Pa słovach jurysta Jany Hielmiel, na źniavolenych akazvajuć cisk u kałonijach Samarskaj i Rastoŭskaj abłaściej, Krasnadarskaha kraju i rehijonaŭ Paŭnočnaha Kaŭkaza.
«Pryjazdžajuć apieratyŭniki MUS abo FSB, abiacajuć padniać staryja spravy 10—20-hadovaj daŭniny, pa jakich termin daŭnaści ŭžo prajšoŭ, pałochajuć, što buduć zavodzić spravy pa tych, chto admaŭlajecca iści na vajnu», — zajaviła Hielmiel.
Pra padobnyja mietady cisku ŭ kałonijach Piermskaha kraju taksama paviedamiła pravaabaronca Aksana Asaulenka. U prykład jana pryviała vypadak źniavolenaha, jakomu da vyzvaleńnia zastavałasia piać miesiacaŭ. Pa słovach maci mužčyny, u apošniaj razmovie jon daŭ joj zrazumieć, što jaho prymusili padpisać kantrakt z PVK «Vahnier».
Jašče adzin juryst, jaki paprasiŭ nie nazyvać jaho imia, paćvierdziŭ, što źniavolenych viarbujuć z dapamohaj pahroz. Pa danych jurysta, najbolš aktyŭny nabor idzie ŭ kałonijach rehijonaŭ, jakija znachodziacca niedaloka ad ukrainskaj miažy.
Taksama krynicy «Ahienctva» paviedamlajuć, što ŭ śledčych izalatarach aryštavanym pačali prapanoŭvać ustupić u PVK «Vahnier», abiacajučy pry hetym zakryć kryminalnyja spravy. Surazmoŭcy «Ahienctva» paviedamili, što takaja praktyka skłałasia ŭ SIZA-1 Samary, u SIZA-5 Maskvy, a taksama ŭ izalatary ŭ Piarmi.
Na dumku Jany Hielmiel, novyja mietady viarboŭki rasijskich źniavolenych abumoŭleny tym, što ŭsio mienš ludziej hatova zaklučać kantrakt z PVK, tak jak da kałonij pačali dachodzić źviestki ab liku zabitych i paranienych siarod tych, chto pahadziŭsia adpravicca na vajnu letam—vosieńniu 2022 hoda.
