Fota: Apple TV+
Liaison («Suviaź») — dvuchmoŭny francuzska-brytanski sieryjał pra śpiecahientaŭ, jakija šukajuć kibierzłačyncaŭ. Jon spałučaje ekšn i niepradkazalny siužet, u jakim špijanaž i palityčnyja intryhi razhortvajucca paralelna ź luboŭnaj historyjaj. U typovym dla špijonskaha sieryjała styli, siužet — nasyčany, šmatsłojny i poŭny takoj kolkaści zdrady i zakulisnych pieramoŭ, što časam byvaje ciažka prasačyć matyvy niekatorych piersanažaŭ.
Vykarystańnie bieśpiłotnych latalnych aparataŭ i kibieršpijonskich prahram nadaje sieryjału sučasny vyhlad, jak i rašeńnie zakranuć składanyja adnosiny Vialikabrytanii ź ES paśla «brekzitu». Tym nie mienš, asnoŭnaja pryčynaj, kab pahladzieć Liaison, — nie heta, a vykanaŭcy hałoŭnych rolaŭ — Jeva Hryn i Viensan Kasiel.
Hetyja akciory dobra pasujuć dla daśledavańnia pryvabnaj sumiesi niebiaśpieki i ramantyki, jakuju prapanuje sieryjał. Kasiel — daŭni špijon Francyi, Hryn — aficyjny ahient Ministerstva ŭnutranych spraŭ Złučanaha Karaleŭstva.
Akciory demanstrujuć dobruju ihru: Kasiel adčužany i dziorzki, Hryn — surjoznaja i vielmi strymanaja. Chimija pamiž imi adčuvalnaja, i heta stvaraje vydatny pabočny siužet. Dadatkovaja składanaść ramantyčnaj historyi — u tym, što Elisan maje adnosiny ź inšym mužčynam, Albiertam (Denieł Frensis). Jany žyvuć razam ź jaho dačkoj ad papiarednich adnosin. Zdajecca, jon mała što viedaje pra minułaje Elisan z Habryelem, jak i hledačy.
Fota: Apple TV+
U centry ŭvahi Liaison — pahroza teraryzmu Brytanii ŭ vyhladzie kibieratak.
Ź pieršaj sieryi stanovicca viadoma, što adnačasova niekalki ahienctvaŭ šukajuć dvuch siryjskich chakieraŭ, jakija daviedalisia pra zapłanavanyja napady na jeŭrapiejskija krainy. Francuzski ŭrad daručaje hieroju Viensana Kasiela vyvieźci chakieraŭ ź Siryi i dastavić u biaśpiečnaje miesca ŭ Francyi. Adnak usio idzie nie pa płanie, i ŭ vyniku siryjcy apynajucca ŭ Łondanie — tudy ž za imi adpraŭlajecca Habryel i tam ža žyvie Elisan. Tym časam niechta ŭzłomvaje łondanskuju infrastrukturu i takim čynam błakuje dambu, praz što Temza vychodzić ź bierahoŭ i zataplaje horad. Paźniej chakiery adklučajuć navihacyju čyhunki, što pryvodzić da łabavoha sutyknieńnia pamiž hruzavym i pasažyrskim ciahnikom, poŭnym studentaŭ.
I brytancy, i francuzy chočuć trapić na śled złačyncaŭ, adnak paśla «brekzitu» jany nie ŭ najlepšych adnosinach. I tyja, i druhija pracujuć nad tym, kab pierasiahnuć pradstaŭnikoŭ inšaj krainy i abaranić intaresy svajoj (choć vysnova, da jakoj padšturchoŭvaje sieryjał, — «antybrekzitaŭskaja»: pierad transnacyjanalnymi pahrozami Brytanija nie abydziecca bieź Jeŭropy).
Tak jak heta špijonski tryler, to nie ŭsie piersanažy ŭ im takija, jakimi nam zdajucca, i da apošniaha epizodu vy možacie nie viedać, kamu pavinny daviarać hałoŭnyja hieroi i ci pavinny daviarać adno adnamu.
Akramia incydentaŭ z chakierami i pačućciovaj napružanaści pamiž Habryelem i Elisan, na ekranie razhortvajecca składanaja palityčnaja zmova z udziełam francuzskaha ŭrada i dvuch hałoŭnych daradcaŭ prezidenta — Ła Roš i Dydjo. Nieŭzabavie vy zrazumiejecie, chto ź ich sumlenny, a chto pracuje tolki dla siabie i svaich intaresaŭ.
Fota: Apple TV+
Krytyki abvinavačvajuć sieryjał u zabłytanaści i adnačasova pradkazalnaści siužeta, niedastatkova haračych adnosinach hierojaŭ Hryn i Kasiela, a taksama nieraskrytych charaktarach piersanažaŭ druhoha płana. Jak piša ŭ svaim ahladzie Klint Uortynhtan, «ustupnaja zastaŭka bolš jarkaja, čym sam sieryjał: płaŭny techna-džazavy trek ad Plumm hučyć pa-nad infračyrvonymi kadrami, na jakich para, što zajmajecca kachańniem, kadry revalucyi i vyjavy chmaračosaŭ u ličbavaj apracoŭcy śvietłavymi linijami. Usio heta abiacaje hlancavy, sučasny, seksualny tryler, da jakoha sieryjał nabližajecca tolki krychu».
U niečym ahladalnik maje racyju, adnak pry hetym Liaison nielha nazvać nudnym: u im šmat intryh, dziejańnia, palityki, nadzionnaści, pryhožych kadraŭ i navat ramantyki. A ŭ kantekście napružanaj palityčnaj situacyi ŭ śviecie zakranutyja temy zichaciać novymi farbami i dajuć dadatkovyja nahody dla rozdumu. Moža być, vam nie ŭdasca adkryć ničoha novaha i ŭzrušalnaha, ale zajmalna prabavić čas — zmožacie.
Vyjšaŭ trejler filma pra muškiecioraŭ ź Viensanam Kasielem i Jevaj Hryn
Nad filmam pra Barbi pracuje Hreta Hiervih, viadomaja svaimi pracami ŭ niezaležnym kino
