Płakat z nadpisam «Ruski akupant — najlepšaje ŭhnajeńnie» ŭ Łatvijskaj Nacyjanalnaj biblijatecy. Fota: facebook.com/konstantin.chekushin

Płakat z nadpisam «Ruski akupant — najlepšaje ŭhnajeńnie» ŭ Łatvijskaj Nacyjanalnaj biblijatecy. Fota: facebook.com/konstantin.chekushin

Łatvijskaje biuro ambudsmiena praanalizavała płakat z nadpisam «Ruski akupant — najlepšaje ŭhnajeńnie» na pradmiet raspalvańnia nianaviści. Nijakich parušeńniaŭ pa vynikach pravierki vyjaŭlena nie było, paviedamili ŭ biuro, piša Delfi.lv.

Raniej u Biuro ambudsmiena pastupiła skarha na płakat, vystaŭleny ŭ Łatvijskaj Nacyjanalnaj biblijatecy. Z punkta hledžańnia zajaŭnika, zhadanaja praca zaklikała da hienacydu, zabojstva, a taksama niepasredna pahražała jaho žyćciu. U biuro, adnak, z hetym nie pahadzilisia i paličyli, što płakat «Ruski akupant — najlepšaje ŭhnajeńnie» — heta prymalnaja ŭ ciapierašnich umovach forma mastackaha vykazvańnia.

«Normy mižnarodnaha prava vyrazna dazvalajuć paznačyć krytery, pa jakich možna adroźnić raspalvańnie nianaviści ad dapuščalnych sposabaŭ vykazvańnia svabody słova. Jany składajucca sa źmiestu vykazvańniaŭ, kantekstu, u jakim jany vyjaŭlenyja, nakolki jany abraźlivyja i publičnyja, jakaja ich asnoŭnaja meta i h. d. Važna aceńvać usie hetyja krytery ŭ sukupnaści, a nie paasobku. Akramia taho, subjektyŭna abraźlivy tvor mastactva nie aznačaje adrazu raspalvańnia nianaviści», — tłumačać u biuro.

Užyvajučy krytery acenki raspalvańnia nianaviści, pravaachoŭnik pravioŭ analiz pracy i nie vyjaviŭ parušeńniaŭ.

«Pravaachoŭnik pryznaje, što lubaja čužaja interpretacyja tvora mastactva moža być patencyjna subjektyŭna abraźlivaj i, takim čynam, upłyvać na suisnavańnie roznych hrup hramadstva, asabliva padčas vajennych dziejańniaŭ. Adnak, pavažajučy svabodu mastactva i tvorčaści, ahulny palityčny kantekst vystavy ŭ suviazi z vajennymi dziejańniami va Ukrainie, pachodžańnie aŭtaraŭ i metu vystavy, pravaachoŭnik pryjšoŭ da vysnovy, što miežy svabody słova nie parušalisia ŭ hetaj situacyi. Ambudsmien taksama nie znajšoŭ raspalvańnia nianaviści na kankretnaj vystavie ŭkrainskich mastakoŭ», — havorycca ŭ zajavie biuro.

Płakat z nadpisam «Ruski akupant — najlepšaje ŭhnajeńnie» byŭ vystaŭleny ŭ Łatvijskaj Nacyjanalnaj biblijatecy ŭ ramkach ekspazicyi «Skulptury i žyvapis hrupy ŭkrainskich mastakoŭ» TIGOIS project «My pieramožam! Pieriemožiemo!».

Клас
18
Панылы сорам
3
Ха-ха
3
Ого
2
Сумна
0
Абуральна
1