Kanał TVP, jaki tranślavaŭ šou, finansuje kirujučaja partyja PiS («Prava i spraviadlivaść», viadomaja niehatyŭnym staŭleńniem da ŁHBT-supolnaści i łabirujučaja hamafobnyja zakony).
Jak śćviardžajuć miedyja, arhanizatary kancerta, nie viedajučy amal ničoha pra hurt Black Eyed Peas, zaprasili jaho tolki tamu, što ŭ jaho naźvie jość słova, suhučnaje z nazvaj partyi (PiS), kab dahadzić svaim sponsaram.
Z-za pazicyi z TVP admoviłasia supracoŭničać brytanskaja śpiavačka Miełani Si, tamu kanału terminova pryjšłosia šukać zamienu. U vyniku vystupić pahadzilisia muzyki sa The Black Eyed Peas, jakija padčas kancerta vykazali padtrymku ŁHBT-supolnaści i ŭsim, chto sutyknuŭsia ź nianaviściu sioleta.
«Hetuju pieśniu my pryśviačajem usim tym, chto adčuŭ nianaviść u hetym hodzie. Jaŭrei, my vas lubim; ludzi afrykanskaha pachodžańnia pa ŭsim śviecie, my vas lubim; ŁHBTK-supolnaści, my vas lubim», — kazaŭ sa sceny salist hurta will.i.am.
Vystup muzykaŭ vyklikaŭ hnieŭ polskich kansiervatyŭnych palitykaŭ. «Homaprapahanda na TVP za 1 miljon dalaraŭ. Hańba!» — napisaŭ deputat Siejma Januš Kavalski.
«Prasoŭvańnie ŁHBT na TVP2. Soram!» — aburyŭsia deputat polskaha parłamienta ad Padkarpaćcia Marcin Varchał. Pavodle jaho słoŭ, «viesiałość nielha vykarystoŭvać dla raspusty».
«I ŭsio heta ŭ dzień śmierci Papy, jaki vyznačyŭ, što homaseksualny šlub supiarečyć usim kulturam, jakija isnavali da siońniašniaha dnia, i jaki admaŭlaje ŭsie tradycyi čałaviectva. Niama słoŭ», — skazaŭ jon.
Paśla vystupu arhanizatary kancerta zajavili, što ŭsio prajšło tak, jak i było zadumana. Viadučy kancerta Tomaš Kamiel zajaviŭ, što «ŭsio było ŭzhodniena na samym vysokim uzroŭni, u tym liku kožny elemient adzieńnia».
