Daśledčyki nazirali, jak dzieci ŭzajemadziejničajuć z družalubnymi sabakami, i pryjšli da vysnovy, što naša imknieńnie praciahnuć ruku dapamohi raspaŭsiudžvajecca i na žyvioł z samych rańnich hadoŭ. Navukoŭcy navat miarkujuć, što mienavita heta kaliści dapamahło našym prodkam pryručyć žyvioł, piša The Guardian.
Pa słovach antrapołaha-evalucyjanista i pieršaha aŭtara daśledavańnia Rachny Redździ, jakaja pracuje ŭ Harvardskim univiersitecie i Univiersitecie Dziuka, daśledčykaŭ zacikaviła toje, jak rana prajaŭlajecca ŭ čałavieka altruizm. Navukoŭcy vyjavili, što dzieci nie tolki mohuć razumieć žadańni sabak, ale i hatovyja dapamahać im, niahledziačy na toje, što šancy, što žyvioły zmohuć adździačyć im za «pasłuhu», nikčemna małyja.
Redździ adznačaje, što z samaha pačatku našaha raźvićcia my demanstrujem schilnaść pavodzić siabie prasacyjalna ŭ dačynieńni da inšych ludziej, sprabujučy zrazumieć, što adbyvajecca ŭ ich dušy. Antrapołah taksama adznačaje, što navat małyja dzieci demanstrujuć matyvacyju i zdolnaść raspaŭsiudžvać «dapamahajučyja pavodziny» na žyvioł.
Ciapier daśledčyki miarkujuć, što mienavita takija družalubnyja pavodziny dziaciej, jakija faktyčna tolki vučacca chadzić i razmaŭlać, kaliści dapamahli ludziam dasiahnuć roskvitu ŭ peŭnych aśpiektach va ŭsim śviecie. Navukoŭcy dumajuć, što altruistyčnyja ŭčynki, siarod jakich, naprykład, pakidańnie ježy žyviołam, mohuć lažać u asnovie taktyki pryručeńnia roznych vidaŭ žyvioł, u tym liku katoŭ, sabak, karoŭ, śviniej, aviečak i koniej. Naprykład, bolš rannija daśledavańni pakazvajuć, što sabaki hienietyčna adździalilisia ad vaŭkoŭ jašče 23 tysiačy hadoŭ tamu — mienavita stolki naličvaje naša sumiesnaja evalucyjnaja historyja z hetymi žyviołami.
Pa słovach Redździ, pryručeńnie žyvioł u rečaisnaści stała važnym etapam žyćcia čałavieka i adyhrała značnuju rolu ŭ našym vyžyvańni i raźvićci. Navukoŭca adznačaje, što da hetaha času zastajecca zahadkaj, jak mienavita my pryjšli da pryručeńnia žyvioł, adnak vysnovy, zroblenyja padčas nastupnaha ekśpierymienta, vidać, mohuć pralić śviatło na padziei minułaha.
Padčas daśledavańnia navukoŭcy adabrali 97 dziaciej va ŭzroście ad 20 da 47 miesiacaŭ, a paśla panazirali, jak jany ŭzajemadziejničajuć z tryma sabakami. Daśledavańnie prachodziła ŭ dziciačaj łabaratoryi Mičyhanskaha ŭniviersiteta. Padčas ekśpierymienta navukoŭcy kidali cacki abo prysmaki pa-za dasiažnaściu žyvioł — za pieraharodku z boku dziciaci — i nazirali.
Vyśvietliłasia, što dzieci ŭ dva razy čaściej addavali cacki i prysmaki žyviołam, kali sabaki prajaŭlali da ich cikavaść, naprykład, skuholili abo sprabavali schapić pradmiety (łasunki).
Daśledavańnie pakazała, što
— dzieci dapamahali ŭ 50% vypadkaŭ, kali sabaki cikavilisia pradmietam abo łasunkam;
— dzieci dapamahali ŭ 25%, kali žyvioły nie cikavilisia pradmietam abo łasunkam.
Akramia taho, daśledčyki pryjšli da vysnoŭ, što małyja z bolšaj vierahodnaściu dapamahali žyviołam, kali ŭ ich siamji jość hadavaniec, kali žyvioła pavodziła siabie bolš aktyŭna, a taksama kali ŭ centry ŭvahi byŭ jaki-niebudź łasunak, a nie cacka.
Pa słovach staršaha aŭtara daśledavańnia prafiesara Hienry Viełmana, raniej navukoŭcy vyjavili, što dzieci z usich sił sprabujuć dapamahčy ludziam, navat nieznajomym. Adnak navukoŭcy nie viedali, ci prajaŭlajecca heta tolki ŭ dačynieńni da ludziej, jakija b mahli taksama zrabić niešta ŭ adkaz, ci i ŭ adnosinach da žyvioł. Ciapier daśledčyki miarkujuć, što maleńkija dzieci zdolnyja «čytać» sabak i dapamahać im u vypadku nieabchodnaści.
U budučyni navukoŭcy płanujuć adkazać na pytańnie, ci hetak ža dobra staviacca dzieci da inšych žyvioł, naprykład, da katoŭ, trusoŭ, kurej, karoŭ i koniej.
