Fota: pixabay
Jak paviedamlaje Mižnarodny instytut stratehičnych daśledavańniaŭ, na siońnia ŭkraincy źniščyli kala pałovy davajennaha parku tankaŭ T-72, jakich naličvałasia kala 2000 adzinak, što składała asnoŭnuju častku rasijskich tankavych sił.
U hady Druhoj suśvietnaj vajny savieckija zavody mahli vypuskać bolš za 1000 tankaŭ štomiesiac, bo mnohija traktarnyja i čyhunačnyja zavody byli pieraviedzienyja na vajskovyja rejki. Siońnia prakrucić taki truk budzie značna ciažej z-za składanaści elektroniki, što vykarystoŭvajecca ŭ sučasnych mašynach dla načnoha bačańnia, naviadzieńnia i mnostva inšych funkcyj.
Jak paviedamlaje vydańnie The Economist, siońnia ŭ Rasii zastaŭsia tolki adzin zavod pa vyrabie tankaŭ — vializny «Urałvahonzavod», pabudavany jašče ŭ 1930-ja hady. Adnak biezhaspadarlivaść i vielizarnyja daŭhi zapavolili madernizacyju zavoda. Rabočyja žartujuć, što źbirajuć tanki ŭručnuju. Rasijskaja «Novaja hazieta» paviedamlała, što zavod vyrablaje tolki 20 tankaŭ za miesiac. Naturalna, zadavolić vializny popyt, jaki pieravyšaje prapanovu ŭ šmat razoŭ, takoj kolkaściu niemahčyma.
Mienavita tamu paskorylisia tempy raskansiervacyi starych tankaŭ, jakich u Rasii mohuć zachoŭvacca tysiačy. Siońnia va Ukrainie sučasnyja rasijskija T-90 vajujuć razam ź vialikaj kolkaściu byccam by madernizavanych T-72B3S, pabudavanych dziesiacihodździ tamu. Navat z «palapšeńniami» staryja tanki sastupajuć novym madelam i ź mienšaj vierahodnaściu vyžyvajuć paśla ŭdaraŭ ukrainskich sił — tym nie mienš staryja mašyny ŭsio jašče karysnyja.
Zhodna z paviedamleńniami rasijskich miedyja, «Urałvahonzavod» adnaŭlaje kala vaśmi tankaŭ za miesiac, a try inšyja zavody pa ramoncie braniatechniki adnaŭlajuć prykładna pa 17. Taksama paviedamlajecca pra byccam by jašče dva zavody, jakija pavinny być uviedzienyja ŭ ekspłuatacyju ŭ najbližejšyja niekalki miesiacaŭ.
Takim čynam, choć Rasija i moža vyrablać tolki 20 novych tankaŭ u miesiac, nieŭzabavie jana zmoža adnaŭlać kala 90 sastarełych adzinak. Tym nie mienš, pavodle analizu Oryx, heta nie kampiensuje mierkavanych strat u 150 adzinak štomiesiac. A vytvorčaść moža być abciažaranaja deficytam vysokatechnałahičnych detalaŭ. Tak, Jeŭrakamisija śćviardžaje, što Rasija vykarystoŭvaje ŭ vajskovaj technicy čypy ź impartnych pasudamyjek i chaładzilnikaŭ.
Ukrainie i jaje sajuźnikam taksama brakuje mahčymaści chutka vyrablać tanki. Adziny va Ukrainie tankavy zavod pad Charkavam byŭ razburany bambiožkami jašče ŭ pačatku vajny. ZŠA, jakija paabiacali adpravić va Ukrainu 31 tank M1A2 Abrams, majuć adzin zavod, jaki moža vyrablać 15 tankaŭ štomiesiac. Vytvorčaść u inšych krainach Zachadu idzie hetak ža pavolna, što taksama pryvodzić da nieabchodnaści pošuku starych tankaŭ dla dapamohi ŭkrainskim abaroncam.
