45-hadovaja Kaja Kałas maje ŭsie šancy znoŭ uznačalić Estoniju. Fota Delfi
Parłamienckija vybary ŭ Estonii prynieśli pieramohu kiroŭnaj Refarmisckaj partyi (Eesti Reformierakond). Partyja Kai Kałas pavialičyła kolkaść mandataŭ z 34 da 37. Usiaho ŭ Ryjhikohu 101 miesca.
U toj ža čas vybary stali ciažkim udaram dla Centrysckaj partyi (Eesti Keskerakond), jakaja tradycyjna abapirałasia ŭ značnaj stupieni na ruskamoŭny elektarat. Jana straciła 10 mandataŭ i budzie mieć tolki 16.
Na dva mandaty mienš, čym raniej, atrymała Kansiervatyŭnaja narodnaja partyja (EKRE). Heta pravapapulisckaja partyja.
Na papulisckija partyi typu Centrysckaj i Kansiervatyŭnaj narodnaj va ŭsich krainach Jeŭropy ŭ apošnija dziesiacihodździ tradycyjna rabiła staŭku Rasija.
U toj ža čas vybary stali vialikim pośpiecham dla libieralnaj partyi «Estonija 200» (Erakond Eesti 200). Jana atrymała 14 mandataŭ, tady jak u raniejšym składzie parłamienta jana reprezientavanaja nie była.
U Ryjhikohu prajšli taksama sacyjał-demakraty i nacyjalna-kansiervatyŭnaja partyja «Dziela Ajčyny» (Isamaa), jakija składali minułuju ŭradavuju kaalicyju razam z refarmistami.
Na hetych vybarach u Estonii ŭpieršyniu bolš ludziej prahałasavała elektronna, čym žyŭcom — elektronna hałasavali pieravažna maładyja vybarcy. Estonija — adzin z suśvietnych lidaraŭ pa raźvićci ličbavych technałohij.
Pa vynikach vybaraŭ refarmisty zmohuć sami vybrać, z kim ustupić u kaalicyju. Ich partniorami pa ŭradzie zmohuć stać jak libierały, tak i raniejšyja kaalicyjanty.
U niadzielu vybary adbylisia i ŭ Litvie — miascovyja.
Najbolš hałasoŭ na ich atrymali dźvie mejnstrymnyja partyi: sacyjał-demakraty z 17% i kansiervatary (chryścijanskija demakraty — sajuz Ajčyny) z 16% hałasoŭ.
12% sabrali rehijanalnyja i łakalnyja śpisy, jakija tradycyjna karystajucca padtrymkaj na miascovych vybarach.
Vysokija vyniki pakazali taksama Sajuz zialonych i sialan (9%), Ruch libierałaŭ (7%), jaki ŭvachodzić va ŭradavuju kaalicyju, i navastvorany Sajuz demakrataŭ «Dziela Litvy» eks-premjera Saŭlusa Skviarnialisa z 6%.
U toj ža čas papulisckija partyi, jakija abapirajucca ŭ značnaj stupieni na ruskamoŭnaje nasielnictva, vyjšli sa stratami. Tak, Vybarčaja akcyja palakaŭ Litvy — Sajuz chryścijanskich siemjaŭ Valdemara Tamašeŭskaha nabrała 5% hałasoŭ. Stolki ž atrymała partyja «Svaboda i spraviadlivaść», u svoj čas zasnavanaja adchilenym ad ułady šlacham impičmientu prezidentam Rałandasam Paksasam, a Partyja pracy, zasnavanaja biznesoŭcam Viktaram Uspaskich, nabrała 4%.
Za pasadu mera Vilni ŭ druhim tury pazmahajucca kansiervatar Vałdas Bienkunskas i kandydat ad «Svabody i spraviadlivaści» Arturas Zuokas.
Na vyniki vybaraŭ u Litvie i Estonii paŭpłyvała vajna va Ukrainie. Vyhladaje, što suviaź z Maskvoj stała styhmaj navat dla ruskamoŭnaha vybarca.
