Śviatłana Cichanoŭskaja padčas mitynhu ŭ Vilni, pryśviečanaha treciaj hadavinie prezidenckich vybaraŭ u Biełarusi. Fota: OSC

Śviatłana Cichanoŭskaja padčas mitynhu ŭ Vilni, pryśviečanaha treciaj hadavinie prezidenckich vybaraŭ u Biełarusi. Fota: OSC

«Biełarusy nikoli nie zabuduć toj dapamohi, jakuju akazała nam Litva paśla 2020 hoda. Litoŭskaja dziaržava i litoŭski narod padtrymali biełarusaŭ padčas masavych pratestaŭ i vyratavali tysiačy ludziej, jakija ŭciakali ad teroru, jakoha Biełaruś nie bačyła sa stalinskich časoŭ.

Siońnia Biełaruś pieražyvaje humanitarnuju i palityčnuju katastrofu. Pakul Pucin viadzie vajnu suprać Ukrainy, jaho maryjanietkavy režym u Minsku praciahvaje vajnu suprać biełaruskaha naroda. Režym Łukašenki pomścić biełarusam, jakija ŭ 2020-m vybrali svabodu i niezaležnaść. Bolš za 60 tysiač prajšli praz turmy. Ludziej u turmach katujuć i zabivajuć.

Navat ciapier štodnia zatrymlivajuć u siarednim 15—20 čałaviek: za pratest, nacyjanalnuju simvoliku, padtrymku Ukrainy, urešcie za biełaruskuju movu.

Jany źniščajuć nie tolki miedyja, hramadzianskuju supolnaść, ale i samu identyčnaść biełarusaŭ, sprabujučy zrabić nas častkaj «ruskaha śvietu». Jany razburajuć usio, što źviazvaje nas ź Jeŭropaj, uklučajučy našu movu, historyju, kulturu.

Ja viedaju, što litoŭcam nie treba tłumačyć, jak i dla čaho heta robicca — vy sami prajšli praz savieckuju akupacyju. Tolki našych sił siońnia niedastatkova, kab pieramahčy. Nam patrebnyja mocnyja sajuźniki.

I Litva pakazvaje pryncyp pryncypovaj i rašučaj pazicyi astatnim krainam Jeŭropy. Litva nie pajšła na ŭhodu z Łukašenkam, stała našym hołasam na mižnarodnaj arenie, a kali pačałasia vajna — adnadušna padtrymała Ukrainu.

Padtrymka Litvy i litoŭskaha naroda patrebnaja siońnia biełarusam jak nikoli, kab vyrvacca z kipciuroŭ rasijskaj tyranii. Siońnia režym Łukašenki pomścić Litvie za jaje paśladoŭnaść.

Mihracyjny kryzis, zakryćcio litoŭskich škoł, antylitoŭskaja prapahanda, hulnia z vahnieraŭcami — heta ŭsio pomsta za vašu pazicyju. Ale my nie pavinny dazvolić Pucinu i Łukašenku pasvaryć našy narody.

Treba dakładna razumieć: Łukašenka — heta nie Biełaruś. Nie biełarusy pahražajuć Litvie, a režym i jaho pamahatyja. I naša sumiesnaja zadača — ich spynić.

Tyja biełarusy, jakija pryjechali ŭ Litvu — bolš za ŭsio na śviecie chočuć viarnucca dadomu.

My cenim haścinnaść Litvy, ale my tut tolki časova. Biełarusy ŭ Litvie ŭ absalutnaj bolšaści ŭdzielničali ŭ pratestach abo padtrymlivali ich, padtrymlivajuć Ukrainu. Niesumnienna, režym pasprabuje zasyłać ahientaŭ i pravakataraŭ, ale my hatovyja ich vyjaŭlać. Im nie miesca ni ŭ Litvie, ni ŭ ES.

Apošnim časam u litoŭskich miedyja i internet-resursach abmiarkoŭvajuć zajavy nieviadomych pravakataraŭ, jakija svaimi zajavami prynižajuć Litvu i litoŭski narod.

Takija antylitoŭskija vykazvańni — marhinalnyja dla biełaruskaha hramadstva. Ja chaču padkreślić našu ahulnuju pazicyju: litoŭskaja terytoryja i dziaržava naležać narodu Litvy i bolš nikomu. Miežy nieparušnyja, chto kaža inakš — toj pravakatar, toj na baku ahresara. Biełarusy nie majuć i nikoli nie buduć mieć nijakich terytaryjalnych pretenzij da svaich susiedziaŭ. Dla nas vielič naroda — u pavazie, jakoj jon karystajecca ŭ śviecie, a ŭ pieršuju čarhu — z boku susiedziaŭ.

Ja pierakananaja, što i ŭ litoŭskich intaresach, kab susiedkaj Litvy była svabodnaja niezaležnaja i jeŭrapiejskaja Biełaruś, a nie bufiernaja zona Kramla. My budziem rabić usio, kab heta stała realnaściu.

