Jak Kavalčuka adsunuli ad futboła?

Kali naminalnym kiraŭnikom ABFF byŭ Uładzimir Bazanaŭ, usie klučavyja rašeńni ŭ arhanizacyi prymalisia pa ŭzhadnieńni ź Siarhiejem Kavalčukom — ministram sportu i turyzmu. Biez uchvaleńnia byłoha achoŭnika Łukašenki nie abychodzilisia pryznačeńni hałoŭnych trenieraŭ zbornaj i kłubaŭ. Kavalčuk vyrašaŭ, kamu možna, a kamu nielha hulać u vyšejšaj lizie. Bazanaŭ i jaho namieśniki nie piarečyli.

Z prychodam na pasadu staršyni Mikałaja Šarśniova ŭpłyŭ Kavalčuka pačaŭ słabieć. Były kiraŭnik Viciebskaj vobłaści daŭ zrazumieć, što maje namier zajmacca futbolnymi pytańniami samastojna. Tym bolš što ad dziaržavy fiederacyja ničoha nie atrymlivaje, praktyčna całkam farmujučy svoj biudžet za košt pastupleńniaŭ ź FIFA i UEFA.

U vyniku mienavita Šarśnioŭ pryniaŭ rašeńnie ab zvalnieńni Hieorhija Kandraćjeva i jahonych pamočnikaŭ z nacyjanalnaj zbornaj. Pryznačeńnie ispanca Karłasa Ałosa — taksama jahonaja inicyjatyva. Staršynia ABFF vystupaŭ za likvidacyju «čornych śpisaŭ» i viartańnie «niepažadanych» hulcoŭ u čempijanat Biełarusi (niekatorych užo ŭdałosia viarnuć). Rašeńni ab refarmavańni čempijanatu, źmienie farmatu lih — da hetych novaŭviadzieńniaŭ Kavalčuk taksama nie maje dačynieńnia.

Pry hetym u futbolnaj supolnaści šmat kamu padabajecca imknieńnie Šarśniova viarnuć fiederacyi choć niejkuju niezaležnaść. Ale Kavalčuk pakidać futboł biez svajoj apieki nie maje namieru.

I što ž prydumaŭ Kavalčuk?

«Trybunie» stała viadoma, što, nie zdoleŭšy zajmieć upłyŭ na Šarśniova (jaho pryznačeńnie ŭzhadniałasia z Łukašenkam), ministr vyrašyŭ stvaryć alternatyvu ABFF — strukturu, jakaja budzie zajmacca prykładna tymi ž pytańniami, što i fiederacyi, ale tolki pad kiravańniem Kavalčuka.

Na siońnia da kanca niezrazumieła, jak budzie funkcyjanavać hetaje dvojeŭładździe, za kim budzie apošniaje słova, kali adna arhanizacyja maje lehitymnaść i mižnarodnaje pryznańnie, a inšaja — administracyjny resurs. Pry hetym Kavalčuk u zahadnym paradku zaklikaje pad svajo kryło supracoŭnikaŭ fiederacyi, a da ich damiešvaje ludziej, jakija bajacca jamu piarečyć i hatovyja vykonvać lubyja zahady.

Pavodle źviestak «Trybuny», tydzień tamu Kavalčuk padpisaŭ zahad ab stvareńni pracoŭnych hrup «z metaj dalejšaha raźvićcia i ŭdaskanaleńnia futboła ŭ Respublicy Biełaruś». U zahadzie skazana, što nieabchodna stvaryć pracoŭnyja hrupy pa 13 kirunkach, u vyznačany termin raspracavać i pradstavić u Minsportu płany pa pracy hetych samych hrup. Kantrol za vykanańniem uskładzieny na namieśnika Kavalčuka Alaksandra Baravulu, jaki mieŭ dačynieńnie da represij suprać biełaruskich spartsmienaŭ, za što paźniej trapiŭ u roznyja sankcyjnyja śpisy.

Alaksandr Baravula

Alaksandr Baravula

Farmiravańnie hrup kantralavałasia asabista Kavalčukom, a kiraŭnictva ABFF prosta było pastaŭlena pierad faktam, što takaja struktura stvoranaja. Pry hetym častku hrup musiać uznačalić jakraz namieśniki Šarśniova, u ich skład uvachodziać pradstaŭniki fiederacyi i vykankama ABFF. Pryciahnutyja da «pracy» i pradstaŭniki niekatorych kłubaŭ vyšejšaj lihi.

