Učora Biełaruski rasśledavalnicki centr vypuściŭ rasśledavańnie ab tym, što Biełaruś vinavataja Vieniesuele za pastaŭki nafty, jakija byli jašče ŭ časy Uha Čaviesa, kala 1,5 miljarda dalaraŭ. Pry hetym pry vyvučeńni dakumientaŭ rasśledavalniki pryjšli da vysnovy, što biełaruskija ŭłady i nie źbiralisia viartać Vieniesuele hetyja hrošy.
Ciapier były vieniesuelski ministr paćvierdziŭ zapazyčanaść i raspavioŭ, što kantrakt na pastaŭku nafty Biełarusi byŭ niavyhadny dla Vieniesueły, ale jaho ŭsio roŭna padpisali, pakolki Łukašenka chacieŭ stać niezaležnym ad rasijskaj nafty.
«Pierš za ŭsio, Łukašenka skazaŭ Čaviesu, što jon choča stać niezaležnym ad rasijan, tamu što rasijanie da hetaha momantu pastaŭlali jamu ŭsiu naftu, u jakoj jon mieŭ patrebu, i rabili heta ŭ asnoŭnym pa trubapravodzie. U pramovie ab niezaležnaści jon skazaŭ, što jamu patrebnaja vieniesuelskaja nafta, jakaja budzie pastupać da jaho praz Bałtyjskaje mora. Mnie heta padałosia nie vielmi dobrym [varyjantam], bo heta było niavyhadna dla Vieniesueły. My nie mahli kankuravać z rasijanami. Urals i azierbajdžanskaja nafta značna bližej da hetaha rynku. Ale što ž… Heta było ŭzhodniena», — zajaviŭ Rafael Ramires.
Pa słovach byłoha čynoŭnika, ideja zaklučałasia ŭ tym, kab častku apłaty za naftu abmianiać na pracu, jakuju biełarusy vykonvali ŭ Vieniesuele: budavali budynki ŭ Fuerte-Civuna, pryvozili abstalavańnie dla zvadkavanaha hazu dla aŭtamabilaŭ i inšyja rečy.
U niejki momant, pa słovach Ramiresa, biełarusy nie vykanali hetaje patrabavańnie.
«Ja liču, što jany skarystalisia dobraj volaj Čaviesa, u nas było šmat prablem z pracaj u Vieniesuele, taksama była prablema nazapašvańnia daŭhoŭ. Toje, što vy kažacie pra sumu 1,4 miljarda, dla mianie hučyć chutčej jak 2 miljardy, mienavita hetaja suma ŭ mianie ŭ hałavie.
Ja pamiataju heta, tamu što ja pačaŭ skardzicca spadaru Siamašku (Uładzimir Siamaška ŭ tyja hady byŭ vice-premjeram Biełarusi — Red.). Jon byŭ čałaviekam, jaki adkazvaŭ za kantakty.
U niejki momant jany pačali admaŭlacca płacić. Asabliva kali prezident Čavies byŭ chvory. Kali Čavies pamior, pieršaje, što ja skazaŭ Nikałasu Madura, heta toje, što jość abaviazak Biełarusi pierad Vieniesuełaj, jon zadakumientavany, jość dakumienty, i vy, jak prezident, pavinny akazać cisk. Madura ničoha nie zrabiŭ. Ja pamiataju, jak padčas turne Madura pajechaŭ u Biełaruś i nie puściŭ mianie na sustreču, bo viedaŭ, što ja źbirajusia spahnać hety doŭh. Nie tolki tamu, što heta byŭ doŭh na razumnuju sumu, ale i tamu, što cana na naftu padała, i my byli nie ŭ tym stanoviščy, kab pazyčać kamuści hrošy», — raspaviadaje Ramires.
Eks-ministr adznačaje, što ź vieniesuelskaha boku Madura nie patrabavaŭ ad biełaruskaha kalehi vypłacić hety doŭh.
«Biełarusy skazali niešta niezvyčajnaje… Što heta była damoŭlenaść pamiž Čaviesam i Łukašenkam, i što, kali Čavies pamre, jany nie buduć płacić (…)
Kali biełaruski ŭrad nie choča padparadkavacca, bo jany tak i kažuć, tady darečy padać u sud na hetuju biełaruskuju kampaniju, nazvu jakoj ja nie pamiataju», — skazaŭ Ramires.
