Arsienij Zdanievič. Fota: asabisty archiŭ surazmoŭcy
Tałaj, ściah, Kavalčuk
— Vy rana skončyli karjeru — u 22 hady.
— Historyja takaja. Majoj asnoŭnaj dystancyjaj byli 110 m z barjerami. Na apošnim čempijanacie Biełarusi, u 2018 hodzie, u finale bieh z traŭmaj. Zmahaŭsia za miesca ŭ nacyjanalnaj zbornaj. Finišavaŭ trecim siarod biełarusaŭ. Pa ŭsich pakazčykach prachodziŭ — u toj hod vyjhraŭ Univiersijadu, byŭ druhim u Kubku krainy. Ale ŭ nacyjanalnuju kamandu ŭ vyniku ŭziali čałavieka, jaki sastupaŭ mnie vynikami. Pačaŭ raźbiracca. Jak vyjaviłasia, u našaj lohkaj atletycy jość treniery z suviaziami. I jany mohuć prapchnuć u zbornuju svaich vučniaŭ. Vyrašyŭ, što niama sensu biehać dziela ŭmoŭnych 400 rubloŭ, i skončyŭ sa sportam.
— Chto vas tady treniravaŭ?
— Našaja viadomaja barjerystka Alina Tałaj. Jana tady časta vystupała za miažoj. I ŭstupacca za mianie ŭ Biełarusi ŭ jaje nie było času.
— Jak mahła treniravać dziejnaja spartoŭka?
— Pa dakumientach trenieram była maja pieršaja nastaŭnica — Halina Rabava. Ale faktyčna supracoŭničaŭ mienavita z Tałaj.
— Dzie jana ciapier, darečy?
— Dobraje pytańnie. Rychtavałasia da Alimpijady ŭ 2021-m, ale pieraškodziła traŭma. Z taho času pra Tałaj ničoha nie čuvać. Apošni raz razmaŭlaŭ ź joj dva hady tamu. Kali pačaŭsia ŭvieś hety skandał z Kryścinaj [Cimanoŭskaj] u Tokia, to mnie patelefanavała staršaja trenierka zbornaj pa spryncie, cikaviačysia, dzie ja, a potym Alina. Ja ŭžo byŭ tady ŭ Kijevie. Potym ź joj sprabavaŭ źviazacca, ale Tałaj nie adkazvała na paviedamleńni i nie padymała trubku. Choć my siabravali i razmaŭlali i pa-za sportam.
— Inšuju barjerystku, Elviru Hrabarenka (da zamužža — Hierman) niadaŭna raskrytykavała vašaja žonka.
— Tak, Elvira padpisała list za sumlennyja vybary, a ŭ kancy lipienia hetaha hoda na čempijanacie Biełarusi kleiła na numar čyrvona-zialony ściah, pryčym nakleiła jaho niapravilnym bokam. Hrabarenka była adnoj ź pieršych, chto prapanoŭvaŭ vystupić u 2020-m suprać biaźmiežža siłavikoŭ. Ale siońnia, mabyć, jaje ŭsio zadavalniaje.
— Čamu?
— Napeŭna, zrazumieła, što nikomu nie patrebnaja pa-za miežami krainy. A mianiać hramadzianstva — treba adbyvać karancin. Voś i vyrašyła, što budzie vystupać dalej u Biełarusi. Mahčyma, Minsportu taksama paŭpłyvała.
— U jakim płanie?
— Kali ja pracavaŭ u RCAP pa lohkaj atletycy, da nas nie raz u 2020-m pryjazdžaŭ ministr sportu i turyzmu Siarhiej Kavalčuk. Nu i pačynałasia: «Vy ničoha nie razumiejecie. Biełaruś — najlepšaja ŭ śviecie kraina». I ŭsio ŭ takim duchu — liŭ vadu ŭ vušy. Ja, naprykład, kazaŭ: «Pasłuchajcie, na maim učastku prahałasavała 200 čałaviek, a ŭ vynikovych pratakołach — 500. Jak takoje mahčyma?» Naturalna, Kavalčuk adrazu pieravodziŭ strełki. Jamu była patrebnaja poŭnaja łajalnaść spartoŭcaŭ. I kantrol, viadoma. Pierad Tokia spartoŭcaŭ litaralna zakryli na zborach u Stajkach, kab raptam nie skazali «kramoły» ŭ intervju.
Narkotyki, zdradnica, daroha
— Čym vy zajmalisia ŭ Biełarusi paśla zaviaršeńnia karjery?
