Jak stała viadoma «Našaj Nivie», 23-hadovy rasijanin Anton Łysaŭ, jaki adbyvaje pakarańnie ŭ «Vićbie», papraŭčaj kałonii № 3, pisaŭ zajavu na imia Jaŭhiena Pryhožyna z prośbaj uziać jaho ŭ PVK «Vahnier» na vajnu z Ukrainaj, vyzvaliŭšy takim čynam ź biełaruskaj kałonii.
Płan chłopca nie spracavaŭ, a za chadajnictva jon, jak nam viadoma, atrymaŭ spahnańnie — ŠIZA.
Jak raskazaŭ nam były sukamiernik Łysava, jaki siadzieŭ razam ź im, toj pryznavaŭ, što pajechaŭ palić mašynu za hrošy, jakija jamu prapanavaŭ niechta praz admysłovuju placoŭku ŭ darknecie. «Navat sumu nazyvaŭ — kala 2000 $». Łysava sukamiernik charaktaryzuje jak «čałavieka biez tarmazoŭ». Raskazvaje takuju historyju: «Niejak u prahułačnym dvoryku Łysaŭ nakłaŭ kuču, bo prasiŭsia ŭ prybiralniu, a jaho nie vypuskali adnaho. My, zakonapasłuchmianyja biełarusy, takoje i ŭjavić nie mahli».
Sukamiernik raskazvaje, što ŭ Łysava była mara zapisacca ŭ «Vahnier» jašče da vajny. Ën źbiraŭsia zrabić heta, jak tolki dasiahnie płanki 21 hoda.
Praktyka brać asudžanych na vajnu suprać Ukrainy ŭkaraniłasia ŭ Rasii letaś: były kuchar Pucina Jaŭhien Pryhožyn zrabiŭ z rasijskich asudžanych sučasny anałah dobraachvotnaj esesaŭskaj «bryhady Dyrlevanhiera», ukamplektavaŭšy imi PVK «Vahnier».
Šerah krain pryznali PVK «Vahnier» arhanizavanaj złačynnaj abo terarystyčnaj arhanizacyjaj. Bajcy hetaha atrada adznačylisia svaimi žorstkimi pavodzinami na akupavanaj terytoryi.
Asudžanym abiacałasia vyzvaleńnie paśla šaści miesiacaŭ udziełu ŭ vajnie, ale kolkaść tych, chto vyžyŭ i atrymaŭ svabodu, nieviadomaja — PVK «Vahnier», pa słovach samoha Pryhožyna, paniesła ciažkija straty pad Bachmutam u bajach z ukrainskimi vojskami i ciapier vyvodzicca na pierafarmavańnie.
Amierykancy aceńvajuć ahulnyja straty rasijan pad Bachmutam u 100 tysiač čałaviek, asnoŭnyja straty panieśli jakraz-taki źniavolenyja-vahnieraŭcy.
Viarboŭka źniavolenych niejki čas šyroka aśviatlałasia ŭ rasijskich i biełaruskich ŚMI, takim čynam infarmacyja ab mahčymaści rezka skaracić čas adsiedki mahła dajści da rasijanina Łysova.
Sam Łysaŭ da svajho aryštu ŭ Minsku žyŭ u Čebaksarach (rasijskaja aŭtanomija Čuvašyja), jon sirata, sa svajakoŭ u jaho tolki sastarełaja babula.
Razam ź biełarusam Zacharam Tarazievičam jon byŭ zatrymany i asudžany za padpał mašyny staršyni Kamiteta sudovych ekśpiertyz Alaksieja Vołkava.
Spačatku chłopcam inkryminavali teraryzm, ale sudzili ŭ vyniku pa 218 artykule Kryminalnaha kodeksa — za naŭmysnaje źniščeńnie čužoj majomaści.
Ën atrymaŭ 10 hadoŭ kałonii, jon byŭ pryznany palitviaźniem.
Vyśvietliłasia, što chłopcam za padpał zapłacili. Zamoŭščyk padpału zatrymany i asudžany nie byŭ, što daje padstavy ličyć, što tym «zamoŭščykam» mahła być asoba z łukašenkaŭskich śpiecsłužbaŭ — mietad pravakacyj šyroka vykarystoŭvajecca łukašystami ŭ «ekstremisckich» złačynstvach.
Hetak ža było, naprykład, u «spravie napadu na Azaronka», «spravie ab padpale doma Hajdukieviča» i inšych, jakija mieli na mecie nastroić siłavikoŭ i namienkłaturu suprać pratestu.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Dvuch chłopcaŭ asudzili za padpał aŭtamabila staršyni Dziaržaŭnaha kamiteta sudovych ekśpiertyz
Rasijanie ŭ rajonie Bachmuta akazalisia ŭ niebiaśpiečnym stanoviščy — ISW
