«Lacieć treba da maja abo ŭ kancy vieraśnia»
«Limasoł — heta ajcišny horad, tamu biudžetny adpačynak tut nijak nie atrymajecca, lepš razhladać inšyja harady, — raskazvaje Alona. — Ceny značna nižejšyja, u tym liku na žyllo, buduć u Pafasie i Łarnaku. U turystyčnaj Aja Napie ŭžo budzie daražej, ale nie tak doraha, jak u Limasole.
A pačynać treba z kvitkoŭ na samalot. Kali jość šenhien, tańniej spačatku dabracca na aŭtobusie ź Biełarusi ŭ Šenhien-zonu. Na aŭtobusie Ecolines dajechać možna za 100 rubloŭ. Dobry varyjant palacieć na Kipr — heta kupić kvitok z bahažom ad 70 da 100 jeŭra. Za hetyja hrošy možna palacieć kampanijami Ryanair abo Wizz Aih, u zaležnaści ad krainy vyletu.
«Na Kipry vielmi šmat pryhožych miescaŭ, kudy zachočacca źjeździć»
Lacieć treba da maja, ale moža być jašče chałodnym mora, ci — jašče lepš — u kancy vieraśnia. U kastryčniku jašče ciopła, možna zahareć i pakupacca, nie budzie vialikaj płyni turystaŭ.
Kali brać tolki zaplečnik i padarožničać biez bahažu, to ź Jeŭropy ŭ hety čas možna palacieć za 50 jeŭra. Kali niama šenhiena, jość dva varyjanty — praz Hruziju ci Armieniju, druhi vyjdzie tańniej. Da Jerevana letam samalotam «Biełavija» možna palacieć za 130 dalaraŭ. Ź Jerevana bilet budzie kaštavać 50 jeŭra, kali lacieć ulehcy. Kali z čamadanam — to 80-90 jeŭra.
Treba źviartać uvahu na dni tydnia, samyja pryvabnyja ceny na kvitki — u aŭtorak. A kali ŭklučyć VPN, atrymajecca jašče tańniej, nie bolš za 200 jeŭra ŭ adzin bok».
«Siaredniaja cana za arendu mašyny — 50 jeŭra ŭ dzień»
U hatelach žyć budzie doraha, kaža Alona. Možna pasprabavać źniać žyllo ŭ jakoj-niebudź viosačcy abo na airbnb. Abo ŭ sacyjalnych sietkach pašukać ludziej, jakija žyvuć na Kipry, ale źbirajucca kudyści ŭ adpačynak. Znajomyja Alony, jakija źjazdžajuć dadomu na niekalki tydniaŭ ci na miesiac, zdajuć svaju kvateru za simvaličnuju płatu.
Hramadski transpart u Limasole kaštuje 1,5 jeŭra. Ale pažadana źniać mašynu. U siezon mašyny kaštujuć dosyć doraha, letam siaredniaja cana 50 jeŭra ŭ dzień. Možna damovicca z uładalnikam na źnižku, i zapłacić za 10 dzion nie 500, a 400 jeŭra.
Uvohule, možna mašynu za 400 jeŭra źniać i na miesiac, pa fakcie paśla 10 dzion adna i taja ž cana. Karšerynh abydziecca tańniej, ale nielha budzie jeździć pamiž haradami.
Mašyna patrebna, pa-pieršaje, tamu, što na Kipry vielmi šmat pryhožych miescaŭ, kudy zachočacca źjeździć. Pa-druhoje, heta daje mahčymaść žyć dalej ad horada i aščadzić. Tym bolš, što ciapier źniać žyllo ŭ Limasole za adekvatnyja hrošy praktyčna nierealna.
Samaja prostaja kvatera, jeŭraadnuška ŭ starym domie, kaštuje 1000 jeŭra ŭ miesiac, kali zdymać na doŭhi termin. Jašče 100 jeŭra treba zapłacić za vadu i elektryčnaść. Ludzi z dobrymi zarobkami razhladajuć kvatery minimum ad 2000 jeŭra i vyšej, dzie jość basiejn, łaźnievy kompleks i parkoŭka», — raspaviadaje Alona.
«Biełaruski lon lepšy pa jakaści, čym kiprski»
Za dva tydni na Kipry možna pahladzieć usio, upeŭnienaja Alona, i jość mahčymaść raźmiežavać adpačynak:
«Pabyvać i na paŭdniovym Kipry, i na tureckaj jaho častcy, paŭnočnym. Kab źjeździć na tureckuju častku, treba abaviazkova mieć šenhien, kab puścili nazad. Patrebnaja i strachoŭka na mašynu, kaštuje prykładna 15-20 jeŭra, u zaležnaści ad času arendy.