— Pamianiaŭ niekalki prafiesij. Naprykład, byŭ asabistym kiroŭcam u kazino. I tam ža padpracoŭvaŭ achoŭnikam. Pratrymaŭsia niekalki miesiacaŭ — nahledzieŭsia ŭsiakaha, dy i načnyja źmieny źniasilvali. Hetaje kazino ŭ Minsku zakryłasia ŭ 2019-m, tak što lohka zdahadajeciesia pra nazvu. Uładalniki časam bavilisia narkotykami. Adnojčy kudyści jechali, i mužčynu tak «štyryła», što jon nie pierastavaŭ bić nahoj zadniaje siadzieńnie. Jašče spakojna pry mnie telefanavali pa hučnaj suviazi, abmiarkoŭvajučy, dzie i što možna kupić. Pa praviłach u nas zabirali asabistyja telefony na čas źmieny — mabyć, tamu kiraŭniki dumali, što nichto nie daznajecca padrabiaznaściaŭ.
Potym pastupiła prapanova papracavać instruktaram-mietadystam u RCAP pa lohkaj atletycy. Bolš zajmaŭsia afarmleńniem dakumientaŭ, ale i była mahčymaść dapamahać z treniroŭkami žoncy. Pravodzić raźminku, zasiakać čas. Praŭda, zarobku nie chapała — časam taksavaŭ. Paralelna chadziŭ na kursy masažu, fitnesu. U 2021-m paśpieŭ papracavać niekalki miesiacaŭ u trenažornaj zale.
— Tut i zdaryŭsia skandał ź Cimanoŭskaj u Tokia?
— Tak. Pryčym pieršapačatkova nie dumaŭ, što padymiecca bura. Kryścina aburyłasia, što jaje pastavili pierad faktam — biehčy estafietu 4×400 m. Dumaŭ, na nastupny dzień usie parazmaŭlajuć i supakojacca. Ale vyjšła inakš. Kali ŭbačyŭ pieradaču, dzie žonku nazvali zdradnicaj, zrazumieŭ, što ŭsio surjozna. Nastupnaj ranicaj patelefanavała Kryścina. Skazała, što jaje chočuć viarnuć u Biełaruś. Spytała, što rabić. Nie raiŭ joj viartacca, a to jašče «pryniali» b adrazu ŭ aeraporcie.
— Što było dalej?
— Patelefanavali z Fondu spartyŭnaj salidarnaści i skazali, što ŭ mianie jość čatyry hadziny, kab sabrać rečy i pakinuć Biełaruś. Pakidaŭ u sumku nieabchodnaje, ź ciažkaściu zabraŭ mašynu, jakaja była ŭ ramoncie, zapłaciŭ kuču hrošaj za strachoŭku i praz Rasiju pajechaŭ va Ukrainu. A adtul praz paru dzion skiravaŭsia ŭ Polšču. Nijakich pryhodaŭ, na ščaście, u darozie nie było.
— Vas ździviła situacyja ŭ pryncypie, što Cimanoŭskuju chacieli zajavić biehčy čužuju dla jaje dystancyju?
— Ździviła, što heta zdaryłasia na Alimpijadzie. A tak u našaj lohkaj atletycy byli ŭsiakija kasiaki. Naprykład, adnojčy, zdajecca, na kamandnym čempijanacie Jeŭropy siarod moładzi, dziaŭčynu zajavili nie skakać u vyšyniu, jak treba było b, a kidać mołat.
— Dy ładna!
— U vyniku spartoŭka kidała mołat.
Śpiecsłužby, baza, aŭto
— Vas jašče achoŭvajuć u Polščy?
— Nie. Pierastali prykładna ź listapada minułaha hoda. A spačatku tak, u polskaha boku byli aściarohi, što nas vykraduć śpiecsłužby. U asnoŭnym mianie i Kryścinu achoŭvali dva čałavieki. Plus kiroŭcy. Pieršyja dva miesiacy my naohuł praktyčna nie vychodzili z domu. U nas źjavilisia novyja telefony. Kamunikavać mahli tolki z baćkami i vielmi blizkimi siabrami. Kali nam pieradavali rečy ź Biełarusi, to ich staranna praviarali. Časam Kryścinie dazvalali treniravacca, ale nikoha nie musiła być u hety čas na stadyjonie — achova stajała pa ŭsim pierymietry. U kramu jeździli, i nas pastajanna supravadžali. Z časam jany zrazumieli, što ryzyki niama, i my ŭzdychnuli značna valniej.
— Incydentaŭ nie było?
— Nie. Ale adnojčy zdałosia, što za nami sočać. Tak supadała, što kali my pačynali razmaŭlać pa telefonie, to mužčyny ŭ domie nasuprać nadziavali navušniki i padychodzili da kampjutaraŭ. Niby viali prasłuchoŭku. My pačali niervavacca, patelefanavali achovie. Tyja panazirali, u tym liku z našaha doma, bo prosta tak zajści ŭ čužuju kvateru ŭ Polščy nielha. Kali ich prabili pa bazie, to vyśvietliłasia, što heta biaskryŭdnyja zamiežniki. Karaciej, prosta dziŭnyja ludzi, jakija pra nas i nie viedali.
