Karalevu Lizavietu II źbiralisia zabić padčas jaje vizitu ŭ Kaliforniju, kali jana sustrakałasia z Ronaldam Rejhanam. Fota: Ronald Reagan Presidential Library
Na hetym tydni FBR apublikavała ceły pakiet raniej zasakrečanych dakumientaŭ, jakija źviazany sa šmatlikimi vizitami ŭ ZŠA karalevy Lizaviety, jakaja pamierła ŭ vieraśni 2022 hoda, piša Bi-bi-si.
Z dakumientaŭ vidać, što častka pahroz, jakimi zajmałasia FBR, pachodzili ad Irłandskaj respublikanskaj armii (IRA): mnohija ź vizitaŭ karalevy pryjšlisia na čas kryvavaj smuty ŭ Paŭnočnaj Irłandyi.
Infarmacyja pra adnu z pahroz pastupiła z San-Francyska 4 lutaha 1983 hoda, prykładna za miesiac da vizitu karalevy Lizaviety i jaje muža prynca Filipa.
Aficer palicyi, jaki časta byvaŭ u irłandskim pabie ŭ hetym horadzie, paviedamiŭ FBR, što adzin irłandziec, jakoha jon sustreŭ u hetym pabie, skazaŭ jamu, što choča zabić karalevu, kab adpomścić za dačku, zabituju ŭ Paŭnočnaj Irłandyi humovaj kulaj.
«Jon źbiraŭsia nanieści karalevie Lizaviecie škodu, albo skinuŭšy niešta z mosta Załatyja varoty na karaleŭskuju jachtu Britannia, albo pasprabavaŭšy zabić karalevu Lizavietu padčas jaje vizitu ŭ Josiemicki nacyjanalny park», — havorycca ŭ dakumiencie.
Praz hetuju pahrozu brytanskija śpiecsłužby vyrašyli na čas prachodu karaleŭskaj jachty zakryć most Załatyja varoty dla piešachodaŭ.
Jakija miery byli zroblenyja ŭ Josiemickim nacyjanalnym parku, u dakumiencie nie havorycca, ale karaleva tam pabyvała. Źviestak ab aryšcie mužčyny ŭ dakumiencie taksama niama.
Stryječny brat Lizaviety i dziadźka jaje muža łord Maŭntbaten byŭ zabity — padarvany na svajoj jachcie — bajevikom IRA ŭ Irłandyi ŭ 1979 hodzie.
Z apublikavanych dakumientaŭ vidać, nakolki surjozna FBR staviłasia da patencyjnych pahroz žyćciu i zdaroŭju karalevy z boku radykalna nastrojenych irłandcaŭ.
Naprykład, pierad pryvatnym vizitam karalevy ŭ Kientuki ŭ 1989 hodzie kiraŭnictva FBR u słužbovaj zapiscy nahadvała, što pahroza akcyj IRA suprać brytanskaha manarcha zastajecca surjoznaj, i pradpisvała padraździaleńniam u Bostanie i Ńju-Jorku ŭvažliva sačyć za členami IRA i nieadkładna pieradavać infarmacyju ŭ Kientuki.
Pradstaŭniki FBR skazali telekampanii NBC News, što źbirajucca apublikavać jašče dakumienty ŭ dadatak da apublikavanych na hetym tydni, ale kali kankretna jany heta zrobiać, nie paviedamili.
Čytajcie taksama:
Lizavieta II pamierła ad mijełomy
Pamierła siabroŭka Lizaviety II, jakaja dapamahała joj tajemna ŭciakać z pałaca
