Pavieł Łatuška padčas intervju. Stop-kadr videa
U intervju — u tradycyjach polskich miedyja intervju časta zdymajuć prosta ŭ mašynie pa darozie na pracu — Pavieł Łatuška vykazaŭ mierkavańnie, što Łukašenka vielmi baicca kontrnastupleńnia Ukrainy. Tamu nie choča ŭ apošni čas pieradavać bojeprypasy, zbroju, rakiety Rasii.
«Jon praduhledžvaje situacyju, kali paśla ŭkrainskaha kontrnastupleńnia vajna moža apynucca na terytoryi Biełarusi. Tady jamu moža nie chapić srodkaŭ na toje, kab vieści vajnu», — ličyć palityk.
Łatuška zaŭvažaje, što na hetuju temu možna tolki tearetyčna razvažać, i padkreślivaje, što nichto nie choča vajny na terytoryi Biełarusi. U toj ža čas bajcy Pałka Kalinoŭskaha pastajanna havorać, što pryjduć vyzvalać Biełaruś.
Jon nahadaŭ, što Łukašenka addaŭ terytoryju Biełarusi dla ahresii suprać Ukrainy. I heta złačynstva. Zrazumieła, što heta było ŭzhodniena z Pucinym jašče pierad vajnoju. Tamu heta sumiesnaja vajna, jakaja viadziecca Łukašenkam i Pucinym.
Palityk zadajecca pytańniem, jak možna skončyć vajnu, jak paskoryć pieramohu Ukrainy. I daje na jaho svoj adkaz:
«Samaja mocnaja sankcyja, jakaja moža być uviedzienaja adnosna Rasii, — heta likvidacyja režymu Łukašenki. Toje, što ciapier Łukašenka nie znachodzicca pad uvahaj Zachadu, jość vializnaj stratehičnaj pamyłkaj».
Łatuška padkreślivaje, što nichto nie maje stratehii, što rabić z Łukašenkam, za vyklučeńniem adnoj krainy — i hetaja kraina nazyvajecca Rasijskaja Fiederacyja.
Palityk adznačaje pamyłkovy pohlad jeŭrapiejskich palitykaŭ, što tyja «nie cisnuć na Łukašenku, bo inačaj heta budzie zbližać jaho z Rasijaj».
«Pucin da hetaha času nie zabraŭ Biełaruś tolki tamu, što jon hetaha pakul nie choča. Kali zachoča, to heta zrobić. I ŭ hetym rola Łukašenki nulavaja», — miarkuje Łatuška.
Na dumku Łatuški, Zachad maje instrumienty, ale nie choča ich vykarystoŭvać dla padtrymki demakratyčnych siłaŭ Biełarusi.
«Moža, my majem zavyšanyja čakańni. Ale, na moj pohlad, chutčej Zachad maje zanižanyja žadańni ŭ vykarystańni isnych instrumientaŭ. Nieabchodnaje pryznańnie Cichanoŭskaj jak kiraŭnicy Biełarusi i Pierachodnaha kabinieta jak urada Biełarusi».
Łatuška zhadvaje, jak 2 vieraśnia 2020 hoda sustrakaŭsia ŭ Polščy ź ministrami zamiežnych spraŭ siami krain Jeŭropy. Pa jaho słovach, tady jany zajavili: «My nie budziem uvodzić sankcyj suprać Łukašenki. Moža jašče ŭdasca damovicca».
«I tak vyhladaje, što na praciahu ŭsich 30 hadoŭ kiravańnia Łukašenki ŭsie dumajuć, što hetaje kino možna čarhovy raz pahladzieć. I čarhovy raz robiać tyja ž pamyłki»,
— zaŭvažaje palityki i padkreślivaje: «Mocnyja, adčuvalnyja sankcyi. Tolki sankcyi, jakija pryvodziać da ekanamičnaha šoku. Pakarańnie złačyncaŭ».
Pavieł Łatuška adznačaje, što Zachad maje stratehiju adnosna Rasii. Jana skiravanaja na asłableńnie armii, abmiežavańnie finansaŭ, kryminalnuju adkaznaść Pucina i jaho paplečnikaŭ. Ale jakaja stratehija adnosna Biełarusi?
«Adnosna Łukašenki Jeŭrapiejski sajuz za apošni hod nie ŭvioŭ nijakich novych sankcyj. Ci možna pravodzić adnačasova adnu stratehiju adnosna Rasii, a inšuju — adnosna Biełarusi, kali majem u isnaści supolny sajuz dźviuch krain?