Arsienij Zdanievič. Fota z akaŭnta surazmoŭcy ŭ Instagram
— Jak da vas i Kryściny staviacca palaki? Letaś u vas byŭ kanflikt u Zakapane, kali daviałosia vyklikać palicyju praz šumnyja pavodziny miascovych napadpitku.
— Bolšaść — z razumieńniem. Jany ŭ kursie prablem biełarusaŭ i dapamahajuć ukraincam. Ale jość tyja, kamu nie padabajecca, što ŭ krainie šmat uciekačoŭ. Pryčym u hetym časam vinavatyja sami ŭkraincy. Byli vypadki, kali jany krali rečy palakaŭ, karystajučysia dabrynioj i vietlivaściu.
— Raskažycie, jak pačali raźvivać ź Jaŭhienam Curkinym biznes, źviazany z kuplaj bitych aŭtamabilaŭ.
— Znajomy z Ženiem kala hoda. Pieršym časam u nas nie było hrandyjoznych idej. Ja pracavaŭ spačatku ź inšym biełarusam — pierahaniali mašyny z ZŠA. Ale mnie nie padabaŭsia jahony padychod da spravy. Vyrašyŭ, što budu ŭsim zajmacca sam. A potym daviedaŭsia, što Ženiu cikavić hetaja tema. I stali pracavać razam. Prajšli navučańnie. Ciapier užo ŭsio naładžanaje: padbirajem aŭto pad zakaz — i dastaŭlajem klijentam. Partnior bolš zajmajecca rekłamaj, adkazvaje klijentam, a ja znachodžu mašyny i praličvaju ceny. Časam jon biare na siabie častku maich abaviazkaŭ. U płanach jašče zaniacca arendaj premijalnych aŭtamabilaŭ i adkryć detejlinh — kompleksny dohlad.
Padarunki, adzieńnie, błohier
— Na hadavinu viasiella miesiac tamu vy prezientavali žoncy niatannuju Audi.
— Tak supała, što Kryścina chacieła hety aŭtamabil, kab jeździć na treniroŭki i pa svaich spravach. Spačatku dumaŭ znajści mašynu ŭ ZŠA, ale padviarnuŭsia dobry varyjant z novaj Audi. Vyrašyŭ nie skupicca.
— A žonka vam časta niešta doryć?
— Pamiatnyja daty, niejkija śviaty jana, viadoma, nie zabyvaje. Na apošniuju hadavinu viasiella, naprykład, padaryła darahi hadzińnik.
— Pa-raniejšamu marycie pra ŭłasny fitnes-kłub?
— Na hetym etapie cikaviejšaje toje, što źviazana z aŭto. Jany zaŭsiody buduć karystacca popytam. A ŭ dobry fitnes-kłub u Polščy, pavodle maich padlikaŭ, treba ŭkłaści nie mienš za paŭmiljona dalaraŭ. Pakul hetaja suma, miakka kažučy, niepadjomnaja.
— Jak vyjšła, što vy z žonkaj stracili vosiem tysiač dalaraŭ na brendzie adzieńnia, jaki maryła raskrucić Cimanoŭskaja?
— Zvyčajna my z Kryścinaj raimsia pierad pryniaćciem rašeńnia. U toj situacyi apošniaje słova było za mnoj. Da apošniaha sumniavaŭsia, ci varta ŭ heta ŭviazvacca. Maniera kamunikacyi ludziej, jakija zajmalisia vytvorčaściu adzieńnia, nie spadabałasia. Ale jany abiacali, što chutka vyjdziem u plus. Napirali na svoj dośvied u hetaj śfiery. U vyniku jany nas padviali: i z cenami byŭ pralik, i raskrutki brakavała, i nie ŭvieś tavar, što płanavali, pradavaŭsia ŭ kramie. Zrešty, užo pozna škadavać. Zatoje pasprabavali i atrymali darahi dośvied.
— Kryścina časam vynosić na publiku padrabiaznaści vašaha asabistaha žyćcia — tyja ž svarki. Vam heta padabajecca?
— Paru razoŭ ździŭlaŭsia. Pytaŭ: navošta ty heta napisała? «Ja błohier», — tak tłumačyła (śmiajecca). Nie lezu ŭ jaje prajekty. Ale, zdajecca, ničoha surjoznaha Kryścina ciapier nie raskryvaje starońnim.
