Jašče ŭ vieraśni 2022 hoda YouTube abviaściŭ, što stvaralniki videa zmohuć atrymlivać dachod ad rekłamy ŭ Shorts. Adnak heta źmiena patrabuje taho, kab usie, chto siońnia źjaŭlajecca častkaj partniorskaj prahramy YouTube, padpisali peŭnyja damoŭlenaści, jakija nie zaležać ad taho, ci źbirajecca karystalnik zarablać na Shorts. Praktyku padziełu hrošaj za rekłamu kampanija ŭžyvała i raniej dla svaich zvyčajnych videa, a ciapier heta ŭ tym liku budzie mahčyma i dla Shorts.
YouTube zajaŭlaje, što ŭvodzić modulnuju sistemu ŭmoŭ pa partniorskaj prahramie — i heta aznačaje, što kožny ŭdzielnik prahramy pavinien budzie padpisać bazavaje pahadnieńnie, u jakim budzie apisana, što možna raźmiaščać na sajcie i jak adbyvajecca apłata. Heta datyčyć i tych aŭtaraŭ, jakija ŭžo partniory YouTube. Videachostynh kaža, što ŭ ich budzie čas da 10 lipienia 2023 hoda, kab pryniać novyja ŭmovy, inakš ich mahčymaść manietyzacyi z dapamohaj płatformy budzie adklučana, i im pryjdziecca znoŭ padavać zajaŭku na ŭdzieł u prahramie.
U YouTube taksama isnujuć i dadatkovyja pahadnieńni pa manietyzacyi, jakija stvaralnik kantentu moža zaklučyć paasobku: pahadnieńnie Shorts, dasiažnaje z 1 lutaha, budzie davać dachod ad rekłamy, jakaja budzie źjaŭlacca ŭ stužcy pamiž zvyčajnymi Shorts, i pahadnieńnie Watch Page, jakoje achoplivaje inšy kantent na płatformie.
Heta abjava źjaviłasia ŭ suviazi z tym, što YouTube pierahladaje patrabavańni dla ŭdziełu ŭ partniorskaj prahramie. Ciapier stvaralniku kantentu dla hetaha nieabchodna nabrać 4 000 hadzin zvyčajnaha kantentu abo atrymać 10 miljonaŭ prahladaŭ u publičnych Shorts ciaham apošnich 90 dzion pierad pahadnieńniem.
U lubym vypadku dla atrymańnia prava na ŭdzieł u prahramie ŭ karystalnika na kanale pavinna być nie mienš za 1 000 padpisčykaŭ.
YouTube ŭpeŭnivaje, što taki modulny padychod dazvolić «dadavać novyja mahčymaści manietyzacyi ŭ budučyni bieź nieabchodnaści adnaŭlać abo mianiać usio pahadnieńnie ab manietyzacyi». Videachostynh taksama zajaŭlaje, što karystalniki zmohuć admovicca ad peŭnych modulaŭ manietyzacyi paśla padpisańnia pahadnieńnia.
Čytajcie jašče:
6 biełaruskamoŭnych jutub-kanałaŭ, jakija vy mahli prapuścić
Kiraŭnictva «UKantakcie» zapatrabavała viarnuć supracoŭnikaŭ, jakija źjechali z Rasii
Paśla publikacyi hetaha artykuła sajt «Našaj Nivy» pieražyŭ praciahłuju ddos-ataku
