Ab hetym i inšych asablivaściach rynku nieruchomaści raspaviała ekśpiert pa žyłoj nieruchomaści Natalla Litoŭskaja ŭ efiry instahram-kanała kufar.official
Čym abumoŭleny vysoki popyt na nieruchomaść
Paśla spadu na rynku nieruchomaści, jaki naziraŭsia z pačatkam vajny Rasii z Ukrainaj, za hod adbyłasia adaptacyja da novaj situacyi.
Natalla Litoŭskaja adznačaje try faktary, jakija paŭpłyvali na vysoki popyt, jaki prysutničaje ŭ apošni čas.
Pieršy źviazany sa strataj davieru da bankaŭskich układaŭ. Paśla situacyi minułaha hoda, kali banki addavali valutnyja ŭkłady ŭ vielmi abmiežavanych abjomach, ludzi pierastali daviarać zachoŭvańniu valuty va ŭkładach.
Na dumku Natalli, «vyrašyŭšy, što bankam daviarać nielha, ludzi pieraviali ŭkłady sabie «pad matracy». Ale «pad matracam» zachoŭvać vialikija sumy psichałahična ciažka. Pry hetym realnyja dachody nasielnictva nie ŭpali. Kali nie ličyć niejkich 2-3 pracenty. Tamu ludzi mahli nakoplivać. Pakolki nakoplivałasia na žyllo, to jano ŭ vyniku i nabyvałasia»
Druhi faktar, na jaki źviartaje ŭvahu ekśpiert, heta źnižeńnie stavak pa kredytach. «Kredyty pad 15,4 % hadavych ličacca pa biełaruskich mierkach tannymi. Tyja, kamu nie chapała 10-30 tysiač i chto ličyŭ niemahčymym brać kredyt pad 21-22%, vyrašyli, što pad 15,4% (a dla dziaržzabudoŭščykaŭ pad 15%) možna brać».
Treci faktar, jaki mienš upłyvaje na rynak nieruchomaści — abmiežavanyja mahčymaści krynic inviestavańnia. Adziny maksimalna nadziejny šlach, jaki zastaŭsia ŭ biełarusaŭ, heta inviestycyi ŭ žyllo.
«U novabudoŭli — nie vielmi dobraja ideja, a voś u druhasny rynak — dobraja. Nabyvaješ kvateru za 50 tysiač i zdaješ jaje. Kvatera budzie akuplivacca, i ŭ dalejšym jaje možna pradać za bolšuju sumu. Bo ŭ doŭhaterminovaj pierśpiektyvie na rynku ceny vyrastuć. Heta ŭmoŭny naš piensijny fond. Tak ludzi inviestujuć u svaju budučyniu na piensii», — ličyć Litoŭskaja.
Što adbyvajecca z koštami na žyllo z boku zabudoŭščykaŭ
Ekśpiert adznačaje, što pad upłyvam uzrosłaha popytu zabudoŭščyki padniali ceny. «Tolki adzin ci dva zabudoŭščyki hetaha nie zrabili, bo ŭ ich vialiki abjom adnatypnych kvater, jakija i tak słaba brali. A košty likvidnych prajektaŭ padnialisia», — dzielicca svaimi nazirańniami Natalla Litoŭskaja.
Adnak novyja ceny, na dumku ekśpiertki — užo vierchniaja miaža. Pry hetym jana nie viedaje, pra što dumali markietołahi, kali padniali ceny ŭ novych kvartałach «Minsk-Śvietu» na ŭzroŭni 1600-1700 dalaraŭ za kvadrat.
«Mahčyma jany chacieli pakazać, nakolki tannaje ŭsio astatniaje, što ŭ ich prapanujecca. U ich ahramadny abjom nie raspradanaha hatovaha žylla. Pa źviestkach z bazaŭ, u 1300 kvater u hatovych damach. Takaja ličba dla Minska vielmi vialikaja. Mahčyma, markietołahi vyrašyli napužać pakupnikoŭ («davajcie my pakažam, što chutka buduć hihanckija ceny, i tady vy źvierniecie ŭvahu na toje, što ciapier pa 1100, i schopicie»). Inšaha tłumačeńnia ja nie baču», — zaŭvažaje ekśpiert.