Bałans, svarki, biznes-žyłka
— Vy ŭ šlubie ŭžo šeść hadoŭ. Jaki charaktar u žonki?
— Bajavy. A ŭ mianie miakčejšy, možna skazać. Atrymlivajecca narmalny bałans. Dva čałavieki z bajavym charaktaram — heta było b zanadta.
— Kryścina pisała, što za dva hady žyćcia ŭ Polščy vy trojčy rasstavalisia, ale ŭsio roŭna sychodzilisia.
— Tak, praz svarku mahli nie kantaktavać tydzień-dva. Pra pryčyny nie chacieŭ by kazać — heta asabistaje. U niekatorych momantach ja niapravilna rabiŭ, u niekatorych — jana. Adno na adno i nakładvałasia. Ale potym astyvali i razumieli, što rodnić nas značna bolš. Užo dziesiać hadoŭ razam, kali ličyć z momantu znajomstva.
Arsienij Zdanievič i Kryścina Cimanoŭskaja. Fota: akaŭnt u Instagram Cimanoŭskaj
— U Biełarusi taksama svarylisia?
— Tak, usiakaje byvała. Miesca žycharstva tut nie hraje roli. Hałoŭnaje — žadańnie sumiesnymi namahańniami załahodzić roznahałośsi.
— Što vas abjadnoŭvaje z žonkaj?
— Pa-pieršaje, nie zacyklenyja na sporcie. U nas šmat roznych prajektaŭ, idej. Biznes-žyłka. Pa-druhoje, pieražyli šerah momantaŭ, jakija nie złamali našych adnosin. Kali ŭsia hetaja situacyja z Kryścinaj zdaryłasia ŭ Tokia, a ja byŭ u Kijevie, to ŭ adzin momant jana naohuł nie vychodziła na suviaź. Stali pisać, što jana lacić u Aŭstryju, a nie ŭ Polšču. Dumaŭ, što ŭžo nie ŭbaču žonki. Ale prajšli i toje vyprabavańnie. Svarki svarkami, ale zvyčajna dobra ładzim.
Ananimy, Azaronak, finał
— Jašče sustrakajecie abrazy na adras Kryściny ŭ sacsietkach?
— Apošnim časam niehatyvu stała mienš. Raniej niaredka byvała, što jaje abvinavačvali ŭ zdradzie. Pamiataju, pisali i mnie. Maŭlaŭ, kudy ty pajechaŭ, navošta. Nie razumieli nibyta, što Kryścina — maja žonka, i ja mušu być pobač ź joj. Asabliva ŭ ciažkaj situacyi. Pisali zvyčajna ananimy. Prapahandysty jašče aktyŭna vykazvalisia — naprykład, Azaronak. Ale kali Kryścina prapanavała jamu debaty ŭ žyvym efiry, to admoviŭsia. Maŭlaŭ, niama kali. Prosta źliŭsia.
— Vas kali-niebudź kranała, što ŭ žonki karjera bolš paśpiachovaja?
— Zusim nie. U mianie była inšaja dyscyplina, inšyja supierniki. Viadoma, usie chočuć trapić na Alimpijadu, ale ja adekvatna aceńvaŭ svoj uzrovień. Z tym ža Vitalom Parachońkam, za jakim zaŭsiody ciahnuŭsia na svajoj dystancyi, dobra kamunikavali. Nijakaj zajzdraści. Nie vyjšła ŭ samoha — heta nie padstava złaradničać. Tak što tolki rady pośpiecham Kryściny.
— Razumieju, što krychu hipatetyčnaje pytańnie. Ale jaki jaje patencyjał?
— Upeŭnieny, što jana moža biehčy na Alimpijadzie ŭ finale na 200 mietraŭ. Na stamietroŭcy składaniej. U cełym u jaje dobraja dynamika vynikaŭ paśla pierajezdu ŭ Polšču. Pahladzim, jak budzie na mižnarodnych turnirach. Kryścinie padabajecca pracavać z polskim trenieram. Zusim inšy padychod i staŭleńnie da spartoŭcaŭ. Nahruzki dajucca z ulikam asablivaściaŭ arhanizma, słabych miescaŭ. A ŭ Biełarusi pracujuć jašče pa mietadyčkach 1990-ch hadoŭ i prymianiajuć nakatanuju schiemu da ŭsich zapar.
Čytajcie taksama:
Kryścinie Cimanoŭskaj dazvolili vystupać za Polšču
Cimanoŭskaja vyjhrała srebra na čempijanacie Polščy ŭ biehu na 200 mietraŭ
uhu. jano i bačna
dalej nie čytało
dy j da hetaha momantu pračytało, tolki, kab upeŭnicca
čarhovy raz...