Pieršaj u śpisie, jaki zajmieła «Trybuna», značycca hrupa analizu i raspracoŭki narmatyŭnych pravavych aktaŭ. Uznačalvaje jaje Baravula. U jaho ŭ padparadkavańni, kali tak možna skazać, i futbolnyja ludzi, i nie zusim. Da pieršaj katehoryi možna adnieści načalnika mižnarodna-pravavoha departamienta ABFF Siarhieja Iljiča, hienieralnaha sakratara fiederacyi Siarhieja Žardzieckaha, a taksama hienieralnaha dyrektara minskaha «Dynama» Andreja Tołmača. Tołmaču dazvolena ŭdzielničać u hrupie pa ŭłasnaj achvocie. Taki ž status i ŭ eks-achoŭnika Łukašenki Michaiła Botnikava — siońnia heta staršynia Fiederacyi plažnaha futboła. Jašče dva čałavieki pradstaŭlajuć roznyja adździeły Minsportu. Zapisali ŭ hrupu i pieršaha namieśnika ministra justycyi Natallu Filipavu (udzielničaje taksama pa žadańni).

Nazva druhoj hrupy ŭ niejkaj stupieni absurdnaja — «Udaskanaleńnie pracy ABFF». Atrymlivajecca, hetaja hrupa budzie kantralavać pracu Fiederacyi futboła, jakaja pa patrabavańni mižnarodnych struktur pavinna być całkam niezaležnaj, analizavać jaje dziejnaść i niejkim čynam prapanoŭvać (ci naviazvać?) karektavańni, jakija Kavalčuk paličyć karysnymi (abaviazkovymi da vykanańnia?). Uznačalvaje hrupu ŭsio toj ža ŭniviersał Baravula. A kampaniju jamu składajuć užo znajomyja Botnikaŭ i Filipava plus pieršy namieśnik Šarśniova Andrej Vasilevič.

Jašče za «ŭdaskanaleńnie pracy fiederacyi» buduć adkazvać načalnik hałoŭnaha ŭpraŭleńnia sportu i turyzmu Minharvykankama Maksim Varapaj, jaho kalehi ź piaci abłvykankamaŭ i niekalki pradstaŭnikoŭ Minsportu. U skład hrupy taksama ŭvachodzić Anatol Jurevič. U śpisach jon pradstaŭleny jak dziaržaŭny trenier nacyjanalnaj kamandy Respubliki Biełaruś pa futbole.

Jurevič — fihurant spravy ab dahavornych matčach, dyskvalifikavany rašeńniem ABFF na piać hadoŭ za dačynieńnie da afiery, — uznačalvaje hrupu, jakaja pavinna adkazvać za «ŭdaskanaleńnie kłubnaha čempijanatu». Pad jaho kiraŭnictvam kudy bolš pradstaŭnikoŭ ABFF, čym u inšych «kalektyvach», — heta Vasilevič, načalnik departamienta praviadzieńnia spabornictvaŭ Ihar Capluk, siabry vykankama ABFF Tołmač i dyrektar SDIUŠAR «Nioman» Siarhiej Saładoŭnikaŭ. Plus hałoŭny trenier «Minska» Siarhiej Jaromka. Praŭda, dla ich usich praduhledžany dobraachvotny ŭdzieł u hrupie — u adroźnieńnie ad načalnikaŭ adździełaŭ sportu i turyzmu niekalkich abłvykankamaŭ.

Anatol Jurevič

Anatol Jurevič

Taksama Jureviču, niahledziačy na ŭdzieł u davoli haniebnym skandale, daručyli hrupu «padrychtoŭki nacyjanalnych i zbornych kamandaŭ», a jašče hrupu, jakaja adkazvaje za «ŭdaskanaleńnie pracy z trenierskimi kadrami». U skład apošniaj u abaviazkovym paradku akramia Jureviča ŭvajšoŭ staršy trenier nacyjanalnaj kamandy pa plažnym futbole Dźmitryj Rubnienka, a voś jašče siamiora buduć pracavać, tolki kali sami pažadajuć. Heta sudździa z futzała Maksim Dziajkała, treniery Vienijamin Arzamascaŭ i Siarhiej Baroŭski, pieršy namieśnik Šarśniova Vasilevič, techdyrektar ABFF Dźmitryj Kasianok, a taksama dva pradstaŭniki BDUFK.

Usiaho Jurevič zjaŭlajecca kiraŭnikom troch hrup, jak i Vasilevič. Jaho pastavili adkaznym za «ŭdaskanaleńnie sistemy sudziejstva», za «dziciača-junacki futboł i padrychtoŭku spartyŭnaha reziervu», a taksama za «raźvićcio masavaha futboła».

Nie zabyŭsia Kavalčuk i na raniejšaha staršyniu ABFF. Uładzimir Bazanaŭ uznačaliŭ hrupu «raźvićcia infrastruktury».

