Bajcy-kalinoŭcy kala vohnišča. Fota z TH-kanała BelWarriors
Na baku Ukrainy vajuje niekalki biełaruskich padraździaleńniaŭ: «Połk Kastusia Kalinoŭskaha», «Połk Pahonia», «Bataljon Teror» i vajskovaja čaść, pra stvareńnie jakoj kazaŭ Valeryj Sachaščyk, były kamandzir bresckaj desantnaj bryhady. Kolkaść biełaruskich dobraachvotnikaŭ nieviadomaja — takija praviły vajny. Acenki vahajucca ad «niekalkich sotniaŭ» (Siarhiej Bulba) da 1500 čałaviek, pra jakich kazaŭ Ofis Śviatłany Cichanoŭskaj.
Acenki minskich siłavikoŭ bližejšyja, chutčej, da apošniaj ličby. Da takoj vysokaj acenki schilaje razumieńnie maštabu niezadavolenaści i pamiać ab pratestach 2020 hoda, na piku jakich na vulicy vychodziła kala miljona čałaviek.
Usprymać biełaruskich dobraachvotnikaŭ jak surjoznuju pahrozu łukašenkaŭcaŭ pierakonvajuć taksama maskoŭskija sajuźniki. Apošnija zychodziać z raźlikaŭ «vialikaj hieapalityki», dzie Biełarusi naležyć stratehičnaja rola ŭ kanflikcie Rasii z Zachadam.
«Ruskija pieraścierahajuć, što Zachad tak ci inakš udaryć pa Biełarusi. Abo šlacham raskołu pamiž Pucinym i Łukašenkam, abo vajennym sposabam, praz demakratyčnyja siły i dobraachvotnikaŭ», — adznačaje surazmoŭca «Našaj Nivy».
Pad upłyvam strachaŭ, a taksama infarmacyi z Maskvy, režym Łukašenki zapuściŭ kompleks previentyŭnych mieraŭ suprać mahčymaha napadu. Siarod ich začystki hramadstva — aryšty, zvalnieńni, papiaredžańni, a taksama vajskovyja zbory, što zakranajuć navat tych, chto moh by patencyjna vystupić suprać režymu.
Akramia taho, stvarajucca novyja vajskovyja adzinki. «My stvaryli va ŭsich našych bryhadach i asobnych bataljonach pa ŭsiej krainie try roty śpiecyjalnaha pryznačeńnia i 12 uzvodaŭ śpiecpryznačeńnia. Praviali zbory, bajavoje zładžvańnie», — adznačyŭ u sakaviku kamandujučy Unutranymi vojskami Mikałaj Karpiankoŭ.
U toj ža čas, kab adbić achvotu ad padtrymki dobraachvotnikaŭ, susiednija krainy režym zastrašvaje jadziernym parasonam Rasii. Słovam, pierakryvajuć lubyja patencyjnyja šlachi.
«Ëść unutry režymu tak zvanyja «realisty», jakija aceńvajuć kolkaść biełaruskich dobraachvotnikaŭ u niekalki sotniaŭ, što, na ich dumku, nie ŭjaŭlaje značnaj pahrozy. Jany raźličvajuć, što režym moža supraćpastavić im dziasiatki tysiač vajskoŭcaŭ, a taksama bajcoŭ unutranych vojskaŭ i supracoŭnikaŭ śpiecyjalnych słužbaŭ.
Niahledziačy na nizki bajavy duch biełaruskich siłavych struktur, ich nastroi ŭ vypadku ŭźniknieńnia realnaj uzbrojenaj pahrozy nie pradvyznačanyja.
«Połk Kalinoŭskaha ŭ siłavych strukturach nie ŭsprymajuć jak lehitymnuju siłu. Kali jany piarojduć hranicu, ich buduć likvidoŭvać jak zvyčajnych bandytaŭ, pryčym u hetym buduć udzielničać navat tyja, chto nastrojeny suprać Łukašenki i Rasii», — miarkuje surazmoŭca «Našaj Nivy».
Na jaho dumku, Alaksandr Łukašenka ŭličvaje jak bačańni «realistaŭ», tak i «jastrabaŭ». Jon i na publiku demanstruje ŭpeŭnienaść u svaich siłach, i začyščaje hramadstva, kab hetuju ŭpeŭnienaść uzmacnić. «Vy abiacajecie, što ŭładu pieravierniecie ŭ Biełarusi. Jany ž razumiejuć, što heta niemahčyma», — pierakonvaŭ Łukašenka padčas pasłańnia Nacyjanalnamu schodu.
«Na acenku pahrozy dla ŭładaŭ z boku dobraachvotnikaŭ upłyvajuć taksama mahčymaści rostu ich šerahaŭ», — miarkuje surazmoŭca «Našaj Nivy».
U vyniku masavych represij Biełaruś pakinuli bolš za 200 tysiač čałaviek. Histaryčnyja prykłady pakazvajuć, što na vajnu dobraachvotnikami hatovyja iści da 1% hramadstva.
«Z ulikam akaličnaściaŭ, tearetyčna, da biełaruskich dobraachvotnickich farmavańniaŭ za miažoj pry spryjalnych abstavinach moža dałučycca 2000—3000 čałaviek, što ŭžo značnaja siła», — miarkuje surazmoŭca «Našaj Nivy» ź dziaržaŭnych struktur.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
