Fota: Konstaintyn Liberov / AP
Vysokapastaŭlenyja čynoŭniki administracyi Bajdena zajaŭlajuć, što vajennyja apieracyi Rasii va Ukrainie zastanucca ŭ tupiku i ŭ nastupnym hodzie, bo niadaŭnija pośpiechi Ukrainy sarvali nadziei Maskvy zachapić bolš terytoryj u rajonach, jakija Pucin sprabavaŭ pradstavić jak histaryčnuju častku Rasii.
Zimovaja paŭza moža praciahnucca da šaści miesiacaŭ. Doždž i miakkaja ziamla ŭ kancy listapada zamarudziać ruch abiedźviuch armij. Zatym, kali tempieratura źnizicca i ziamla zamierźnie, tankam i hruzavikam budzie lahčej pierasoŭvacca. Ale vierahodnaść mocnych śniehapadaŭ i jašče bolš chałodnaha nadvorja moža abciažaryć dla drenna abstalavanaj rasijskaj armii praviadzieńnie luboha novaha nastupu.
«Vy ŭžo bačycie, što daždžlivaje nadvorje va Ukrainie trochi zapavolvaje chod padziej», — zajaviŭ žurnalistam na minułym tydni Kolin Ch. Kal, namieśnik ministra abarony pa pytańniach palityki.
U takich umovach, pa słovach aficyjnych asob ZŠA, Rasija, vierahodna, uzmocnić svaje ataki na infrastrukturu, kab teraryzavać ukraincaŭ.
Čynoŭniki administracyi Bajdena kažuć, što vielmi važna vykarystoŭvać zimovaje zapavoleńnie dla adnaŭleńnia pastaŭki Ukrainie abarončaj i nastupalnaj zbroi.
U čaćvier Pientahon abviaściŭ pra zakupku zbroi jašče na 400 miljonaŭ dalaraŭ, uklučajučy mabilnyja srodki SPA małoj dalokaści Avenger, jakija stralajuć rakietami Stinger.
Ale aficyjnyja asoby ŭ Kijevie kažuć, što im spatrebicca bolš sistem supraćpavietranaj abarony, tankaŭ i źniščalnikaŭ, kab viarnuć rajony, jakija Pucin niezakonna anieksavaŭ za apošnija dzieviać miesiacaŭ vajny.
Sa słoŭ niekatorych vajskovych analitykaŭ, padčas paŭzy abodva baki taksama praviaduć pierapadrychtoŭku vojskaŭ i padrychtujucca da novaha nastupu ŭ lutym.
Pa słovach amierykanskich čynoŭnikaŭ, z-za prablem z abstalavańniem i prytokam niadaŭna pryzvanych sałdat, jakich treba budzie vučyć, Rasija, chutčej za ŭsio, spadziajecca vykarystać zimovuju paŭzu dla adnaŭleńnia.
Razam z tym zapavoleńnie nie aznačaje spynieńnia vajny. Spadar Kal, vysokapastaŭleny čynoŭnik ministerstva abarony, skazaŭ: «Ruskija, zdajecca, majuć namier praciahvać nanosić udary kryłatymi rakietami i iranskimi bieśpiłotnikami pa ŭkrainskaj hramadzianskaj infrastruktury».
Maskva moža praciahvać u tym ža duchu, skazaŭ jon, «tak što vajna budzie praciahvacca, navat kali jaje intensiŭnaść krychu źmienicca».