Akramia taho, jašče stvorany hrupy pa «finansavańni futboła» (hałoŭny Baravula), «navukova-mietadyčnym i miedyčnym zabieśpiačeńni» (dyrektar RNPC sportu Iryna Malovanaja), «udaskanaleńni pracy sa ŚMI» (namieśnik ministra infarmacyi Kuncevič, kali pahodzicca). Taksama stvorana hrupa «ideałahičnaj pracy» pad kiraŭnictvam načalnika ŭpraŭleńnia kadravaj palityki Minsportu Viačasłava Šyparava.

Što dumajuć pra zahad Kavalčuka ŭ ABFF?

Niekatoryja hrupy Kavalčuka litaralna dublujuć kamitety i departamienty, jakija ŭžo daŭno funkcyjanujuć pry fiederacyi. U ABFF jość kamitety pa masavym futbole, pa miedycynie, pa dziciača-junackim futbole, pa sudziejstvie. Jość departamient markietynhu i kamunikacyj, adkazny za znosiny ź ŚMI. Vasilevič pry hetym kuryruje sudździaŭ i ŭ ABFF, i ŭ hrupie Kavalčuka.

Kavalčuk stvaraŭ svaje hrupy, nie paviedamlajučy fiederacyi futboła. Śpiecyjalisty ABFF daviedvalisia pra svajo ŭklučeńnie ŭ hetyja hrupy ŭžo pastfaktum. Pa źviestkach «Trybuny», asablivaj radaści ŭ funkcyjanieraŭ heta nie vyklikała, niekatoryja byli šakavanyja «pryznačeńniem». Pry hetym iści suprać, admaŭlajučysia ad udziełu, nichto nie maje namieru. Klerki Doma futboła nie hatovyja supraćstajać zahadam, jakija spuskajucca źvierchu.

Kali ŭ rabotnikaŭ ABFF entuzijazmu ad supracy z Kavalčukom niama zusim, to nastroj Jureviča inšy. Krynicy «Trybuny» śćviardžajuć, što jon rady tamu, što zmoža znoŭ aktyŭna ŭpłyvać na roznyja kirunki ŭ biełfutbole — ABFF paśla skandału z damoŭnymi matčami adsunuła jaho ad usich pracesaŭ. Kavalčuk ža vyrašyŭ, što trenier varty «amnistyi» (tym bolš «Enierhietyk-BDU» ŭžo nie pahražaje minskamu «Dynama» ŭ baraćbie za čempijonstva). Mierkavańnie ABFF nakont hetaha nikoha nie chvaluje.

Da čaho ŭsio moža pryvieści?

Pracentaŭ 70 udzielnikaŭ hrup bačyli futboł, jak kažuć, tolki pa televizary. U asnoŭnym — heta čynoŭniki roznaha ranhu, nabližanyja da Kavalčuka śpiecyjalisty, supracoŭniki Minsportu i hetak dalej. Ale heta ludzi, jakija hatovy słuchacca i padparadkoŭvacca Kavalčuku.

Krynicy «Trybuny» raskazvajuć pra nastroi ŭ ABFF. Tam miarkujuć, što praz svaje pryznačeńni Kavalčuk harantavaŭ sabie pakorlivaść hrup, navat kali pradstaŭniki ad ABFF buduć prasoŭvać inšy punkt hledžańnia. Pradstaŭniki fiederacyi siarod udzielnikaŭ hrup nibyta patrebnyja Kavalčuku dla taho, kab paźbiehnuć kanfliktu ź FIFA i UEFA, jakija mohuć ubačyć u ciapierašniaj situacyi pramoje ŭmiašańnie dziaržavy ŭ futbolnyja spravy. Pakarańniem za heta mohuć stać vielmi žorstkija sankcyi — ažno da adchileńnia kłubaŭ i zbornych ad mižnarodnych turniraŭ.

Jak miarkujuć surazmoŭcy «Trybuny», takim składam udzielnikaŭ Kavalčuk rychtuje sabie alibi, pry jakim moža śćviardžać, što kali ŭ hrupach jość pradstaŭniki ABFF i futbolnych kłubaŭ, to heta značyć, što rašeńni prymajucca nie čynoŭnikami, a nibyta futbolnaj supolnaściu. Adnak pa fakcie, upeŭnienyja krynicy, struktura stvoranaja dla taho, kab uchvalać prydumki Siarhieja Kavalčuka.

Čytajcie taksama:

Nacyjanalny stadyjon u Minsku adkryjuć u nastupnym hodzie

Spartyŭnyja čynoŭniki: Paśla Hulniaŭ SND čakajem novaha ministra — Juryja Karajeva 

Losam «niadobranadziejnych» futbalistaŭ, jakich nie dapuskajuć da ŭdziełu ŭ čempijanacie Biełarusi, zajmajecca kamisija pa palityčnych uciekačach — «Trybuna»

Клас
4
Панылы сорам
10
Ха-ха
5
Ого
1
Сумна
2
Абуральна
7