Skrynšoty z tyktoku
Kantent, stvorany ŭ styli hopecore, abaviazkova niasie stanoŭčuju enierhietyku. Dla takich vobrazaŭ charakternyja letuciennaść i estetyčnaść, jany ŭsialajuć nadzieju i pazityŭ. Prykład hopecore — pryhožyja fotazdymki žyvioł ź miłymi podpisami, dušeŭnyja pramovy znakamitaściaŭ abo natchnialnyja kadry sa spartovych spabornictvaŭ. Na siońnia roliki z chešteham #hopecore majuć u tyktoku šalonyja 850 miljonaŭ prahladaŭ — ci heta nie prykmieta taho, što śvietu sapraŭdy patrebnaja nadzieja?
Hopecore, viadoma ž, nie novaja źjava. Takija tendencyi naradžalisia ŭ siecivie i raniej i mieli bahata roznych nazvaŭ: zhadajem, naprykład, fiłasofiju aptymistyčnaha nihilizmu ci pryncyp niazłomnaści čałaviečaha duchu (adpaviednyja videa publikavalisia pad chešteham #indomitablespirit). Usie hetyja idei mieli ŭ sabie ahulnuju rysu — śviadomaje žadańnie pakłapacicca ŭ nieščaślivyja časy pra navakolnych.
Niekatoryja z prykładaŭ novaha trendu: pramovy łaŭreataŭ premii «Oskar» Choli Bery ci Lupity Ńjonha, a taksama kranalnyja vystupy palityčnych i hramadskich dziejačaŭ nakštałt pakistanki Małały Jusafzaj ci brytanki Emy Uotsan. Niekalki miesiacaŭ tamu duža papularnymi stali pramovy akcioraŭ Mišel Jea i Kie Chiui Kuana z askaranosnaj stužki «Usio paŭsiul i adrazu», i heta taksama hopecore.
Hety styl nabyŭ vialikuju papularnaść jašče i praz toje, što taki kantent zdolny vyklikać pačućcio nastalhii ci tuhi. Kadry sa staroj kamiedyi z Robinam Uiljamsam ci ź lubimaha multfilma — usio heta nahadvaje nam pra raniejšyja časy, kali žyćcio było mienš składanym, mahčyma, pra malenstva. U hetym sensie hopecore jość supraćjadździem inšamu padychodu da anłajnavaha žyćcia — tak zvanamu dumskrolinhu, kali čałaviek marnuje šmat času na pahłynańnie drennych navinaŭ anłajn.
Šmat kamu kantent u styli hopecore dapamahaje kłapacicca pra siabie, maŭlaŭ, chočaš chutka ŭźniać nastroj — pahladzi zabaŭnaje videa z kotkaj ci ź niemaŭlom. Kali chočacie raspaŭsiudžvać pazityŭ i natchniać inšych, hopecore — toje, što vam treba.
Biełarusy pakul nie nadta aktyŭna vykarystoŭvajuć novy chešteh, ale ž i jany zdymajuć videa, napoŭnienyja nadziejaj. Voś, naprykład, rolik pra toje, jak hłuchata nie pieraškodziła dvaim maładzionam abmianiacca vitańniami:
A heta — kranalnaja narezka z pryhožych fota biełaruskich haradoŭ:
Što moža abnadziejvać bolš, čym biełaruskaja mova?
Tut znakamityja, ź dziacinstva viadomyja vieršy biełaruskich kłasikaŭ:
Jašče adzin prykład paetyčnaha hopecore pa-biełarusku:
Isnujuć i filmy, jakija možna pryličyć da hopecore. Karystalniki resursu Reddit nazvali takimi, naprykład, stužki «Ucioki z Šaŭšenka» (Shawshank Redemption»), «Forest Hamp» (Forrest Gump), «Interstełar» («Interstellar»), «Tam, dzie raki śpiavajuć» («Where the Crawdads Sing»).
Kali vy bolš lubicie sieryjały, źviarnicie ŭvahu na kamiedyjnaje šou «U najlepšym śviecie» (The Good Place) pra žančynu, jakaja pamyłkova traplaje ŭ raj. Ci na znakamity «Chod karalevy» («The Queen's Gambit») — historyju pra toje, jak dziaŭčyna-vunderkind z prytułku dla sirotaŭ sprabuje prabicca ŭ šachmatnym śviecie.
Narešcie, adznačym «Dziacinstva Šełdana» (Young Sheldon) — historyju pra malenstva hienijalnaha, ale składanaha ŭ kamunikacyi chłopčyka, jakoje pryjšłosia na kaniec 80-ch — pačatak 90-ch. Hety sieryjał dakładna pahruzić vas u nastalhiju, a što jašče treba ad hopecore?
Zastałosia razabracca, čamu hety trend i rodnasnyja ź im tendencyi ŭźlacieli ŭ siecivie jakraz ciapier. I adkaz na heta prosty: imavierna, va ŭmovach biaskoncych łakdaŭnaŭ i abmiežavańniaŭ apošnich hadoŭ dla zachodniaj aŭdytoryi stała važna stvarać kantent, jaki zbližaje i padtrymlivaje, a nie raźjadnoŭvaje. Biełarusam varta ŭziać heta na ŭzbrajeńnie.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Palešuki stali Chobsami». Jak biełarusy adsyłajuć svajo DNK u Amieryku i šukajuć prodkaŭ pa testach
