Dzianis Karaś. Fota: novaya.by

Dzianis Karaś. Fota: novaya.by

Prateže Kačanavaj?

Rabotniki «Naftana», dzie raniej pracavaŭ Dzianis Karaś, miarkujuć, što toj trapiŭ u Pałatu pradstaŭnikoŭ, dziakujučy zastupnictvu staršyni Savieta Respubliki Natalli Kačanavaj.

Jana kiravała navapołackim harvykankamam, kali Karaś ź nieŭtajmavanym entuzijazmam prabivaŭsia «choć na jakuju, ale kiroŭnuju pasadu ŭ prafkam pradpryjemstva». Jaho ŭpartaść była zaŭvažanaja.

Kali ŭ Navapołack pryjazdžaje Natalla Kačanava, to na naradach pobač ź joj siadzić 45-hadovy Dzianis Karaś.

Natalla Kačanava i levaruč ad jaje Dzianis Karaś na adnoj z naradaŭ u Navapołacku. Fota: novaya.by

Natalla Kačanava i levaruč ad jaje Dzianis Karaś na adnoj z naradaŭ u Navapołacku. Fota: novaya.by

U 2015 hodzie budučy deputat atrymaŭ zvańnie «Lepšaha hramadskaha inśpiektara pa achovie pracy FPB» u Biełchimprafsajuzie. Za hod rabotnik vyjaviŭ 1090 parušeńniaŭ praviłaŭ techniki biaśpieki, za jakija šaściarych kaleh pryciahnuli da dyscyplinarnaj adkaznaści. U prafkamie Karasia nazyvali pierśpiektyŭnym maładym kiraŭnikom, a ŭ kalektyvie — paźbiahali. 

U Pałatu pradstaŭnikoŭ Karaś trapiŭ u 2019-m. Jon člen Pastajannaj kamisii pa pramysłovaści, paliŭna-enierhietyčnym kompleksie, transpartu i suviazi.

Byłyja kalehi, znajomyja z Karasiom, ličać, što panazirać za parłamienckimi vybarami ŭ Polščy — jaho ŭłasnaja inicyjatyva. Žadańnie vysłužycca pierad načalstvam było charakterna dla jaho.

«Jon razumieje, što važna zajavić pra takoje, kab źviarnuć na siabie ŭvahu načalstva, ad jakoha zaležyć jaho los. Takoj była ideja z Polščaju. Spravakavać, kab rastrubili, što jaho nie puścili tudy. A kali b puścili, to jon by raskazvaŭ kazki, jakija ŭ Polščy vybary niačesnyja i jak uščamlajucca tam pravy vybarščykaŭ», — davodzić były kaleha Karasia.

Šukaŭ, chto pakinuŭ pra jaho nadpis na ścianie

Da deputactva ŭ Pałacie pradstaŭnikoŭ Dzianis Karaś adpracavaŭ na «Naftanie» amal 25 hadoŭ. Jon vypusknik Navapołackaha politechničnaha technikuma i Połackaha ŭniviersiteta. Na pradpryjemstva pryjšoŭ junakom.

«Užo tady dla jaho byŭ charakterny padchalimaž. Jon ŭsiudy ŭłaziŭ, kab pakazać, što va ŭsim raźbirajecca. Časam heta vyhladała śmiešna, ale ŭsprymałasia imknieńniem chłopca zarabić aŭtarytet», — apaviadaje rabotnik pradpryjemstva.

U 30-hadovym uzroście Karasiu davieryli kiravać adnoj z ustanovak na asnoŭnaj vytvorčaści «Naftana». Jaho nastaŭnikam byŭ daśviedčany śpiecyjalist, z padkazki jakoha vučnia pastavili načalnikam. Paźniej admysłoviec nie chavaŭ, što pamyliŭsia z vybaram.

Staŭšy načalnikam, Karaś nie chacieŭ nikoha słuchać.

«Ličyŭ, što lepiej za ŭsich va ŭsim raźbirajecca. Tych, chto krytykavaŭ jaho mietady kiraŭnictva i padychod da pracy, źniščaŭ. Daśviedčanyja apieratary, jakija dziasiatki hadoŭ adrabili na vytvorčaści, pierachodzili na inšyja ŭčastki ci naohuł zvalnialisia», — raskazvajuć pra Karasia.

Dzianis Karaś sustrakajecca z pracoŭnymi kalektyvami Navapołacka. Fota: house.gov.by

Dzianis Karaś sustrakajecca z pracoŭnymi kalektyvami Navapołacka. Fota: house.gov.by

Na pradpryjemstvie pamiatajuć, jak u padsobnym pamiaškańni cecha na ścianie niechta napisaŭ: «Karaś — pietuch».

«Jon psichavaŭ, šukaŭ chto moh toje zrabić, ale nie adšukaŭ», — adznačaje adzin z surazmoŭcaŭ.

Jaho maraju ŭ toj čas było staršyniavańnie ŭ prafkamie «Naftana». Karaś rehularna naviedvaŭsia ŭ administracyju z roznymi inicyjatyvami, kab padłahodzicca da kiraŭnictva. 

«Skandały kiraŭnictvu nie patrebnyja»

Pavodle rabotnikaŭ, na «Naftanie» mierkavali, što Karaś danosić u KDB. Kiraŭnictva pradpryjemstva rabiła ŭsio, kab inicyjatyŭny rabotnik zastaŭsia padalej ad administracyi. 

Kiraŭnikom prafkama pradpryjemstva Dzianis Karaś nie staŭ. U jaho bijahrafii adznačana, što jon na «Naftanie» byŭ namieśnikam cechavaha prafsajuznaha kamiteta na vytvorčaści «Naftavyja palivy i aramatyka».

