Ašchabad. Fota: Alexander Vershinin / AP Photo
Piekin imkniecca ŭmacavać suviazi z Centralnaj Azijaj u ramkach svajoj inicyjatyvy «Adzin pojas, adzin šlach», ale amal praź dziesiać hadoŭ paśla pačatku budaŭnictva prajekt «linija D» tarmozicca. Pryčyna — składanyja pieramovy ab canie i techničnyja pieraškody ŭ prakładcy trubapravoda, jaki pierasiakaje jašče try krainy Centralnaj Azii. Pra heta zajavili kitajskija naftavyja čynoŭniki.
Ale niadaŭnija namahańni Maskvy pa budaŭnictvie druhoha Sibirskaha trubapravoda z Kitajem, «Siła Sibiry 2», kab kampiensavać skaračeńnie prodažaŭ u Jeŭropie praz vajnu va Ukrainie, dajuć Piekinu ryčah dla prasoŭvańnia centralnaazijackich, ličać kitajskija čynoŭniki i halinovyja kansultanty.
«Centralnaazijackija trubapravody ličacca krajevuholnym kamieniem inviestycyj u enierhietyčnuju i hieapalityčnuju prastoru Kitaja. Heta kanał zabieśpiačeńnia, jaki maje stratehičnaje značeńnie, što pieravažaje nad kamiercyjnymi intaresami», — zajaviŭ ahienctvu Reuters kitajski čynoŭnik, znajomy z hłabalnaj stratehijaj Kitajskaj nacyjanalnaj naftavaj karparacyi (CNPC).
Kitaj moža ŭ kančatkovym vyniku zaklučyć abiedźvie ździełki, kab zadavolić svaje vielizarnyja doŭhaterminovyja patreby ŭ hazie, ale pryjarytet addajecca Turkmienistanu, jak kažuć pradstaŭniki haliny.Piekin užo daŭno razhladaje Centralnuju Aziju jak płatformu dla pašyreńnia handlu, zabieśpiačeńnia enierhanośbitami i padtrymańnia stabilnaści ŭ niekali niespakojnym zachodnim rehijonie Sińczian.
Sukupnyja šmathadovyja kantrakty na pastaŭku hazu pa abodvuch trubapravodach na dziasiatki miljardaŭ dalaraŭ zadavolać 20% ciapierašniaha popytu Kitaja. Hazapravody majuć klučavoje značeńnie dla dasiahnieńnia mety Piekina — vykarystańnia hazu ŭ jakaści pramiežkavaha paliva dla dasiahnieńnia metaŭ vuhlarodnaj niejtralnaści, a taksama dla abarony ad niestabilnaha rynku zvadkavanaha pryrodnaha hazu (SPH), jaki pieravozicca tankierami.
Pavodle acenak 2014 hoda, hazapravod D, košt jakoha składaŭ 6,7 miljarda dalaraŭ, zmoža transpartavać 30 miljardaŭ kubamietraŭ hazu ŭ hod.
Vystupajučy na minułym tydni na pieršym samicie lidaraŭ krain Centralnaj Azii ŭ horadzie Sijań, lidar KNR Si Czińpin zaklikaŭ baki paskoryć prakładku linii D, jakaja stanie čaćviortym hazapravodam Kitaja ŭ rehijon, amal praź dziesiać hadoŭ paśla pačatku budaŭnictva ŭ Tadžykistanie, paviedamlaje «Jeŭrapiejskaja praŭda».
Čytajcie taksama:
Ceny na haz u Jeŭropie mohuć stać admoŭnymi hetym letam
Cana na haz u Jeŭropie abvaliłasia da dvuchhadovaha minimumu
