Siarod hałoŭnych zadač ArtPower Belarus — padtrymańnie biełaruskich kulturnickich prajektaŭ, jak u krainie, tak i za miažoj. Sami tvorcy, arhanizacyi dy inicyjatyvy mohuć pretendavać na mini-hranty — ad 1000 da 5000 jeŭra, midzi-hranty — ad 5000 da 60000 jeŭra, a taksama hranty mabilnaści, jakija možna skarystać na pajezdki, nieabchodnyja dla pracy, navučańnia, daśledavańniaŭ dy inšaha, — u siarednim na 2000 jeŭra.
«My starajemsia nie hublać času i spryjać tamu, kab navat u takich składanych umovach biełaruskaja kultura žyła i raźvivałasia, — kaža kiraŭnik Biełaruskaj Rady kultury Siarhiej Budkin. — ArtPower Belarus stvaraŭsia akurat dla taho, kab nadać hałasam tvorcaŭ bolš mocnaje hučańnie, a ŭ ich samich uzmacniłasia adčuvańnie zapatrabavanaści i važnaści ich mierkavańnia. Spadziavajusia, što dziakujučy prajektu ŭ roznych śfierach źjaviacca važnyja i natchnialnyja tvory, pajezdki ŭ miežach prahramy mabilnaści daduć novy dośvied i kantakty, a samo kulturnickaje kamjunici ŭzmacnicca».
Za pieršy hod pracy ArtPower Belarus źbirajecca vyłučyć nie mienš za 15 mini-hrantaŭ na ahulnuju sumu 75000 jeŭra, nie mienš za 11 midzi-hrantaŭ na ahulnuju sumu 440000 jeŭra i nie mienš za 50 hrantaŭ mabilnaści na ahulnuju sumu 100000 jeŭra. Prajekt raźličany na 28 miesiacaŭ, zaklikaŭ padavać zajaŭki na midzi-hranty budzie dva. U miežach pieršaha koła dasyłać prajekty možna da 12 sakavika 2023 hoda. Zajaŭki na mini-hranty i hranty mabilnaści možna padavać ciaham usiaho pieryjadu — razhladacca jany buduć kožny kvartał.
«My ź nieciarpieńniem čakajem śviežyja idei z roznych śfier kultury, a taksama mižsiektarnyja inicyjatyvy. Prajektnaja padtrymka razam z prahramaj mabilnaści — cudoŭnaja mahčymaść dla tvorcaŭ być pačutymi, zajavić pra siabie i svaje idei dy atrymać nie tolki finansavy składnik, ale i kaštoŭnuju zvarotnuju suviaź ad ekśpiertnaj supolnaści», — kamientuje pradstaŭnica resursnaha centru Biełaruskaj rady kultury Elina Kałnibałockaja.
Kožny z padadzienych prajektaŭ budzie spačatku razhladacca ekśpiertnaj, a paśla adboračnaj kamisijami. Pieršaja budzie farmavacca z admysłoŭcaŭ śfiery, u druhuju ŭvojduć 3 pradstaŭniki Dackaha instytutu kultury, 2 pradstaŭniki Biełaruskaj rady kultury i 2 ekśpierty zvonku.
Padać zajaŭku na hrant možna na sajcie Resursnaha centru Biełaruskaj rady kultury. Usie zajaŭki buduć zachoŭvacca ŭ biaśpiečnym miescy.
Biełaruskaja rada kultury i Dacki instytut kultury taksama zaprašajuć tvorcaŭ na infasiesiju 7 lutaha, admysłova arhanizavanuju dla taho, kab adkazać na pytańni, datyčnyja ArtPower Belarus, padačy zajavak dy adboru prajektaŭ.