Na pradpryjemstvie pamiatajuć, jak Karaś sprabavaŭ stać i staršyniom cechavaha kamiteta. Heta pasada mieła svaju vyhadu. Staršynia cechkama byŭ vyzvaleny ad pracy na vytvorčaści, a zarobak jamu płaciŭ halinovy prafsajuz.

Karaś razam z načalnikam vytvorčaści Uścinavym namahaŭsia arhanizavać «impičmient» dziejnamu staršyni Karatkieviču.

«Praz načalnikaŭ źmienaŭ raspaŭsiudžvalisia papiery i prosta ŭnušali apierataram, kab jany padpisalisia suprać Karatkieviča, bo jon ničoha nie robić. Za Karatkieviča zastupilisia kiraŭniki inšych zavadskich padraździaleńniaŭ», — zhadvaje były rabotnik «Naftana».

Pa jaho słovach, kiraŭnictva pradpryjemstva daviało Karasiu, kab jon sprabavaŭ stać kiraŭnikom prafsajuznaj jačejki na vybarach. Z dapamohaju buntu mianiać staršyniaŭ nie pryniata, bo skandały kiraŭnictvu pradpryjemstva nie patrebnyja.

Na vybarach kandydatura Karasia nie była padtrymanaja. Mała taho, hienieralny dyrektar «Naftana» Alaksandr Dziemidaŭ na prafsajuznym schodzie niehatyŭna vykazaŭsia pra mietady, jakija vykarystoŭvaŭ Karaś, namahajučysia stać prafsajuznym lidaram.

Karaś tady zadavoliŭsia tolki namieśnickaj pasadaj u cechkamie.

«Kali chočaš, kab ciabie pabili — pryjazdžaj»

Na parłamienckich vybarach u akruzie Karasia bolšaść vybarščykaŭ «prahałasavała» daterminova i vyjaviłasia, što naftanaviec pieramoh.

«Kali padnačalenyja Karasia daviedalisia, što jon idzie ŭ deputaty, to chadzili na inšyja ŭstanoŭki i prasili tamtejšych rabotnikaŭ prahałasavać za jaho, kab jon syšoŭ. Ad jaho samadurstva ŭ cechu prosta stamilisia», — kaža były rabotnik «Naftana».

Dzianis Karaś viadzie pryjom hramadzian. Fota: novaya.by

Dzianis Karaś viadzie pryjom hramadzian. Fota: novaya.by

Dzianis Karaś vyvučyŭsia na ideołaha ŭ Akademii kiravańnia Łukašenki, tam ža skončyŭ mahistraturu pa śpiecyjalnaści «Dziaržaŭnaje kiravańnie».

Karaś dvojčy byŭ žanaty. U jaho troje dziaciej. U intervju jon nie praminaje adznačyć, što šmatdzietny baćka. U 2020 hodzie jon pachavaŭ maci.

Kali pačalisia pratesty, deputat Pałaty pradstaŭnikoŭ prapanoŭvaŭ svaju kandydatu na pieramovy z pratestoŭcami, ale jaho inicyjatyŭnaść nie ŭchvalili.

«Jamu skazali adkrytym tekstam: kali chočaš, kab ciabie pabili, to pryjazdžaj. Jon nie navažyŭsia», — kaža były rabotnik pradpryjemstva.

«Jon cichušnik i vielmi bajaźlivy čałaviek. Usio robić za śpinami, u tvar nikoli ničoha nie skaža», — raskazvajuć pra Karasia.

Aktyŭnaja faza pratestaŭ na «Naftanie» pryjšłasia na 14 žniŭnia 2020 hoda, a 17-ha naviedaŭsia supakojvać rabotnikaŭ staršynia KDB Ivan Cierciel.

Sam Karaś na sustrečy z žycharami Navapołacka vinavaciŭ pratestoŭcaŭ i praciŭnikaŭ Łukašenki ŭ tym, što jany prydumali falsifikacyi, a vybary prajšli česna. Pavodle jaho, ułada robić usio pravilna, kab ruchacca dalej.

Da 2022 hoda na «Naftanie» dziejničała supołka «Biełaruskaha niezaležnaha prafsajuzu». Paśla vybaraŭ u jaje zapisałasia blizu 500 rabotnikaŭ. Častka ź ich paźniej trapiła pad pieraśled.

U viciebskim SIZA ciapier Volha Brycikava, Alaksandr Kucharonak. Na stačkamaŭcaŭ zaviedziena kryminalnaja sprava za zakliki da sankcyij.

Hladzicie taksama:

Bolš za 15 miljardaŭ dalaraŭ. Rasijski naftahazavy hrant Łukašenku ŭ hod napadu na Ukrainu byŭ rekordnym u historyi

Abstrukcyja, zroblenaja Łukašenku rabotnikami MZKC, stała najmacniejšym psichałahičnym udaram

Da 15 hadoŭ kałonii. Ahučyli vyraki ŭ spravie «Rabočaha ruchu»

«Natalla Ivanaŭna, kali treba sabrać podpisy, my źbiarom». Ułady nahniatajuć hamafobnuju isteryju

Historyja žyćcia Natalli Kačanavaj: jak valejbalistka z vodakanała stała samaj vysokapastaŭlenaj žančynaj Biełarusi

Клас
5
Панылы сорам
9
Ха-ха
6
Ого
0
Сумна
3
Абуральна
26

Chočaš padzialicca važnaj infarmacyjaj ananimna i kanfidencyjna?