Na siońnia najbolšaj pahrozaju dla niezaležnaści Biełarusi jość režym Łukašenki, jaki robić usio, kab uciahnuć Biełaruś u abdymki Rasii», — miarkuje Łutaška.
Palityk adznačaje, što Pucin chacieŭ vajennym šlacham akupavać Ukrainu, a nievajennym, evalucyjnym sposabam — Biełaruś. I hety scenar realizuje.
«Ën chacieŭ zjeści hałoŭnuju stravu — Ukrainu, ale nie ŭdałosia. Atrymaŭ u zuby. Ciapier naceliŭsia na desiert. I hety desiert jon zjeść. Im budzie Biełaruś. I stratehija, jakaja zaklučajecca ŭ tym, kab nie mieć nijakich płanaŭ adnosna Łukašenki, — vialikaja pamyłka.
Bo zaŭtra ŭ Biełarusi budzie Rasija. Pytańnie tolki ŭ tym, ci zachoča Pucin mieć Biełaruś jak člena AAN z svaim ściaham i hołasam abo nie. Ale pierad vybarami pavinien budzie pakazać rasijanam, što niečaha dasiahnuŭ».
Łatuška ŭ svaich razvahach zhadaŭ słovy, jakija 15 lutaha 2022 hoda Pucin vykazaŭ kancleru Hiermanii Ołafu Šolcu: «Nie pavinny isnavać ni Ukraina, ni Biełaruś».
«I što robić Zachad? Ničoha. Čakaje, kali Pucin heta realizuje», — miarkuje biełaruski palityk.
Łatuška taksama nahadaŭ ab tym, što ŭ Biełarusi praciahvajucca represii, pastajanna iduć zatrymańni, raście kolkaść palityčnych viaźniaŭ. Pa svaim uzroŭni represii samyja značnyja za apošnija 50 hadoŭ na prastorach Jeŭropy. I ŭ hety čas u Brusieli razhortvajecca dyskusija ab tym, ci ŭvodzić sankcyi adnosna Łukašenki.
«Adna ź jeŭrapiejskich krain prapanuje admienu sankcyj adnosna kalijnych uhnajeńniaŭ. Jany zakranajuć najbujniejšaje pradpryjemstva, na jakim Łukašenka niezakonna zarablaje. I navošta heta rabić?
Bo hoład u śviecie. Ale heta nie praŭda. AAN paviedamiła, što niama rostu cen na spažyvieckija tavary, kali my havorym ab cenach u dalarach ci jeŭra.
Pa-druhoje. Našy ŭhnajeńni nikoli nie pradavali ŭ Afrycy. Pa-treciaje, pradpryjemstva «Biełaruśkalij» finansuje nielehalnuju departacyju dziaciej z Ukrainy. Heta vajennaje złačynstva. Ale niekatoryja našy partniory prapanoŭvajuć admianić sankcyi i dać Łukašenku zarabić.
I na što zarabić? Na bojeprypasy, vučeńni rasijskich vojskaŭ, na pabudovy novych karnych ustanoŭ, katavańni palityčnych viaźniaŭ», — pryvodzić arhumienty Łatuška.
U intervju taksama było zakranutaje pytańnie ŭzajemasuviazi pieramohi Ukrainy ŭ vajnie i źmienaŭ u Biełarusi. Palityk adznačyŭ, što pieramoha Ukrainy budzie matyvacyjaj dla biełaruskaj supolnaści.
Kali Pucin u hetaj situacyi budzie słaby, nie budzie mieć mahčymaści efiektyŭna kiravać armijaj i vysłać vialikuju kolkaść rasijskich vojskaŭ na terytoryju Biełarusi, kab zadušyć pratesty, to šancy na źmienu ŭłady isnujuć.
Kali ž pieramoha Ukrainy nie pryviadzie da niejkich palityčnych prablem u Maskvie, to ŭ hetym vypadku situacyja vyhladaje składanaj.
«Bo dastatkova zvanka Łukašenki Pucinu, i jon vyšle vojski na terytoryju Biełarusi. I heta realnaść. Ja prahmatyk. My heta ŭsio razumiejem i rychtujem svoj płan dziejańniaŭ. Nakolki jon budzie efiektyŭny — pabačym», — adznačyŭ Łatuška.
Čytajcie jašče:
Łatuška čynoŭnicy AAN: Vam mała palitviaźniaŭ i vymušanych mihrantaŭ?
Łatuška zajaviŭ pra hatoŭnaść na prapanavany Łukašenkam abmien. Ale z trochi źmienienymi ŭmovami
