje słovy pra impieryjalistyčnyja ambicyi i lehitymnaść Pucina.
«Usio, što treba viedać ab intelektualnym uzroŭni i kvalifikacyi ŭ jakaści palityka Cichanoŭskaj», — napisaŭ u tvitary zasnavalnik bujnoj rasijskaj kampanii «Artsoft» Artur Zakiraŭ, jaki asudziŭ vajnu i stvaraje arhanizacyju pa abaronie pravoŭ rasijan i emihrantaŭ.
«Kali ŭžo na toje pajšło, to asabista ja liču, što biełarusy svajoj biaździejnaściu i maŭklivaj zhodaj ź dziejańniami Łukašenki stvarajuć spryjalnyja ŭmovy dla ŭtrymańnia ŭłady Pucinym i spryjajuć jaho vajnie va Ukrainie, u jakoj u tym liku zadziejničany terytoryi Biełarusi pad patreby pucinskaha vojska», — dadaŭ Zakiraŭ.
Biełarusy ŭ kamientarach im pišuć: dzie ž tut niapraŭda? Mnohija rasijanie padzialajuć abureńnie svajoj apazicyi.
«Meta — pabudavać identyčnaść svajoj krainy na adšturchoŭvańni ad byłoj mietrapolii. Ci navat na kanfrantacyi ź joj. Jašče adna «my nie Rasija», — kamientuje adzin z tvitarčukoŭ słovy Cichanoŭskaj.
Ale chapaje i tych rasijan, jakich chvaluje inšaje pytańnie: a što rasijskaja apazicyja za hety čas zrabiła dla svaich hramadzian?
«Davajcie jašče da Cichanoŭskaj daja**ciesia, jakaja za try hady zrabiła bolš dla biełarusaŭ, čym usia Rasija. A nu da… Jana nie zdymaje vidosiki dla jutuba», — pišuć Kacu.
«Maksim, nam praŭda nie vielmi cikavaja Cichanoŭskaja. Tam niechta Navalny sprabuje naładzić uzajemadziejańnie roznych ludziej pa pytańni vybaraŭ. Moža, vy heta abmiarkujecie? Abjadnajeciesia z kim-niebudź, chto blizki vam pohladami? Pakažycie prykład. Taki vypadak udały… Nie znachodzicie?»
«Jana za rasijan taksama tapić pavinna? Dyk hetym vam varta było b zaniacca», — paprakajuć Kaca.
«Dy po*** (pardon mon frenč) na Cichanoŭskuju — jana nie naš palityk. Naša prablema nie ŭ joj, a ŭ tym, što… Karaciej, nam treba svaju, narmalnuju apazicyju vyroščvać, a to ŭsiakija tam voŭkavy-kacy i inšyja miłovy, heta trešak», — adkazvajuć Zakiravu.
«Jana siabie ratuje i svoj narod, a vy joj kryŭdački vystaŭlajecie. Vystaŭlać možna našym palitykam, nie biełaruskim. Jana adpracoŭvaje davoli paśpiachova svaje mety», — piša inšy kamientatar.
Vyniki hetaj dyskusii iranična padsumavaŭ błohier Džypsinkoŭ: «Zdajecca, biełaruskija demakratyčnyja siły stracili takoha sajuźnika, jak rasijskaja apazicyja ŭ tvitary».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Tamu što Pucin nie durań». Chadarkoŭski patłumačyŭ, čamu ŭ Rasii niama «svajoj Cichanoŭskaj»
