«Na pieršy pohlad moža zdacca, što rašeńnie pravilnaje»
Ekanamist ličyć, što, niahledziačy na peŭnuju niezadavolenaść i pratesty z boku IP, u bližejšaj pierśpiektyvie ŭrad nie stanie admianiać pryniataje rašeńnie.
«Pastanova pracuje, choć jaje i praciahvajuć «šlifavać», unosiačy niekatoryja karekciroŭki. Prostamu abyvacielu na pieršy pohlad moža zdacca, što rašeńnie pravilnaje, bo rost cen sapraŭdy spyniŭsia. Abmiežavańni zakranajuć kala 90% spažyvieckich tavaraŭ, tamu ŭ kastryčniku my pryjšli da taho, što zamiest praciahłaha rostu inflacyi atrymali deflacyju», — adznačaje ekanamist.
Adnak niehatyŭnych nastupstvaŭ ad hetaha rašeńnia budzie značna bolš, čym pazityŭnych, pakolki ručnoje kiravańnie ekanomikaj jašče ni da čaho dobraha nie pryvodziła.
Ekśpiert BEROC Anastasija Łuzhina
Ekśpiert adznačaje, što tempy inflacyi ŭ hetym hodzie paskorylisia pa ŭsim śviecie, tamu niama ničoha dziŭnaha ŭ tym, što ceny ŭ Biełarusi taksama raśli. Adnak u nas akramia ahulnasuśvietnych faktaraŭ upłyvali sankcyi i paharšeńnie imidžu krainy.
«U šerahu krain uzrovień inflacyi blizki da našych pakazčykaŭ, ale, niahledziačy na heta, tam nikomu nie pryjšło ŭ hałavu zmahacca z hetym ručnymi mietadami, zrezaŭšy handlovyja nadbaŭki i patrabujučy ŭzhadniać pavyšeńnie cen ź dziaržaŭnymi orhanami.
U časy SSSR u nas užo byŭ dośvied pa dziaržaŭnym rehulavańni cen. Nastupstvy hetych dziejańniaŭ usim dobra viadomyja, jak i słova «deficyt», jaki dziesiacihodździami supravadžaŭ žyćcio savieckich hramadzian. I choć historyja pakazvaje, što ručnyja mietady kiravańnia ekanomikaj nie tolki nieefiektyŭnyja, ale i škodnyja, Biełaruś vyrašyła pajści mienavita hetym šlacham», — kaža Łuzhina.
Havoračy ab niehatyŭnych nastupstvach ručnoha kiravańnia ekanomikaj, ekśpiert zhadvaje devalvacyju.
«My dobra pamiatajem 2009, 2011, 2014 hady, kali Nacbank źviartaŭsia da paskoranaj devalvacyi. Pikavym byŭ 2011 hod, kali na praciahu niekalkich miesiacaŭ u krainie naziraŭsia deficyt valuty i dvaistaść kursaŭ. U vyniku rubiel devalvavali biez małoha ŭ try razy.
Usio heta było vynikam taho, što kurs da hetaha ŭtrymlivaŭsia štučnym šlacham. Z 2015 hoda Nacbank admoviŭsia ad takoj praktyki, i padobnyja situacyi bolš nie paŭtaralisia».
Nastupstvy, da jakich pryviadzie 713-ja pastanova, ekśpiert padzialaje na dva typy: dla biznesu i dla spažyŭca. Pieršym usie «pieravahi» novych praviłaŭ hulni na sabie adčuŭ mienavita biznes.
«Dla častki biznesu dadzienaja pastanova moža stać prysudam i pryvieści da jaho likvidacyi. Asabliva heta tyčycca małoha biznesu, jaki nie zmoža zastavacca prybytkovym z pryčyny abmiežavańnia handlovych nadbavak», — ličyć ekśpiert.
«Biznesu budzie praściej i vyhadniej ničoha nie rabić, čym pracavać sa stratami»
Nacenka na asobnyja tavary ciapier abmiežavana 15-20 adsotkami.
«Pry takoj nizkaj maržynalnaści imparcior moža sutyknucca z tym, što vydatki na ŭtrymańnie biznesu i abaviazkovyja adličeńni buduć pieravyšać vyručku. Atrymajecca, što biznesu budzie praściej i vyhadniej ničoha nie rabić, čym pracavać sa stratami».
Ekanamist nie vyklučaje, što, mahčyma, stvarajučy niavyhadnyja ŭmovy dla impartu peŭnych tavaraŭ, dziaržava choča padtrymać ajčynnaha vytvorcu. Ale tady heta niepaźbiežna pryviadzie da značnaha skaračeńnia asartymientu tavaraŭ.
«Kali razhladać tych ža IP, to my ŭbačym, što za apošnija dva hady dziaržava pastupova pavyšaje dla ich padatkovuju nahruzku, urazaje lhoty pa adličeńniach u FSAN. Usio heta pavialičvaje ich raschodnuju častku. Ciapier ža da pavieličeńnia vydatkaŭ dadasca skaračeńnie dachodaŭ. Mnohija mohuć nie vytrymać hetaha i buduć vymušanyja likvidavać svaju dziejnaść», — upeŭnienaja Łuzhina.
Abmiežavanaść u vybary spažyŭcy adčujuć paźniej, paśla taho jak buduć realizavany składskija zapasy. Ale heta nie budzie deficyt uzroŭniu SSSR.
Akramia taho, pakupnikam pryjdziecca zabycca pra akcyi i źnižki, a taksama rychtavacca da paharšeńnia ŭzroŭniu servisu.
«Prykładam źnižeńnia ŭzroŭniu servisu možna nazvać situacyju z dastaŭkaj tavaraŭ. Pradaŭcy vymušanyja rabić jaje płatnaj, pavyšać sumu zamovy dla dastaŭki albo zusim admaŭlacca ad takich pasłuh. Usio heta my ŭžo majem».
Mohuć paciarpieć i rabotniki.
«Pamianšeńnie handlovych nadbavak pryviadzie da skaračeńnia prybytku arhanizacyj, što ŭ svaju čarhu moža niehatyŭna adbicca na zarabotnaj płacie supracoŭnikaŭ. Kiraŭnictva budzie vymušana skaračać vydatki ŭ tym liku na piersanał, pakolki z-za źnižeńnia prybytku ŭ ich moža nie zastacca mahčymaści vypłačvać zarpłaty na raniejšym uzroŭni. Biznesu daviadziecca aptymizavać vydatki, što taksama moža pryvieści da skaračeńniaŭ», — adznačaje ekanamist.
Ź mienš vidavočnych prablem, jakija moža vyklikać rašeńnie ručnymi mietadami abmiažoŭvać rost cen, ekśpiert nazyvaje stvareńnie spryjalnych umoŭ dla raźvićcia karupcyi.
«Pastanova całkam nie zabaraniaje padymać ceny, ale pavyšeńnie nieabchodna abhruntavać i atrymać na jaho adabreńnie z boku dziaržavy. I tut uźnikaje pavyšanaja ryzyka vykarystańnia karupcyjnych schiem, pakolki rašeńnie buduć prymać supracoŭniki dziaržaŭnych orhanaŭ, a nie sam biznes, zychodziačy z kanjunktury rynku».
Aproč hetaha vyrastajuć ryzyki taho, što ŭ pošuku varyjantaŭ zastacca na płavu biznes budzie namahacca abychodzić dadzienyja abmiežavańni z dapamohaj roznych šerych schiem.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Čynoŭnik patłumačyŭ, čamu ŭ kramach słaby asartymient
Jašče 20+ kampanij vyjšli z PVT i likvidujuć biznes
