Fota: AP Photo/Sergei Stepanov
«Užo na terytoryi Ukrainy bajcy z frantoŭ dakładvajuć, što tam praktyčna niama ŭkrainskaj movy. Tam jość polskaja mova, anhlijskaja, a ŭkrainskaj amal nie čuvać. De-fakta vajna idzie z vojskami NATA.
Zadaču demilitaryzacyi Ukrainy rasijskaje vojska ŭžo vykanała. Va Ukrainie nie zastałosia pieršapačatkovaha ŭzbrajeńnia, jano ŭsio źniščana. I zaraz Ukraina vajuje nataŭskim uzbrajeńniem, jaho vielmi šmat», — skazaŭ u intervju BiełTA rasijski vajenny ahladalnik Kanstancin Siŭkoŭ.
Rasijskija prapahandysty i raniej pierabolšvali stupień udziełu ŭ vajnie zamiežnych dobraachvotnikaŭ na baku ŭkraincaŭ, ale ciapier jany pajšli jašče dalej, abviaściŭšy, što Ukrainu jany ŭžo pieramahli, a ciapier vajujuć z nataŭcami. Asabliva ŭzmacniŭsia hety naratyŭ u rasijan apošni tydzień.
Haŭlajtary z akupavanych terytoryj uvieś čas raskazvajuć fantastyčnyja historyi pra toje, jak rasijskaja armija hieraična zmahajecca z połčyščami palakaŭ, rumynaŭ, «niehraŭ» i inšych zamiežnikaŭ.
U pryvatnaści, RIA Novosti raskazvaje dušaščypalnuju historyju pra toje, jak «polskija najmity» nibyta kidali hranaty ŭ mirnych žycharoŭ u Charkaŭskaj vobłaści.
«Pačali kryčać: «Kurva, idzi siudy». Ja zrazumieŭ, što heta palaki. Ja adčuŭ vybuch ad hranaty… I ŭ vyniku ja — na matacykł i pačaŭ uciakać, i pa mnie pačali stralać z aŭtamataŭ», — cytuje RIA Novosti słovy ananima, «miascovaha žychara».
Časam prapahandysckija miedyja pierakručvajuć słovy ŭkrainskich palitykaŭ i čynoŭnikaŭ, kab vyhadna pradstavić, što Rasija, nibyta, vajuje z NATA.
«Va Ukrainie pryznali, što armii Rasii ŭ śpiecapieracyi supraćstajać Uzbrojenyja siły NATA», — paviedamlajuć rasijskija i łukašenkaŭskija ŚMI.
A jakim čynam «pryznali»? Prapahandysty spasyłajucca na ŭkrainskuju vice-premjerku Volhu Stefanišynu, maŭlaŭ, jana i pryznała.
Stefanišyna raskazała, što vajna daje Rasii «dośvied baraćby faktyčna z armijaj NATA, jakaja ŭžo była navučanaja ŭ adpaviednaści sa standartami NATA, kamandnymi łancužkami NATA, asnaščanaja najnoŭšaj technikaj NATA».
Ale kali my pahladzim na cytatu ŭkrainskaj čynoŭnicy, stanovicca zrazumiełym, što jana ŭsiaho tolki śćviardžała, što ŭkrainskaja armija ciapier vielmi mocnaja, i mała čym sastupaje nataŭskim armijam. Jana nie kazała, što rasijanam «supraćstajać Uzbrojenyja Siły NATA», jana kazała, što na sile i patencyjale ŭkrainskaja armija supastaŭnaja z nataŭskimi.
Meta padobnaj łuchty prostaja: apraŭdać pierad prostymi rasijanami adsutnaść pośpiechu na vajnie suprać «słaboj» i karumpavanaj Ukrainy, jakuju rasijskaja prapahanda ŭsie apošnija 8 hadoŭ malavała jak failed state.
