Fota: skrynšot z sajta minsk-lada.by
Biestseler znoŭ u prodažy
U dyleraŭ Lada ŭ prodažy źjaviłasia abnoŭlenaja Vesta — Vesta NG. Jana stanie adnym z samych tannych aŭtamabilaŭ, jakija možna kupić novymi ŭ Biełarusi. Ceny na Vesta NG pačynajucca z 44 100 rubloŭ, što pa biahučym kursie składaje kala 14 tysiač dalaraŭ ZŠA. Stolki kaštuje aŭtamabil u kuzavie siedan u pačatkovaj kamplektacyi Comfort. Za kamplektacyju Life pryjdziecca vykłaści 45 400 rubloŭ (≈$14 450) i 49 tysiač rubloŭ roŭna (≈$15 600) za viersiju Enjoy.
Źjaŭleńnie ŭ prodažy abnoŭlenaj Vesta možna nazvać znakavaj padziejaj, bo mienavita Lada Vesta była samym pradavanym novym lehkavikom u Biełarusi, pačynajučy z 2018 hoda.
Najbližejšy kankurent «Viesty» — biełaruska-kitajski siedan Geely Emgrand. Ceny na jaho pačynajucca z 49 200 rubloŭ (≈$15 650) za aŭto ŭ kamplektacyi Standart ź miechaničnaj KPP. I ad 56 900 rubloŭ (≈$18100) za aŭto z AKPP u kamplektacyi Flagship. Adznačym, što ŭ adroźnieńnie ad Geely Emgrand Lada Vesta NG prynamsi pakul dasiažnaja tolki z MKPP.
Pryvitańnie ź Irana 2.0
U teoryi, kankurencyju rasijskaj Lada aproč biełaruska-kitajskaj Geely moža skłaści iranski brend Saipa. Pieršy šourum jakoha adkryli ŭ Minsku. Dakładnyja ceny pakul nie viadomyja, ale raniej ahučvali, što samyja dastupnyja Saipa buduć tańniej za $13 tysiač. Pry ŭmovie, što aŭtamabili buduć źbirać u Biełarusi. Nakolki viadoma — na zavodzie «Junisan» pad Minskam sapraŭdy źbirajucca zapuścić vytvorčaść iranskich aŭto.
Aŭtamabil marki iranskaj marki Saipa. Fota: auto.onliner.by
Nahadajem, što kali zadumanaje ździejśnicca, to heta budzie ŭžo druhaja sproba Irana i Biełarusi naładzić vytvorčaść iranskich aŭto ŭ našaj krainie. Pieršaja sproba pośpiecham nie ŭviančałasia.
Madel Samadn LX, jakuju niekali źbirali ŭ Biełarusi z 2007 pa 2013 hod.
Aŭtamabili Iran Khodro Samand vyrablalisia ŭ Biełarusi z 2007 hoda. U 2007-m płanavali sabrać 6000 mašyn, a ŭ pierśpiektyvie — 50-60 tysiač mašyn u hod, ale niešta pajšło nie tak. Vytvorčaść była zhornutaja ŭ 2013 hodzie.
Kitaizacyja aŭtarynku praciahvajecca
Aproč hetaha namieśnik premjer-ministra Piatro Parchomčyk dniami zajaviŭ, što na zavodzie «Junisan» nieŭzabavie pačnuć vypuskać aŭtamabili jašče adnoj kitajskaj marki. Pa jahonych słovach, hetyja mašyny nie buduć pierasiakacca z pradukcyjaj «Biełdžy». Krasoviery novaj marki buduć bolš darahija.
Što heta budzie za brend — dakładna nie viadoma, ale žurnalisty vykazvajuć zdahadki, što heta moža być marka Hongqi. Zdahadki hruntujucca na tym, što ŭ kartežy Łukašenki ŭ Kitai byŭ limuzin hetaj marki, a sam Łukašenka tady pravioŭ pieramovy z kiraŭnictvam maciarynskaj kampanii FAW.
Za kolki pierapradajuć «błatnyja» aŭtamabilnyja numary? Ceny ŭražvajuć
Minskaja firma prapanuje mašyny ź Jeŭropy na zamovu pa nierealna nizkich cenach. U čym padvoch?