Litoŭskaja adznačaje, što ŭ dalejšym ceny na žyllo budzie strymlivać padzieńnie kursu biełaruskaha rubla i adznačaje jašče adzin faktar — źmianšeńnie kolkaści hrošaj na rukach u nasielnictva, jakija ludzi hatovyja ŭkłaści ŭ nieruchomaść.
«Jak my bačyli pa drennych hadach, u miesiac ździajśniałasia kala 1000-1100 ździełak. Ciapier da ich dadalisia inviestary, jakija ŭ druhija miescy pabajalisia ŭkładać. U vyniku my bačym pavyšanyja ličby. Ale hetaja kolkaść ludziej skončycca, i my znoŭ ubačym źnižeńnie popytu. Ceny, jakija my bačym, užo stol. Dalej im raści niama kudy.
Akramia taho, u kamiercyjnych zabudoŭščykaŭ usio bolš kankurentaŭ u vyhladzie dziaržaŭnych. Jany vystaŭlajuć ceny ŭ biełaruskich rublach i takim čynam adciahvajuć popyt na siabie. Da taho ž u hetym hodzie ŭsie novyja prajekty ad dziaržaŭnych zabudoŭščykaŭ», — adznačaje ekśpiert.
Chto jon, inviestar u staličnuju nieruchomaść
Ekśpiert adznačaje, što ŭ ciapierašni čas nazirajecca niebyvałaja, da 25%, dola ludziej z rehijonaŭ, jakija nabyvajuć žyllo ŭ novabudoŭlach Minska. Na dumku Litoŭskaj, heta nie tolki prostyja inviestary, ale i
«ludzi, jakija nie bačać pierśpiektyŭ u rehijonach, jakija ličać, što z kožnym hodam tam budzie rabicca horš. Jany nabyvać ci dla siabie žyllo, kab pierajechać, bo ŭ Minsku zaŭsiody jość hrošy, možna znajści rabotu. Ci heta ludzi, u jakich padrastajuć dzieci. Moža jany i chacieli b, kab ich dzieci žyli ŭ svaim horadzie, ale razumiejuć, što budučynia za Minskam. I toje, što jany nakoplivali na budučyniu, układajuć u Minsk».
Jakaja kvatera najbolš pryvabnaja dla inviestycyj
Ekśpiert adznačaje, što dvuchpakajovyja kvatery nikoli nie byli pryvabnymi z punktu hledžańnia inviestycyj. Heta vielmi dalokija inviestycyi z dachodnaściu 5-6%.
Litoŭskaja adznačaje što samuju vysokuju dachodnaść dajuć adnapakajovyja kvatery i jeŭradvojki ŭ zvyčajnych panelnych damach kala dobrych transpartnych šlachoŭ, blizka da centru ci mietro.
A voś dla siamji lepš razhladać kvateru na druhasnym rynku dzie-niebudź u Malinaŭcy, čym novabudoŭlu. Bo ŭ pieršym vypadku jość usia infrastruktura dla kamfortnaha žyćcia.
Da jakich novych žyłych kompleksaŭ pa suadnosinach cany, jakaści i rajona varta źviarnuć uvahu
Ekśpiert rekamienduje źviarnuć uvahu na ŭsie novabudoŭli kala Hrušaŭki, zabudovu MAPIDa na vulicy Kurhannaj, damy UKSa kala mietro «Puškinskaja» na miescy tak i nie pabudavanaha HC «Hulivier». U apošnim vypadku budaŭnictva pačniecca nie raniej, čym praz hod. Ale, jak ličyć ekśpiert, jeść sens pačakać, bo jany buduć i likvidnyja i cikavyja dla ŭłasnaha pražyvańnia.
Dla doŭhaterminovych pierśpiektyŭ (kab žyć na piensii) možna razhladać «Zialonuju havań», jakaja ŭ pierśpiektyvy vojdzie ŭ miežy horada. Ciapier ža tam, jak adznačaje Litoŭskaja, navat maršrutka nie chodzić.
Ekśpiert taksama adznačaje, što dla žyćcia dobra padychodzić «Novaja Baravaja».
Čytajcie jašče:
U Novaj Baravoj prezientavali novy kvartał sa śviacilniami i dyvanom u dvary. Što z cenami?
Ažno treć kvater u Minsku pradajecca pa davieranaści
Za kolki ŭ siarednim pradavalisia adnuški ŭ Minsku? Mnohija ź ich skuplali inšaharodnija
