Skrynšot videa CBC News: The National
Śpikier nižniaj pałaty kanadskaha parłamienta, Pałaty hramadaŭ, Entani Rota, u aŭtorak abviaściŭ pra adstaŭku z pasady na fonie skandału z zaprašeńniem 98-hadovaha vieterana dyvizii SS «Haličyna» Jarasłava Huńki na vystup Uładzimira Zialenskaha na minułym tydni, piša «Jeŭrapiejskaja praŭda».
U karotkaj zajavie jon padziakavaŭ parłamientaryjam za davier padčas abrańnia śpikieram Pałaty hramadaŭ Kanady ŭ papiarednim i ciapierašnim sklikańniach.
«Ź ciažkim sercam paviedamlaju deputatam ab svajoj adstaŭcy z pasady staršyni», — skazaŭ Rota, nie ŭdakładniŭšy pryčyny svajho rašeńnia.
Śpikiera zaklikali syści ŭ adstaŭku kalehi i siabry ŭrada paśla taho, jak vyśvietliłasia, što jon zaprasiŭ u parłamient padčas vizitu Zialenskaha ŭ Kanadu na minułym tydni 98-hadovaha Jarasłava Huńku. Rota pradstaviŭ jaho jak vieterana Druhoj suśvietnaj vajny, jaki zmahaŭsia suprać ruskich.
Paźniej žurnalisty vyśvietlili, što Huńka słužyŭ u 14-j hrenadziorskaj dyvizii Vafien-SS — dobraachvotnickim padraździaleńni, jakoje składałasia pieravažna z etničnych ukraincaŭ pad kamandavańniem nacystaŭ.
Dyvizija SS «Haličyna» była stvorana niamieckimi vojskami z ukraincaŭ dla baraćby suprać Čyrvonaj Armii ŭ 1943 hodzie. Niurnbierhski praces i tak zvanaja kamisija Dešena, stvoranaja ŭ Kanadzie ŭ 1980-ch hadach, nie paćvierdzili dačynieńnia ŭdzielnikaŭ dyvizii da vajennych złačynstvaŭ. Adnak dyvizija abvinavačvajecca ŭ karnych apieracyjach Viermachta suprać palakaŭ i habrejaŭ.
Zaprašeńnie Huńki ŭ parłamient Kanady vyklikała abureńnie jaŭrejskich arhanizacyj Kanady i Polščy, jakija zapatrabavali tłumačeńniaŭ. Śpikier kanadskaj Pałaty hramadaŭ tady paprasiŭ prabačeńnia, ale spačatku ŭ adstaŭku sychodzić admoviŭsia.
U ofisie premjera Kanady zajavili miascovym ŚMI, što ni premjer Džaścin Trudo, ni ŭkrainski bok nie viedali pra zaprašeńnie byłoha siabra dyvizii SS «Haličyna», a taki ŭčynak tam biezumoŭna asudžajuć.
U 2021 hodzie Niamieččyna vykazała Ukrainie pratest praz marš u centry Kijeva z nahody hadaviny dnia stvareńnia dyvizii SS «Haličyna».