I ja prašu vas praciahvać padtrymlivać naš narod u hetym imknieńni. Mianie turbuje dyskusija siarod palitykaŭ, ci treba ŭ adkaz na prysutnaść vahnieraŭcaŭ uzmacnić abmiežavańni i pryraŭniać biełarusaŭ da rasiejcaŭ.

Sapraŭdy, pahroza z boku režymu jość, ale mihracyjnyja abmiežavańni jaje nie vyrašać. Heta moža ŭ pieršuju čarhu ŭdaryć pa prademakratyčna nastrojenych biełarusaŭ. Taksama heta zhulaje na ruku Kramlu, jaki sprabuje ścierci roźnicu pamiž rasiejcami i biełarusami. Ale biełarusy — nie rasiejcy, a Biełaruś — nie Rasija. I nikoli joj nie stanie. Niahledziačy na ŭsie namahańni Pucina i Łukašenki, im nie ŭdałosia ŭciahnuć naš narod i vojska ŭ vajnu suprać Ukrainy. Sacyjałahičnyja daśledavańni śviedčać, što bolšaść biełarusaŭ nie padtrymlivajuć ahresiŭnuju palityku ŭzurpataraŭ.

U Biełarusi dziejničajuć rejkavyja partyzany i spyniajuć rasiejskija ešałony. Padpolščyki ŭ pačatku hoda padarvali darahi rasijski samalot. Sotni dobraachvotnikaŭ pajechali vajavać za Ukrainu. Toje, što niama masavych maršaŭ na vulicach — heta nie značyć, što niama pratestu. Ja ŭdziačnaja deputatam litoŭskaha Siejma, jakija viasnoj vyrašyli nie stavić znak roŭnaści pamiž biełarusami i rasiejcami. Heta byŭ vyrazny sihnał salidarnaści i padtrymki. Ja spadziajusia, što i ŭ novym zakonie nie dojdzie miesca dla šyrokich abmiežavańniaŭ suprać usich hramadzian Biełarusi.

Ja taksama spadziajusia na praciah palityki litoŭskaha ŭrada ŭ dačynieńni da Biełarusi: izalacyja režymu z adnaho boku, a z druhoha — padtrymki biełarusam, jakija zmahajucca za vyzvaleńnie svajoj krainy. Biełaruś projdzie toj šlach da svabody i niezaležnaści, jaki ŭžo prajšła Litva.

My adbudujem demakratyčnuju dziaržavu jeŭrapiejskaha ŭzoru. U novaj Biełarusi buduć pavažać pravy čałavieka, nacyjanalnych mienšaściaŭ, pavažać susiedziaŭ i niedatykalnaść dziaržaŭnych miežaŭ. (My rašuča vystupajem za terytaryjalnuju cełasnaść Ukrainy, jakuju ŭ 2014 hodzie parušyli rasijskija impieryjalisty). Biełaruś, jak ciapier Litva, stanie siabroŭskaj Jeŭrasajuza. Tolki sadružnaść u ES harantuje nam realnuju niezaležnaść i nie dazvolić Kramlu ŭziać revanš.

Tak, siońnia heta vyhladaje addalenaj metaj, ale my da jaje pryjdziem. I my spadziajemsia na padtrymku Litvy na hetym šlachu. Čym macniejšaje budzie naša biełaruska-litoŭskaje siabroŭstva, tym horšaje dla našaha ahulnaha voraha, jakim źjaŭlajecca rasiejski impieryjalizm.

U 1991 hodzie, kali litoŭcy vyjšli abaraniać svaju svabodu ad savieckich tankaŭ, siarod abaroncaŭ litoŭskaha parłamienta byli i biełarusy. Anałahična, u krytyčnyja momanty našaj historyi i my zaŭsiody adčuvali padtrymku litoŭcaŭ. Chaj tak heta i zastajecca».

Čytajcie taksama:

«Byŭ achoŭnikam». Historyi biełarusaŭ, pryznanych niebiaśpiečnymi dla Litvy

Za paŭhoda Litva vydała biełarusam amal 20 tysiač dazvołaŭ na žycharstva

«Nie pavinna być tak, što ŭ adzin dzień my zaprašajem, a ŭ druhi — departujem» — były premjer ab prablemie biełarusaŭ u Litvie

«Byŭ achoŭnikam». Historyi biełarusaŭ, pryznanych niebiaśpiečnymi dla Litvy

Premjerka Litvy: Jość niamała padstaŭ dla ŭnifikacyi abmiežavańniaŭ dla biełarusaŭ i rasijan

Cichanoŭskaja zaklikała prezidenta Litvy nie ŭraŭnoŭvać abmiežavańni suprać biełarusaŭ i rasijan

Клас
47
Панылы сорам
3
Ха-ха
5
Ого
2
Сумна
1
Абуральна
4