Ilustracyjnaje fota. Krynica: vecteezy.com
Sardečnaja niedastatkovaść — heta stan, kali serca nie moža całkam vykonvać svaju funkcyju pa pierapampoŭvańni kryvi pa arhaniźmie, što moža pryvieści da taho, što orhany i tkanki atrymlivajuć mienš kisłarodu i pažyŭnych rečyvaŭ, čym im nieabchodna. Heta adbyvajecca tamu, što myšca serca nie moža vytrymlivać nahruzki abo pracuje mienš efiektyŭna, čym pavinna.
Sardečnaja niedastatkovaść nie zjaŭlajecca samastojnym zachvorvańniem, heta chutčej simptom inšych prablem serca ci arhanizma ŭ cełym.
Sardečnaja niedastatkovaść raźvivajecca ŭ vyniku takich zachvorvańniaŭ, jak arteryjalnaja hipiertenzija, išemičnaja chvaroba serca, arytmija, zachvorvańnie mijakarda. Sardečnuju niedastatkovaść taksama mohuć vyklikać dyjabiet, atłuścieńnie, ałkaholnaje ci narkatyčnaje atručeńnie, zachvorvańni ščytapadobnaj załozy, a taksama infiekcyi i virusy, jakija mohuć paškodzić sardečnuju myšcu i pryvieści da jaje pasłableńnia.
Nastupstvy dla arhanizma
Sardečnaja niedastatkovaść vyklikaje paharšeńnie krovazvarotu, što moža pryvieści da parušeńnia funkcyjanavańnia roznych orhanaŭ i sistem, naprykład, lohkich, piečani, nyrak, kryvianosnaj sistemy i inšych.
Źnižeńnie zabieśpiačeńnia orhanaŭ i tkanak kisłarodam i pažyŭnymi rečyvami, jakoje adbyvajecca ŭ vyniku sardečnaj niedastatkovaści, vyklikaje stomlenaść, słabaść, zadyšku, acioki, stratu vahi i myšačnaj masy.
Parušeńnie rytmu serca, jakoje moža raźvicca ŭ vyniku sardečnaj niedastatkovaści, moža pryvieści da prablem z krovazvarotam, da raźvićcia insultu ci infarktu mijakarda.
Bolš za toje, sardečnaja niedastatkovaść moža vyklikać źmieny va ŭnutranym asiarodździ arhanizma, što moža pryvieści da raźvićcia dysfunkcyi nyrak i parušeńnia abmienu rečyvaŭ. U vyniku hetaha paharšajecca jakaść žyćcia pacyjenta, pavialičvajecca ryzyka raźvićcia inšych sardečna-sasudzistych zachvorvańniaŭ, što pryvodzić da pavieličeńnia śmiarotnaści.
Pryčyny rostu vypadkaŭ sardečnaj niedastatkovaści
Adna z pryčyn rostu statystyki sardečnaj niedastatkovaści — stareńnie nasielnictva. Jašče adna pryčyna, jak ni dziŭna, heta efiektyŭnaje lačeńnie išemičnaj chvaroby serca i sardečnych prystupaŭ.
Paśla pieražytaj vostraj fazy infarktu mijakarda mnohija ludzi praciahvajuć pakutavać ad chraničnaha zachvorvańnia, niahledziačy na lačeńnie. U vyniku praciahvajuć źmianiacca karanarnyja sasudy, mahčymaja pieryjadyčnaja išemija sardečnaj myšcy, jakaja prachodzić bieź simptomaŭ. Usio heta moža pryvieści da raźvićcia sardečnaj niedastatkovaści.
U jakim uzroście raźvivajecca
Pavodle statystyčnych danych, ryzyka raźvićcia sardečnaj niedastatkovaści ŭzrastaje paśla 65 hadoŭ. Adnak isnujuć vypadki, kali jana moža raźvicca i ŭ maładych ludziej, asabliva kali ŭ ich jość anamalii raźvićcia, pryrodžanyja defiekty i vostryja sistemnyja zachvorvańni, jakija akazvajuć uździejańnie na serca.
Sardečnaja niedastatkovaść u śviecie nazirajecca ŭ 3—5% asob, starejšych za 65 hadoŭ i ŭ kožnaha dziasiataha — starejšaha za 70 hadoŭ. U Biełarusi sardečnaja niedastatkovaść źjaŭlajecca pryčynaj zvyš 10% usich špitalizacyj.
Najbolš raspaŭsiudžanyja simptomy
Zadyška. Spačatku jana zjaŭlajecca pry istotnych nahruzkach, zatym — pry vykanańni štodzionnych rabot. Kali chvaroba raźviłasia, to čałaviek moža adčuvać zadyšku navat tady, kali ničoha nie robić.
Stomlenaść. Čałaviek moža adčuvać słabaść i stomlenaść navat paśla nievialikaj fizičnaj nahruzki.
Aciočnaść. Najbolš jana zakranaje ščykałatki, stupni abo halonki. Zvyčajna acioki zjaŭlajucca ŭ kancy dnia.
Pavieličeńnie žyvata. Heta adbyvajecca z-za zatrymki vadkaści ŭ brušnoj połaści i supravadžajecca adčuvańniem ciažaru ci napružańnia ŭ žyvacie, časam — bolami ŭ žyvacie i nižniaj častcy śpiny.
Pačaščanaje močaspuskańnie pa načach. Jaho pryčynaj zjaŭlajecca aciok žyvata. Vadkaść, jakaja nakaplivajecca ŭ brušnoj połaści, ciśnie na mačavy puzyr, što moža pryvodzić da častaha močaspuskańnia pa načach. Pry hetym mača moža być zvyčajnaj ci navat bolš śvietłaj, što źviazana z padvyšanaj kancentracyjaj vadkaści ŭ arhaniźmie praz parušeńnie pracy serca.
Pačaščanaje sercabićcie.
Situacyi, kali terminova nieabchodna vyklikać chutkuju dapamohu
Sardečnaja niedastatkovaść moža pryvieści da vostraj sardečnaj niedastatkovaści, kali orhany i tkanki nie atrymlivajuć dastatkovaj kolkaści kryvi, što zjaŭlajecca nadzvyčajnym vypadkam i patrabuje nieadkładnaj miedycynskaj dapamohi.
Chutkuju dapamohu nieabchodna vyklikać, kali nazirajucca
- raptoŭny vostry prystup zadyški, asabliva kali jon nie spyniajecca doŭhi čas i supravadžajecca chrapieńniem, kašlem, patlivaściu, strataj prytomnaści abo paničnymi atakami;
- niezvyčajnaja słabaść, hałavakružeńnie, adčuvańnie mocnaj stomlenaści abo strata prytomnaści;
- praciahły bol u hrudziach, asabliva kali jon mocny, ściskaje albo dušyć, i supravadžajecca adčuvańniem piakučaści za hrudzinaj, zadyškaj, słabaściu i nie zdymajecca nitrahlicerynaj;
- mocnaje abo niaŭstojlivaje sercabićcie, asabliva kali jano praciahvajecca doŭhi čas i supravadžajecca zadyškaj i strataj prytomnaści.
Čytajcie jašče:
Paśla pačatku pandemii ŭsio bolš maładych pamiraje ad infarktaŭ. Voś u čym pryčyna
