Fota: BNTU
Jak paviedamiŭ Reform.by, na nastupnym tydni Uładzimir Prakapcoŭ budzie dapracoŭvać svaje apošnija dni na pasadzie dyrektara. «Naša Niva» sa svaich krynic taksama atrymała infarmacyju, što dyrektaru nie źbirajucca praciahvać kantrakt.
Farmalna jamu nie praciahvajuć kantrakt paśla 25 hadoŭ kiravańnia muziejem praz uzrost: u žniŭni Uładzimir Prakapcoŭ budzie adznačać svoj 70-hadovy jubilej.
Ale, jak abmiarkoŭvajuć u muziejnych kołach, źniaćcie z pasady dyrektara muzieja moža być źviazana z daŭnim paklopam prapahandystaŭ na muziejnikaŭ.
U kancy 2022 hoda, dzień u dzień z adkryćciom novaha korpusa muzieja, prapahandysty stali palivać supracoŭnikaŭ brudam i vinavacić u karupcyi. Začapilisia za toje, što ŭ 2021 hodzie muziej kupiŭ u mastaka Uładzimira Carykoviča, muža mastactvaznaŭcy Kaciaryny Izafatavaj, karcinu «Kryk». Pry hetym karcinu kuplali pa ŭsich praviłach. Sapraŭdnaj pryčynaj napadak možna ličyć niedastatkovuju łajalnaść da ŭłady, bo ŭ kanale prapahandy vystavili fota častki kalektyvu, jakaja vyjšła suprać hvałtu na prystupki muzieja ŭ 2020-m, a taksama skrynšoty peŭnych publikacyj u sacsietkach.
Paśla hetaha z muzieja zvolnili 11 čałaviek (pa ŭdakładnienych danych), jakija prysutničali na zdymku, apublikavanym na prapahandysckim kanale. Prakapcoŭ nie zmoh ich adstajać. Siarod zvolnienych byli namieśnica dyrektara pa navukovaj i aśvietnickaj pracy Śviatłana Aniejka, kiraŭnica adździeła biełaruskaha mastactva XX — XXI stahodździaŭ Kaciaryna Izafatava, namieśnik dyrektara pa ahulnych pytańniach i restaŭracyi Siarhiej Viečar.
Raniej, u 2020-m hodzie, Prakapcoŭ sprabavaŭ zamiać situacyju ź dziorzkim vieršam viadomaha mastactvaznaŭca Mikity Moniča, paśla čaho toj vyrašyŭ za lepšaje zvolnicca z muzieja. Paźniej z muzieja zvolnili i jaho maci.
«Zrabiŭ šmat pamyłak i kryŭdaŭ supracoŭnikam, ale, napeŭna, bolš — dabra», — takuju charaktarystyku dajuć dyrektaru, adznačajučy, što jon namahaŭsia zachavać muziej i abaranić svoj kalektyŭ, čaho jamu, vidać, urešcie nie daravali.
Uładzimir Prakapcoŭ naradziŭsia ŭ 1953 hodzie na Paleśsi, u vioscy Žhuna-Buda. Jaho rodny Dobrušski rajon znachodzicca na miažy z Rasijaj i Ukrainaj. Skončyŭ u 1975 hodzie mastacka-hrafičny fakultet Viciebskaha dziaržaŭnaha piedahahičnaha instytuta imia S. M. Kirava, paźniej — aśpiranturu pry Instytucie mastactvaznaŭstva, etnahrafii i falkłoru Akademii navuk BSSR, atrymaŭšy ŭ 1984 hodzie akademičnuju stupień kandydata mastactvaznaŭstva.
Uładzimir Prakapcoŭ pravodzić u 2010 hodzie ekskursiju pa muziei tahačasnamu ministru kultury Paŭłu Łatušku i Alaksandru Łukašenku. Fota: BiełTA
Z 20 sakavika 1998 hoda niaźmienna zajmaŭ pasadu hienieralnaha dyrektara Nacyjanalnaha mastackaha muzieja, źmianiŭšy na joj pamierłaha ŭletku 1997 hoda Juryja Karačuna. Jak pryznavaŭsia sam Prakapcoŭ, jon trojčy admaŭlaŭsia ad adkaznaj pasady, tamu što da taho nie mieŭ anijakaha dośviedu ŭ muziejnaj spravie.
Novy korpus muziejnaha kvartała, adkryty ŭ kancy 2021 hoda. Fota: BiełTA
Tym nie mienš, na dumku śpiecyjalistaŭ, jakija dobra viedali Prakapcova, jon sapraŭdy hareŭ muziejem. Jamu stavicca ŭ zasłuhu pašyreńnie muzieja praz budaŭnictva novych karpusoŭ i stvareńnie muziejnaha kvartała, jakoje raściahnułasia na dziesiacihodździ. Pieršy novy korpus, za hałoŭnym budynkam muzieja, byŭ adčynieny jašče ŭ 2007 hodzie, nastupny krok da stvareńnia muziejnaha kvartała byŭ zrobleny ŭ kancy 2021 hoda, kali byŭ adčynieny vystavačny korpus pa vulicy Karła Marksa, 25, a ŭ domie pa vulicy Kirava, 25 raźmiaścilisia restaŭracyjnyja majsterni, navukovaja biblijateka i fondaschovišča.
Płanavałasia taksama rekanstrukcyja histaryčnaha korpusa muzieja i budynka jahonaj dyrekcyi (raniej tut raźmiaščaŭsia instytut «Biełpramprajekt»), raźmieščanych pa vulicy Lenina.
Uładzimir Prakapcoŭ ź ministram kultury Markievičam i supracoŭnikami muzieja na adkryćci novaha korpusa pa vulicy Karła Marksa ŭ śniežni 2021 hoda. Niekatorych supracoŭnikaŭ muzieja za miesiac da taho prapahandysty zaklikali «vykarčoŭvać». Fota: BiełTA
Nieviadoma, što zaraz čakaje centr mastackaha žyćcia krainy. Miarkujučy pa ŭsim, možna čakać pryznačeńnia na pasadu dyrektara kaho-niebudź kštałtu adyjoznaha prapahandysta Vadzima Hihina, jaki niadaŭna byŭ pastaŭleny kiravać Nacyjanalnaj biblijatekaj, taho, chto nie pahrebuje davieści da kanca spravu vykaranieńnia luboha valnadumstva i mastackaj svabody na Biełarusi.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
