Fota: BiełTA
Jak adznačyŭ čynoŭnik, niahledziačy na pasłableńnie ŭvahi da jaho, virus nikudy nie źnik. «U nas, jak i va ŭsim śviecie, nazirajecca rost zachvaralnaści. Kampanija pa vakcynacyi ŭ Biełarusi takaja ž, jak štohod», — skazaŭ namieśnik ministra achovy zdaroŭja.
Tut varta zaznačyć, što ŭ Biełarusi bolš za hod nie ahučvajucca źviestki pra vypadki kavidu.
Juryj Horbič upeŭnieny, što vakcynacyja — samy efiektyŭny srodak prafiłaktyki zachvorvańnia.
«Ale apošnim časam ludzi stali stavicca da hetaha mierapryjemstva spakojniej, bo my zabylisia, što takoje epidemii adru, polijamielitu, naturalnaj vospy, jakija jašče litaralna ŭ pačatku minułaha stahodździa hubili vialiki adsotak nasielnictva Ziamli», — padzialiŭsia jon.
Namieśnik ministra achovy zdaroŭja nahadaŭ, što choć virus COVID-19 ciapier pieranosicca adnosna lohka i maje nizkuju śmiarotnaść, jon usio jašče chutka raspaŭsiudžvajecca.
«Nie dumaju, što kamuści pryjemna pravieści piać dzion doma z vysokaj tempieraturaj i nastupnym postkavidnym sindromam», — adznačyŭ Juryj Horbič.
Pavodle jaho słoŭ, ciapier u Biełarusi ad COVID-19 možna pryščapicca rasijskimi vakcynami «Ham-kavid-vak» («Sputnik»), «Sputnik łajt», a ŭ niekatorych miescach kubinskaj vakcynaj «Sabierana plus».
«Heta vakcyny, jakija całkam prajšli kantrol jakaści. Kolkaść antyhienu ŭ ich u paraŭnańni ź minułym hodam pavialičanaja ŭ try razy, i heta adpaviadaje najlepšym suśvietnym standartam», — padzialiŭsia namieśnik ministra achovy zdaroŭja.
Siońnia vakcyna jość absalutna va ŭsich arhanizacyjach achovy zdaroŭja.
Jak raspavioŭ Juryj Horbič, samy prosty sposab atrymać vakcynu — pryjści ŭ palikliniku pa miescy žycharstva.
Taksama jon adznačyŭ, što časam bujnyja pradpryjemstvy damaŭlajucca z arhanizacyjami achovy zdaroŭja, i tady vakcynu možna atrymać na pracoŭnym miescy ŭ miedpunkcie ŭ vyznačany čas i dzień.
Namieśnik ministra achovy zdaroŭja nahadaŭ ab mahčymych pabočnych efiektach i praviłach pavodzin paśla vakcynacyi.
Na nastupny dzień paśla vakcynacyi moža padniacca tempieratura, ale Juryj Horbič zapeŭnivaje, što heta narmalna. I ŭdakładniaje, što paśla pryščepki arhanizm adciahvaje svaje resursy na vypracoŭku imunitetu, jaho nielha pieranapružvać.
«Na praciahu 3-4 dzion paśla vakcynacyi nie varta zajmacca fizičnymi nahruzkami na piku svaich mahčymaściaŭ ci chadzić u łaźniu z tempieraturaj 140 hradusaŭ», — skazaŭ jon.
Namieśnik ministra taksama raźviančaŭ mif, što paśla pryščepki nielha chadzić u duš.
Ale nahadaŭ, što paŭhadziny paśla vakcynacyi lepš pravieści ŭ miedustanovie pad nahladam prafiesijanałaŭ, kab paźbiehnuć alerhičnych reakcyj.
