Ivan Krasoŭski ŭ 2020-m
Ivan raskazvaje, što pryjechaŭ va Ukrainu jašče ŭ 2021 hodzie i, kab lehalizavacca, razam ź dziaŭčynaj padaŭ dakumienty na biežanctva. Praz toje, što mihracyjnaja słužba była vielmi zahružanaja, chłopca zaprasili tudy na admysłovaje intervju tolki ŭ siaredzinie lutaha 2022 hoda, ale tady Ivan lažaŭ u balnicy.
Čynoŭniki pahadzilisia pieranieści sustreču, ale praz paru dzion paśla taho, jak Krasoŭski vyjšaŭ z balnicy, pačałasia vajna. Biełarus tłumačyć, što tady nichto nie dumaŭ pra lehalizacyju, dy i mihracyjnaja słužba ŭ Kijevie zapracavała naležnym čynam tolki ŭ vieraśni 2022 hoda.
Ivana zatrymali ŭ Kijevie prosta na vulicy 17 kastryčnika i nakiravali ŭ mihracyjnuju palicyju, dzie vypisali pastanaŭleńnie ab departacyi za nielehalnaje znachodžańnie va Ukrainie. Taksama chłopiec atrymaŭ štraf prykładna ŭ piać tysiač hryŭniaŭ, ale nie staŭ jaho płacić, bo źbiraŭsia padavać na apielacyju. Ivan tłumačyć: «Kali b ja apłaciŭ štraf, heta mahło b usprymacca tak, nibyta ja zhodny z hetym rašeńniem».
Fota: telehram-kanał Iry Łukašenka
Samo pastanaŭleńnie ab departacyi chłopcu dasłali praz 28 dzion paśla zatrymańnia, da hetaha jon mieŭ tolki kopiju pratakoła. Potym Ivan pačaŭ rychtavacca da apielacyjnaha suda — pieršaha z mahčymych. Jamu dapamahaŭ biaspłatny advakat ad arhanizacyi «Prava na zachist», jany supracoŭničajuć z UVKB AAN (Upraŭleńnie viarchoŭnaha kamisara AAN pa spravach biežancaŭ).
Sam sud pieranosili pa prośbach mihracyjnaj słužby niedzie ź siaredziny listapada da lutaha. Byli dva pasiedžańni, 9 i 28 lutaha.
«Rasčaravaŭsia va ŭkrainskaj sudovaj sistemie, bo jana niejkaja niehnutkaja, — dzielicca Ivan. — Naprykład, moj advakat udzielničaŭ u pasiedžańniach anłajn, i z boku suda pastajanna źnikała ź im suviaź. U suda niama alternatyŭnaha płana dla takich situacyj, ale ž zaraz idzie vajna, i, napeŭna, treba niešta źmianiać. Kali niama śviatła, niama i internetu. Usio heta možna vyrašyć, naprykład, źviazacca z advakatam pa sotavaj suviazi ci ja b moh razdać internet. Ale my siadzieli na sudzie i časam amal nie čuli majho advakata».
Praz prablemy z suviaźziu pasiedžańnie zaciahnułasia. Pavodle Ivana, sudździa da hetaha nie była hatovaja: «Kali ja vystupaŭ, sudździa mianie praktyčna nie słuchała. Jana hutaryła z sakratarom pra toje, jakim budzie jaje nastupnaje pasiedžańnie».
Zaraz chłopiec rychtujecca padavać apielacyju. Vierahodna, jon taksama pojdzie na kantraktnuju słužbu, kab mieć mahčymaść pryjechać na pieradavuju i praciahnuć zdymać film pra vajnu, jakim Ivan zajmajecca ź leta. Taksama ź im źviazalisia z Kaardynacyjnaj rady — Ivan spadziajecca, što, mahčyma, ich pasiarednictva jamu dapamoža.
«Pieršapačatkova ja nie klikaŭ na sudy presu. Pa-pieršaje, razumieŭ, što zaraz prablemy z adklučeńniem śviatła i sud mohuć pieranasić, i pa-druhoje, jaho mohuć pieranieści praź mihracyjonku. Płanavaŭ, što kali prajhraju sud, budu šukać ahałosku pierad apielacyjnym sudom, bo jaho bolš ciažka pieranieści — heta vyšejšaja instancyja. Dumaŭ, kali padymać ahałosku, to niejkija šansy jość, bo Ukrajina — takaja dziaržava, dzie mnohaje vyrašajecca tolki ahałoskaj», — raskazvaje były palitviazień.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»