Brest
Pieralik, užo čaćviorty ŭ historyi ŭstanovy, prezientavali supracoŭniki centra Anton Radniankoŭ i Alaksandr Aŭtuška-Sikorski. Kamanda centra praanalizavała 40 samych vialikich haradoŭ krainy, u kožnym ź jakich žyvie bolš za 19 tysiač čałaviek, pa čatyroch kryteryjach.
Pačali z demahrafičnaj ustojlivaści — to-bok z pakazčyka taho, nakolki ŭ horadzie maładoje nasielnictva i jak chutka jano raście. Pa hetym paramietry vyjhraje paŭdniovy zachad krainy: pieršyja piać miescaŭ zajmajuć Žłobin, Ivacevičy, Brest, Pinsk i Hrodna. Dalej abmiarkoŭvali stan ekanomiki (zarobki, biespracoŭje, inviestycyi i samastojnaść miascovych biudžetaŭ), i ŭ lidarach centr krainy: Minsk, Dziaržynsk, Salihorsk, Smalavičy i Rečyca.
Trecim paramietram dla paraŭnańnia vystupiła jakaść žyćcia, jaje vymiarali pa kolkaści daktaroŭ, studentaŭ, uzroŭniu złačynnaści i rejtynhu słavutaściej. Lidzirujuć u asnoŭnym abłasnyja centry, ale nie tolki: Minsk, Hrodna, Viciebsk, Połack, Pinsk. Taksama ekśpierty acanili prajaŭlenaść hramadska-palityčnych praktyk. U topie śpisa Dziaržynsk, Minsk, Salihorsk, Smalavičy i Navapołack.
Raniej u rejtynhu ŭličvałasia jašče i turystyčnaja pryvabnaść haradoŭ, ale hetym razam ekśpierty ad jaje admovilisia. Jany źviartajuć uvahu, što niekatoryja krainy paśla padziej 2020 hoda raili svaim hramadzianam nie jeździć u Biełaruś, taksama ŭ krainie ciapier nie pracujuć niekatoryja zamiežnyja servisy nakštałt Booking.com, dy i ahulnaja kolkaść turystaŭ z zamiežnych krain pamienšała ŭ Biełarusi za apošnija hady ŭ razy. Ź inšaha boku, najaŭnaść u horadzie słavutaściej i miescaŭ, jakija varta pabačyć, pavyšaje jakaść žyćcia i samich haradžan, tamu hety faktar uličvali ŭ adpaviednym paramietry.
Jašče niekalki nazirańniaŭ ad ekśpiertaŭ: u haradach značna pamienšała ludziej piensijnaha ŭzrostu, i heta moža być źviazana, na dumku daśledčykaŭ, z pandemijaj kavidu i jaje niebiaśpiekaj dla hetaj katehoryi nasielnictva.
Taksama daśledčyki adznačajuć, što apošnim časam u Biełarusi mocna źniziłasia kolkaść haryzantalnych suviaziej: kali pierakładać heta na prostuju movu, to ludzi daviarajuć tolki tym, z kim mohuć sieści za adzin stoł.
Kažučy pra ahulny rejtynh, lidzirujuć u im Minsk, Hrodna i Brest — harady z dobrymi zarobkami i vysokaj jakaściu žyćcia, u Hrodna i Breście da taho ž žyvie šmat maładych ludziej. Vysokija pazicyi ŭ pramysłovych monaharadoŭ — havorka pra Salihorsk, Žodzina, Žłobin, Navapołack i Mazyr.
Taksama dobryja pazicyi majuć harady-spadarožniki Minska — Dziaržynsk i Smalavičy: jany vyjhrajuć za košt pamieru inviestycyj, vysokaj hramadskaj aktyŭnaści, dobraj demahrafii i zarobkaŭ.
Rejtynh, składzieny daśledčykami Centra novych idej
Što da nižniaj častki rejtynha, to ekśpierty adznačajuć try harady, pramysłovaść u jakich dažyvaje svoj čas, — heta Barysaŭ, Baranavičy i Babrujsk. Taksama na apošnija pazicyi trapili harady ŭschodniaj Biełarusi, u tym liku Rahačoŭ, Kryčaŭ, Orša, Pružany i Asipovičy.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Žudasny novy śviet. Pradkazańni adnaho z samych apakapaliptyčnych hieapalityčnych stratehaŭ
Češski demahrafičny cud: u ich była samaja nizkaja naradžalnaść u śviecie, siońnia jany lidary ŭ Jeŭropie
AAN vyśvietliła, jak budzie mianiacca demahrafija Ziamli ŭ hetym stahodździ