U paŭnočnaj častcy ceny značna nižejšyja, žyllo možna źniać u try razy tańniej, čym u Limasole. Infrastruktury tolki praktyčna nijakaj. Kali kažuć, što Kipr — vioska, to tam vioska-vioska.
«Kiprskija harady, kaža Alona, možna padzialić pa nastroi»
Varta pabyvać u maleńkich viosačkach, jakija vielmi papularnyja siarod turystaŭ. Jany staryja, kazačnyja, u kožnaj zachavany svoj ułasny styl. Prachodziačy mima voknaŭ, možna ŭbačyć, jak raśpisvajuć talerki, lepiać z hliny abo robiać jašče niešta inšaje. U adnoj vioscy možna kupić srebra, u inšaj — lon. Naš biełaruski lon, darečy, lepšy pa jakaści, čym kiprski.
Dla amataraŭ vodnych vidaŭ sportu jość dzie razharnucca. Mabyć, na Kipry pradstaŭlenyja praktyčna ŭsie jany: viejkbord, viejksierf, kajtynh.
Na roznych terytoryjach vostrava vada adroźnivajecca pa kolery. U Aja Napie, naprykład, jana nievierahodna biruzovaja.
Plažy jość biaspłatnyja, dzie možna lažać na svaim ručniku. Kali chočaš bolš kamfortnych umoŭ, treba zapłacić 2 jeŭra za šezłonh i 3 za parason. Jość vielmi pryhožyja plažy ź biełymi kamianiami, uvachod kaštuje 5 jeŭra. Na hetyja 5 jeŭra ty maješ prava zamović niešta ź ježy abo napojaŭ.
«Limasoł užo dahaniaje Dubaj»
Ceny na pradukty ŭ kramach, adznačaje Alena, padobnyja da biełaruskich:
«U kaviarniach charčavacca pa našych mierkach doraha. Sałata ŭ dobrym restaranie kaštuje ad 9 jeŭra. Vielmi papularnyja va ŭstanovach tak zvanyja miezie, rybnaje abo miasnoje. Tudy, akramia bulby fry, sałaty, namazki nakštałt chumusu i smačnych aładak, uvachodzić štuk z šeść najmieńniaŭ čahości miasnoha abo rybnaha. Naprykład, šašłyk śviny i kuryny, kaŭbaski śvinyja i jałavičyna, katletki, baranina ŭ zbanku, hrudzinka hryl. Strava kaštuje 50 jeŭra, jaje zvyčajna zakazvajuć na 3-4 čałavieki».
Kiprskija harady, kaža Alona, možna padzialić pa nastroi:
«Aja Napa — turystyčny, kłubny varyjant, tusovačny. U Pafasie bolš ceniać cišyniu i spakoj, jon dobry dla žyćcia abo dla dač, mnohija tak i robiać, žyvuć tam, a pracavać jeduć u bujny horad, Limasoł albo Łarnaku.
Łarnaka — heta jak druhi Limasoł, tam taksama ŭžo chapaje ajcišnych kampanij. Jana dzieści pamiž Pafasam i Limasołam, tam možna źniać žyllo pa adekvatnaj canie i atrymać infrastrukturu.
Kažuć, što Limasoł užo dahaniaje Dubaj. Budaŭnictva tut jašče nie takoje krutoje, ale ŭžo jość vyšynnyja damy, u adroźnieńnie ad inšych bujnych haradoŭ. 80% ajcišnych kampanij znachodzicca mienavita ŭ Limasole, tamu tut vielmi darahaja nieruchomaść, jak i arenda.
Ad statusu horada zaležyć i pamier zarobkaŭ. U Limasole jany samyja vysokija, potym iduć Łarnaka, Pafas i Nikasija. Biełarusam, jakija pryjechali siudy žyć i pracavać, kampanija dla lehalizacyi pavinna płacić zarobak minimum 2500 da vyličvańnia padatkaŭ. Padatki składajuć 280-300 jeŭra ad hetaj sumy. Dla kamfortnaha žyćcia treba zarablać 2000-3000 u miesiac.
Adpačyć na Kipry tanna nie atrymajecca. Ale vydatna aščadzić možna, kali zrabić usio słušna: pajechać u patrebny pieryjad, kab kvitki byli tańniejšyja; źniać pakoj albo papytać u znajomych kvateru nie daražej za 300 jeŭra; znajści ludziej u čatach, kab ź imi ŭ składčynu jeździć na ekskursii, samastojna hatavać i h.d. Na dva tydni całkam chopić tysiačy jeŭra. U hetuju sumu ja zaŭsiody ŭkładajusia».
Čytajcie taksama:
Kab vandroŭka nie pieratvaryłasia ŭ svarki: jak pavodzić siabie, kali padarožničaješ u kampanii
