Ała Hałuška. Fota: sacyjalnyja sietki
Ała Hałuška była namieśnicaj staršyni Mahiloŭskaha harvykankama siem hadoŭ.
Jana kuryravała pytańni ideałahičnaj i infarmacyjnaj raboty z nasielnictvam, kantralavała pravilnaść dziaržaŭnaj moładzievaj palityki, adkazvała za suviaź harvykankama ź siłavymi strukturami. U śfieru jaje słužbovych abaviazkaŭ uvachodzili pytańni sacyjalnaj palityki i ŭzajemaadnosiny z nasielnictvam.
Na sajcie harvykankama ŭ raździele pra jaho strukturu ŭžo prybrany zdymak Hałuški i jaje imia. Zamiest ich źviestki pra novaha ideołaha Aleha Stalmašok. Vakantnaj zastajecca pasada pieršaha namieśnika staršyni harvykankama.
Čutki pra toje, što šmathadovaha mahiloŭskaha ideołaha źbirajucca zvalniać, źjavilisia nieŭzabavie paśla adstaŭki ŭ kastryčniku 2022 hoda kiraŭnika harvykankama Uładzimira Cumarava, jaki pasadu staršyni zajmaŭ dzieviać hadoŭ.
Krynicy, blizkija da harvykankama, nastojvajuć, što sa zvalnieńniem Cumarava pačałasia začystka haradskoj administracyi ad čynoŭnikaŭ, jakija doŭhi čas pracavali ź im.
Cumarava zamianiŭ kiraŭnik Babrujskaha harvykankama Alaksandr Studnieŭ. U adroźnieńnie ad daśviedčanaha biurakrata Cumarava, Studnieŭ pracavaŭ na čynoŭnickich pasadach, źviazanych z ekanomikaj.
U studzieni 2023 hoda byŭ zamienieny ŭvieś adździeł ideałahičnaj raboty haradskoj administracyi, što stała znakam i chutkaha zvalnieńnia Hałuški.
Staršynia Mahiloŭskaha harvykankama Alaksandr Studnieŭ (u centry) i novy ideołah harvykankama Aleh Stalmašok (sprava). Fota: t.me/moymogilev
1 sakavika harvykankamu byŭ pradstaŭleny novy ideołah Aleh Stalmašok, jakoha adpravili ŭ «horad» z abłvykankama, dzie jon byŭ načalnikam upraŭleńnia kultury.
Zvalnieńnia Ały Hałuški damahalisia mahiloŭskija apazicyjaniery. Jaje podpis stajaŭ na ŭsich dakumientach z abhruntavańniem zabarony akcyj pratestu, u tym liku za jaje adstaŭku. Pavodle zajaŭnikaŭ, Hałuška nie dazvalała pratestavać pa nadumanych pryčynach. Na čynoŭnicu aktyvisty skardzilisia Uładzimiru Cumaravu, jaki ŭ dziejańniach padnačalenaj nie znachodziŭ parušeńnia zakanadaŭstva.
Čas ad času čynoŭnica vychodziła ŭ ludzi, kali tyja buntavali, i trymałasia ŭ kampanii ź milicyjaj.
Tak było ŭ 2011 hodzie, kali ŭładaj arhanizoŭvalisia alternatyŭnyja maŭklivym pratestam imprezy. «Mnie strašna», — pryznavałasia tady słužboŭka padpałkoŭniku milicyi na adnoj ź ich.
Ličycca, što Hałuška — pavažanaja asoba ŭ piedahahičnym asiarodździ.
Jana była zaŭsiodnicaj na pieradvybarčych schodach u škołach. Zaklikała na naradach nastaŭnikaŭ hałasavać za pradstaŭnikoŭ ułady.
Naviedvała kulturnickija mierapryjemstvy, u tym liku biełaruskamoŭnyja, ale pa-biełarusku nie pramaŭlała na ich. Ustaŭlała tolki biełaruskija słovy.
Ału Hałušku vyłučała dyscyplinavanaść u vykanańni instrukcyj i zahadaŭ vyšejšych instancyj. Časam takaja čujnaść staviła jaje ŭ niajomkaje stanovišča.
Tak, naprykład, u 2018 hodzie jana dazvoliła akcyju «Nieśmiarotny połk» 9 maja, a zatym patrabavała pieranazvać jaje ŭ «Biełaruś pomnić».
Ała Hałuška (krajniaja sprava) na adnoj z prapahandysckich akcyj. Fota: octmogilev.gov.by
Hałuška była šakavanaja zatrymańniem u 2020 hodzie siabroŭki Iryny Žabaravaj, načalnicy ŭpraŭleńnia kultury harvykankama. Jaje asudzili na 5 hadoŭ kałonii ahulnaha režymu za chabar. U zvarocie da suda ab źmianieńni miery strymańnia dla źniavolenaj podpisu siabroŭki nie było.
Z krynic, blizkich da harvykankama, viadoma, što Hałuška paśla pratestu 2020 hoda nie asabliva «hareła žadańniem» zajmać nadalej svaju pasadu.
Masavy vychad mahiloŭcaŭ na vulicy čynoŭnicu napałochaŭ. Pratesnaja aktyŭnaść kancentravałasia na płoščy pad voknami harvykankama.
Hałušcy davodziłasia vystupać na akcyjach, jakija ŭłada arhanizoŭvała, kab prademanstravać padtrymku režymu Łukašenki. U pramovach Hałuški čulisia prymirenčyja notki.
1 sakavika Ału Hałušku staršynia Kastryčnickaha rajvykankama pavinšavaŭ z pryznačeńniem jaho namieśnikam. Zajmacca jana budzie tym ža, čym zajmałasia i ŭ harvykankamie.
Ała Hałuška ŭ Kastryčnickim rajvykankamie. Fota:t.me/mogilev
Ała Hałuška — daŭni namienkłaturny rabotnik režymu Łukašenki.
Naradziłasia jana ŭ Horkach — rajcentry na Mahiloŭščynie. Tam skončyła škołu, a 1995 hodzie — Mahiloŭski piedahahičny instytut imia Kulašova (ciapier Dziaržaŭny ŭniviersitet imia Kulašova).
Da 2002 hoda pracavała nastaŭnicaj ruskaj movy i litaratury ŭ 26-j mahiloŭskaj škole. Potym pačałasia jaje karjera čynoŭnicy-ideołaha harvykankama.
U 2005 jana skončyła Akademiju kiravańnia.
U 2014 hodzie Hałušku niečakana adpravili na pavyšeńnie, pryznačyŭšy načalnicaj upraŭleńnia ideałahičnaj pracy Mahiloŭskaha abłvykankama.
Ale praz dva hady hetak ža niečakana viarnuli ŭ harvykankam na pasadu namieśnicy staršyni. U słužbovaj bijahrafii čynoŭnicy jaje praca ŭ abłvykankamie časam nie zhadvajecca.
Ała Hałuška zastajecca kiraŭnicaj abłasnoj arhanizacyi Biełaruskaha sajuza žančyn.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Byłyja milicyjanty, nastaŭniki, hadavancy BRSM. Kaho staviać ideołahami ŭ vykankamach
«Zavistlivyje złopychanija krys». Rajonki Mahiloŭščyny družna apublikavali artykuły, jak kiepska žyviecca biełarusam u emihracyi. Čytać heta — asałoda
Trahikamiedyja ŭ Mahilovie: načalnik DAI paździekavaŭsia z mera za toje, što toj paździekavaŭsia ź jaho
