Dźmitryj Šadko na adnoj z ralavych hulniaŭ. Fota: staronka Dźmitryja Šadko «Ukantakcie»
Dźmitryju Šadko 44 hady. Mužčyna skončyŭ BDUIR u 2001 hodzie, paśla jon praviadzie tam dziasiatki ŭračystych mierapryjemstvaŭ. U alma-mater jon byŭ aktyvistam BPSM (jaki paśla pierajmianujuć u BRSM) i paśpieŭ dasłužycca da čalca CK arhanizacyi. Užo ŭ 19 hadoŭ jon byŭ adnym z hałoŭnych śpiecyjalistaŭ pa pracy sa studentami.
Dźmitryj Šadko na śviacie 100-hodździa kamsamołu. Pa centry — staršynia CVK i čalec KPB Ihar Karpienka, sprava ad Karpienki — Dźmitryj Varaniuk, adzin z kiraŭnikoŭ BRSM. 2018 hod. Fota: staronka Dźmitryja Šadko.
Z 2003 pa 2005 hady Dźmitryj vučyŭsia ŭ Akademii kiravańnia. Užo praz hod paśla skančeńnia jon sychodzić z BRSM i stanovicca hałoŭnym redaktaram časopisa «Płanieta». U 2010-m jaho biaruć druhim namieśnikam ministra infarmacyi Biełarusi, a ŭ 2013-m — pavyšajuć da pieršaha namieśnika ministra suviazi i infarmatyzacyi Biełarusi. Karjera idzie ŭharu, Dźmitryja i jahonyja inicyjatyvy chvalać pa dziaržaŭnym telebačańni.
Dźmitryj Šadko daje intervju kanału «Biełaruś-1» z nahody śviata 3 lipienia 2018 hoda. Skrynšot videa «Biełaruś-1»
U 2019-m — niečakanaje źniknieńnie z radaraŭ. Telehram-kanał «Niechta» piša pra zatrymańnie mužčyny, ale nieŭzabavie Dźmitryj jaho abviarhaje i kaža, što syšoŭ u adstaŭku sam (śledam abviaržeńnie dajuć i dziaržaŭnyja orhany). Kali vieryć jaho sacsietkam, paśla jon pierajšoŭ u daččynuju kampaniju banka BiełVEB AAT «DFS» na pasadu kiraŭničaha dyrektara. Heta kampanija, jakaja dazvalaje inšym kampanijam lehalna stvarać ułasnyja krypta-tokieny i arhanizoŭvać ICO — to-bok, pradavać ich na biržy. Joj ža naležyć płatforma Finstore.
Prapracavaŭ jon tam da kastryčnika 2021 hoda i pierajšoŭ na pasadu pamočnika staršyni kalehii Jeŭrazijskaj ekanamičnaj kamisii (JEEK) i staŭ adkaznym sakratarom tak zvanaj pracoŭnaj hrupy vysokaha ŭzroŭniu, metami jakoj nazyvałasia spryjańnie ličbavizacyi ekanomik krain JEAES. Jaho niepasrednym kiraŭnikom byŭ kolišni kiraŭnik były premjer-ministr Biełarusi Michaił Miaśnikovič.
Było ŭ Dźmitryja i zachapleńnie — ralavyja hulni. Ideja, kali vielmi prosta, takaja: vy damaŭlajeciesia pra «śviet», u jakim budziecie hulać, i jahonyja praviły, a taksama raźmiarkoŭvajecie miž saboj roli. Takija hulni mohuć doŭžycca niekalki sutak abo navat tydniaŭ.
Dźmitryj Šadko padčas adnoj z ralavych hulniaŭ. Fota: jahonaja staronka «Ukantakcie»
Mužčyna taksama niekalki razoŭ udzielničaŭ u supolnych hulniach ź Jaŭhienijaj Tačyckaj — mierkavana, jaho aryštavali padčas dziažurnaj «apracoŭki» kantaktaŭ žančyny, jak i niekalki inšych čałaviek.
Mužčynu zatrymali supracoŭniki FSB 9 ci 10 sakavika. Paśla hetaha jaho advieźli ŭ SIZA KDB. Pra sutnaść vysunutych jamu abvinavačańniaŭ ničoha nieviadoma, ale miedyja i pravaabaroncy paviedamili, što Šadko padazrajuć u datyčnaści da «terarystyčnaj dziejnaści» (artykuł 289 KK RB).
Vyhladaje, što da dyviersii ŭ Mačuliščach sam Šadko nie maje dačynieńnia. Adnak pakolki Łukašenka zajaviŭ pra «zmovu bolš čym 20 čałaviek», pad ruchavik represij mahli trapić i vypadkovyja ludzi. Nahadajem, što na aeradromie ŭ Mačuliščach byŭ vyviedzieny z ładu rasijski samalot-raźviedčyk, jaki navodziŭ rakiety i drony na celi va Ukrainie.
Na praktycy, kali mierkavać pa «spravie Aŭtuchoviča» (Anton Mielchier) i «spravie zmoŭščykaŭ» (Volha Hałubovič i Dzianis Kraŭčuk), hetyja abvinavačańni mohuć nie dajści da suda ŭvohule.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Vializnaja chvala aryštaŭ. Siarod zatrymanych — zahadčyk łabaratoryi i były śpiecnazaviec
Łukašenka kazaŭ pra «samyja vysokija technałohii» dla ataki ŭ Mačuliščach. A što pakazała BT?
Stała viadoma, chto taki Jakucik, pra jakoha pa ŭsioj Biełarusi dapytvali strałkoŭ, i ŭ čym jaho abvinavačvajuć
pucina ŭ haahu