Historyja 1. «Nieviadoma, dajšli choć niejkija maje danaty va Ukrainu ci ja achviaravała hrošy miascovym bankam»

«Ja žyvu ŭ Polščy z 2021 hoda, u lutym 2023-ha atrymała humanitarny dazvoł na žycharstva. Z pačatkam vajny ja aktyŭna danaciła hrošy va Ukrainu na samyja roznyja dabračynnyja mety. Hrošy z kartki śpisvalisia, tamu ja była ŭpeŭnienaja, što ŭsio jak maje być.

Sioleta ŭ červieni ja pieraviała $80 sa svajoj polskaj karty va ŭkrainski fond dapamohi, dzie pracujuć maje znajomyja. Tak i daviedałasia ad ich, što hrošy nie pryjšli. Jany, sa svajho boku, vyrašyli vyśvietlić u Pryvatbanka, što zdaryłasia. Bank, spasyłajučysia na dakumient Nacbanka, paviedamiŭ, što nie prymaje pieravodaŭ

— u biełaruskich i rasijskich rublach;

— ad ludziej i kampanij, jakija zarehistravanyja / pastajanna pražyvajuć u Rasii abo Biełarusi.

U maim adrasie pražyvańnia ŭ polskim PKO Bank dahetul paznačany biełaruski adras, jaki adlustroŭvajecca pry pieravodzie hrošaj. Tady my razam vyrašyli dasłać fota majoj karty pobytu i dadatkovuju damovu z fondam pra toje, što ja sapraŭdy akazvaju dabračynnuju dapamohu.

Mnie taksama paraili paznačyć polski adras rehistracyi. Ale ŭ aplikacyi hetaha zrabić nielha, a ŭ adździaleńni PKO mnie ŭ prośbie admovili (pryčym davoli hruba): «A što vy chacieli, suprać Biełarusi ŭviedzieny sankcyi. Pakul adras my vam mianiać nie možam. Voś kali atrymajecie stały pobyt, tady i prychodźcie!»

Pry hetym ja danaciła na numar rachunku ŭ aplikacyi PKO, a moj muž danaciŭ u toj ža fond praz sajt fondu — jaho hrošy pryjšli. Vyjaviłasia, jon adpraŭlaŭ ich nie va ŭkrainski bank, a ŭ polski (na sajcie taksama jość polski rachunak, adtul vałanciory potym vyvodziać hrošy va Ukrainu).

U vyniku mnie ničoha nie dapamahło. Bank abiacaŭ viarnuć mnie hrošy, ale praz dva miesiacy ničoha nie adbyłosia. I ja navat nie viedaju: ci dajšli choć niejkija maje danaty va Ukrainu, ci ŭsie paŭtara hoda ja achviaravała hrošy miascovym bankam, bo ŭsie jany karystajucca toj samaj pastanovaj Nacbanka.

Na moj pohlad, heta niejkaja dzikaść: bank navat svaim ža ŭkrainskim fondam nie addaje hrošy padčas vajny! I pry hetym nichto — ni adpraŭnik, ni atrymalnik — moža nie viedać pra heta. Ščyra kažučy, u mianie niama ŭpeŭnienaści, što hrošy «zamarožanyja» i atrymajuć choć niejki ruch u dalejšym. Pakul heta vyhladaje jak kanfiskacyja».

Historyja 2. «Ja źmianiŭ adras na polski, ale hrošy pa-raniejšamu zabłakavanyja»

«Paŭhoda tamu ja pieravodziŭ hrošy z banka «Milenium» va ŭkrainski bank. Heta byŭ zvyčajny pryvatny hrašovy pieravod na 50 jeŭra z rachunku ŭ jeŭra na pryvatny rachunak siabra va ŭkrainskim banku. I tolki tamu, što heta byŭ moj znajomy, ja daviedaŭsia, što hrošy jamu nie pryjšli.

Vyjaviłasia, što reč u adrasie rehistracyi. Ja adkryvaŭ rachunak jašče da pierajezdu ŭ Polšču kala 10 hadoŭ tamu, tamu tam byŭ paznačany moj adras u Biełarusi. Ja na heta nikoli nie źviartaŭ uvahi, bo maju časovy pobyt i adras dla karespandencyi tam zaŭsiody byŭ paznačany polski.

Ja zmoh źmianić adras na polski praz bank, ale pa sutnaści heta ničoha nie źmianiła — hrošy pa-raniejšamu zabłakavanyja. Kali ja dasłaŭ usie papiery va ŭkrainski bank, hetaha było niedastatkova — mnie paraili jašče pajści ŭ polski bank i źmianić danyja ŭ tranśfiery, ale pakul času nie było na heta. 

Taksama ja staŭ dumać pra toje, dzie ciapier usie maje danaty, bo atrymlivajecca vielmi cikavaja reč. Usie tyja, chto pieraličvaŭ svaje hrošy na dobryja spravy Ukrainie padčas vajny, ale žyvie ŭ inšych krainach i maje paznačany ŭ banku biełaruski abo rasijski adras rehistracyi, nasamreč pieraličvali ich nie ŭ fondy, a banku, a da adrasata jany nie dachodzili. Bo kali ty robiš danaty, daviedacca, ci dajšli jany, ty nie možaš».

Клас
0
Панылы сорам
15
Ха-ха
3
Ого
4
Сумна
2
Абуральна
24