Audi
Madelny šerah u biełaruskaha dylera Audi davoli ścipły, tamu samaja dastupnaja Audi ŭ Biełarusi — heta A4, a nie A1 abo A3, jak u inšych krainach Jeŭropy.
U Biełarusi ceny na A4 u kuzavie siedan pačynajucca z adznaki 47 260 jeŭra. U Polščy anałahičny aŭtamabil pradajecca za 163 450 złotych, što składaje kala 35 200 jeŭra.
Skrynšot z sajta audi.by
Pa canie samaj tannaj A4 u Biełarusi ŭ Polščy možna nabyć krasovier Audi Q5, a 3 tysiačy jeŭra, što zastanucca, patracić na adpačynak. U Varšavie ceny na Q5 pačynajucca z adznaki 44 tysiačy jeŭra, a ŭ Minsku — z 69 681 jeŭra.
Skrynšot z sajta audi.pl
U Polščy na vybar u najaŭnaści 14 madelej marki, a ŭ Biełarusi tolki 6.
Renault/Dacia
Papularny siarod biełaruskich aŭtaamataraŭ krasovier Renault Duster u Polščy, jak i ŭ inšych krainach Jeŭropy, pradajecca pad brendam Dacia. U Biełarusi Duster pastaŭlaŭsia z zavoda Renault u Rasii, tamu dylery raspradajuć minułahodnija reštki. Novych pastavak Renault Duster nie budzie, bo rasijski zavod bolš nie pracuje.
Poŭnapryvadny dyzielny Duster u nas možna nabyć za 84 100 rubloŭ, abo kala 26 500 jeŭra pa biahučym kursie. U Polščy anałahičny aŭtamabil z šyldzikam Dacia pradajecca za 108 200 złotych, abo kala 23 150 jeŭra. Jak bačym, u paraŭnańni z Audi, jakija pastaŭlajucca ŭ Biełaruś ź Jeŭropy, roźnica nie takaja vialikaja, bo tyja Renault byli zrobleny ŭ Rasii.
Skrynšot z sajta renault.by
Renault Sandero Stiepway ŭ našych dyleraŭ skončylisia jašče letaś, zatoje zastałosia krychu Logan Stapway, jakija, aproč nazvy, adroźnivajucca tolki typam kuzava.
Samaja tannaja viersija Logan Stiepway ciapier kaštuje 50 900 rubloŭ (kala 16 tysiač jeŭra). Viersija z bolš mocnym ruchavikom i lepšaj kamplektacyjaj pradajecca na 9 tysiač rubloŭ daražej — 59 900 rubloŭ, abo amal 19 tysiač jeŭra. Heta ceny na aŭto druhoha pakaleńnia.
Tym časam u Polščy pradajucca bolš sučasnyja Sandero treciaha pakaleńnia, a nie druhoha, jakija da apošniaha času vypuskali ŭ RF.
Cieny na Stepway ŭ Polščy pačynajucca z 70 600 złotych (15 100 jeŭra). Samy darahi Stepway tam pradajuć za 86 100 złotych, što kala 18 500 jeŭra.
KIA
KIA Ceed SW u Biełarusi pradajecca pa canie ad 93 900 rubloŭ (kala 29 500 jeŭra).
Skrynšot z sajta av.by
U Polščy ceny na anałahičnyja aŭto pačynajucca sa 102 900 złotych (kala 22 tysiač jeŭra).
Skrynšot z sajta kia.com/pl
VW
Aŭtamabili marki VW ad biełaruskich dyleraŭ ciapier składana nazvać «narodnymi», bo na vybar prapanujuć try darahija madeli. Mikraaŭtobusy Caravelle i Multivan, a taksama pazadarožnik Touareg.
Tak, naprykład, Touareg u nas pradajecca pa cenach ad 272 320 rubloŭ, što składaje kala 85 500 jeŭra.
Skrynšot z sajta volkswagen.pl
U Polščy ceny na Touareg pačynajucca z adznaki 341 790 złotych, ci kala 73 500 jeŭra.
Madelny šerah u polskich dyleraŭ VW u siem razoŭ bolšy za biełaruski — 21 madel suprać troch.
Samy tanny ź ich VW Up, ceny na kampaktny haradski aŭtamabil pačynajucca z 61 190 złotych, što krychu bolš za 13 tysiač jeŭra.
Skrynšot z sajta volkswagen.pl
Zatym idzie VW Polo pa canie ad 93 390 złotych (kala 20 tysiač jeŭra).
Peugeot
Pahladzim ceny, naprykład, na Peugeot 5008.
Skrynšot z sajta peugeot.pl
U Polščy samyja dastupnyja varyjanty pradajuć pa cenach ad 106 000 złotych, što kala 22 700 jeŭra, a ŭ Biełarusi — pa 105 400 rubloŭ, što krychu bolš za 33 tysiačy jeŭra.
Skrynšot z sajta peugeot.by
Čamu ceny ŭ Biełarusi istotna vyšejšyja, a vybar biedny?
Reč u tym, što ŭ krainach JEAES isnujuć vysokija zaharadžalnyja pošliny na impart aŭto z trecich krain. Aproč samoj pošliny, pry ŭvozie transpartnych srodkaŭ nieabchodna zapłacić utylizacyjny zbor. Usio heta vielmi mocna adbivajecca na canie. Mienavita praz heta da vajny kala 90% pradavanych u Biełarusi novych mašyn było zroblena ŭ Rasii ci Biełarusi.
Vysokija zaharadžalnyja pošliny ŭvodzilisia z metaj abaranić miascovych aŭtavytvorcaŭ (pa fakcie rasijskich). Praz heta mnohija suśvietnyja aŭtavytvorcy naładzili vypusk aŭto na terytoryi krain Sadružnaści, ale de-fakta amal usie zavody znachodzilisia na terytoryi Rasii.
Praz vajnu i sankcyi vytvorčaść novych aŭto ŭ Rasii mocna prasieła, bo bolšaść suśvietnych brendaŭ vyrašyła spynić pracu ŭ RF.
Biedny madelny šerah — heta taksama adhałoski dziejnaha zakanadaŭstva. Dylery, kab mieć mahčymaść pradavać aŭtamabili, musiać prajści składanuju i zatratnuju praceduru siertyfikacyi, što robić niemetazhodnym zavoz u našyja krainy šmat roznych madelaŭ aŭto. U vyniku atrymlivajecca, što vybar novych aŭto ŭ paraŭnańni z toj ža Polščaj u nas maleńki, a ceny vysokija. U miežach ES ceny na novyja aŭto ŭ roznych krainach kali i adroźnivajucca, to nie značna.
