Vajenkary adznačajuć, što heta adbyłosia, jak tolki pieršyja marazy skavali ziamlu.
Čyrvonapapoŭka — vioska, u jakoj da vajny žyło kala 900 čałaviek. Jana maje stratehičnaje značeńnie, bo kantrol nad joju pierarazaje darohu Kramiannaja — Svatava. Paśla hetaha z Kramiannoj zastajecca tolki daroha na Rubiežnaje.
Vajenkary paviedamlajuć, što z Čyrvonapapoŭki ŭkrainskija vojski atakujuć u kirunku Žytłoŭki — apošniaha nasielenaha punkta na podstupach da horada Kramiannaja.
Raniej ukrainskija vojski paśla doŭhich bajoŭ vyzvalili viosku Makiejeŭku na paŭnočny zachad ad Čyrvonapapoŭki i zaniali Nieŭskaje na poŭdzień ad Makiejeŭki i Karmazinaŭku na poŭnač ad jaje.
Bai ŭ hetym rajonie na zachadzie Łuhanskaj vobłaści iduć zaciatyja. Pamiž vyzvaleńniem Nieŭskaha z Karmazinaŭkaj i susiedniaj ź imi Makiejeŭki prajšoŭ 21 dzień. Ad času zaniaćcia Makiejeŭki da ŭstupleńnia ŭkrainskich vojskaŭ u Čyrvonapapoŭku prajšło jašče 18 dzion.
«Aktyŭnyja bajavyja dziejańni iduć pa ŭsioj linii frontu ŭ rajonie horada Kramiannaja i ŭ rajonie trasy, jakaja złučaje Kramiannuju sa Svatavam. Chutčej za ŭsio, praciŭnik praciahnie cisnuć na hetym učastku frontu ŭsimi najaŭnymi ŭ jaho rasparadžeńni siłami, imknučysia raźvić svoj siońniašni pośpiech», — piša błohier WarGonzo.
Paśla vyzvaleńnia Limana ŭ pačatku kastryčnika pieradavyja ŭkrainskija vojski zamacavalisia ŭ Torskim, Ciarnach i zaniali vakolicy Kramiannoj — horada za 35 kiłamietraŭ na ŭschod ad Limana. Rasijskija vojski vystraili novuju liniju abarony na zachad ad linii Kramiannaja — Svatava, pa rečcy Žarabiec.
«Paŭstaje pytańnie ab utrymańni Kramiannoj — adnaho z klučavych punktaŭ, jakija zabiaśpiečvajuć paŭnočny fłanh abarony Lisičanska. Kramiannuju zdavać nielha ni ŭ jakim razie», — zaklikaŭ pałkoŭnik Hirkin.
Ciapier rasijskija vojski adcisnutyja ad rečki Žarabiec da rečki Krasnaj, jakaja ciače na 10—15 kiłamietraŭ na ŭschod.
Kramiannaja — horad, u jakim da vajny žyło 18 tysiač čałaviek. Ën staić na levym bierazie Sievierskaha Danca adrazu nad dalinaj raki. Ad jaho 30 km da Lisičanska. Kramiannuju rasijanie zaniali 18 krasavika.
Nahadajem, što 1 kastryčnika rasijskaje Minabarony pryznała stratu Limana. «U suviazi sa stvareńniem pahrozy akružeńnia sajuznyja vojski byli adviedzienyja z nasielenaha punkta Liman na bolš vyhadnyja rubiažy», — havaryłasia ŭ zajavie Maskvy.
Na poŭnač ad hetych terytoryj ukraincy stvaryli šmatlikija płacdarmy na levym bierazie raki Askoł i nastupajuć ad Łazavoj, Kupianska dy Dvurečnaj.
Svatava — rajcentr na poŭnačy Łuhanskaj vobłaści, da vajny ŭ im žyło 16 tysiač čałaviek. Rasijskija vojski akupavali horad 6 sakavika, na 11-ty dzień vajny.
Vyzvaleńnie Svatava abo Kramiannoj mieła b jak stratehičnyja, tak i maralnyja nastupstvy. Heta byŭ by pieršy vyzvaleny rajcentr Łuhanskaj vobłaści, jakaja na siońnia amal całkam kantralujecca rasijskimi vojskami.
U cełym na łuhanskim kirunku inicyjatyvu zachoŭvaje ŭkrainskaja armija.
