Etničny armianin, jaki ŭciok z Nahornaha Karabacha, čakaje časovaha zasialeńnia ŭ hatel u Harysie (Siunikskaja vobłaść Armienii). Fota: Vasily Krestyaninov / AP
Z Nahornaha Karabacha ŭ Armieniju vyjechała ŭžo amal 85 tysiač armianaŭ, jakija nie zachacieli zastavacca ŭ rehijonie paśla jaho viartańnia pad kantrol Azierbajdžana. Tak, stanam na 6:00 29 vieraśnia miažu Armienii pierasiekli 84 770 vymušanych pierasialencaŭ z Nahornaha Karabacha, piša «Jeŭrapiejskaja praŭda».
Pa danych pierapisu nasielnictva ŭ rehijonie 2015 hoda, tam pražyvała kala 145 tysiač čałaviek, amal usie — etničnyja armianie. Na pačatak 2023 hoda miascovyja ŭłady aceńvali kolkaść žycharoŭ u 120 tysiač čałaviek.
Ludzi prybyvajuć praz pamiežnaje siało Karnidzor, dzie ich sustrakajuć vałanciory i prapanujuć ježu i rečy pieršaj nieabchodnaści. Z aŭtorka ŭrad Armienii arhanizavaŭ va ŭsich rehijonach krainy śpiecyjalnyja centry dla padtrymki vymušanych pierasialencaŭ z Nahornaha Karabacha.
U Armieniju evakujavali taksama paciarpiełych u vyniku mahutnaha vybuchu na bienzaschoviščy, dzie ŭ toj momant sotni ludziej čakali mahčymaści zapravić aŭto, kab vyjechać. Azierbajdžan adkryŭ pavietrany kalidor dla taho, kab pa samych ciažkich pacyjentaŭ moh prylacieć armianski viertalot.
Na minułym tydni ŭ vyniku chutkaciečnaj vajny Nahorny Karabach, jaki abviaściŭ niezaležnaść u 1991 hodzie, kapitulavaŭ.
Učora prezident niepryznanaj respubliki Samvieł Šachramanian padpisaŭ ukaz, pavodle jakoha ŭsie jaje ŭstanovy i arhanizacyi spyniajuć isnavańnie 1 studzienia 2024 hoda.
Čytajcie taksama:
Prezident Nahornaha Karabacha padpisaŭ ukaz ab spynieńni isnavańnia respubliki
Azierbajdžan zatrymaŭ eks-kiraŭnika Nahornaha Karabacha
Nahorny Karabach pryniaŭ rašeńnie ab kapitulacyi
Što takoje Nahorny Karabach i što armianie z azierbajdžancami tam dzielać
