Usio čaściej žonki zarablajuć bolš za svaich mužčyn. Jak znajści bałans u takoj situacyi? 3

Fota: Pixabay

U toj čas jak siońniašnija žonki ŭsio čaściej pačynajuć zarablać bolš za svaich mužoŭ, mnohija pary adčuvajuć tak zvany «stres ad pieramieny rolaŭ». Hety stres moža być škodnym dla ich emacyjnaha i seksualnaha žyćcia. Pra daśledavańni raskazvaje The Wall Street Journal:

• Kali muž zaniaty na pracy poŭny pracoŭny dzień, para maje 2,5% šancaŭ rasstacca ŭžo ŭ nastupnym hodzie; kali heta nie tak, to vierahodnaść razvodu ŭzrastaje da 3,3%.
• Mužy, jakija ekanamična zaležać ad svaich žonak, bolš schilnyja da niaviernaści.
• Častata seksualnych adnosin u šlubie nižej u tych parach, u jakich muž časta vykonvaje tradycyjnyja žanočyja spravy, takija jak hatavańnie ježy, uborka i dohlad dziaciej. I vyšej, kali jon zajmajecca mužčynskimi spravami, takimi, jak praca ŭ dvary, apłata rachunkaŭ i absłuhoŭvańnie aŭtamabila.

Viadoma, situacyja ŭ kožnaj pary indyvidualnaja i zaležyć ad vialikaj kolkaści faktaraŭ. Ale sacyjołahi adznačajuć, što byli ździŭlenyja tym, nakolki mocnaja suviaź była pamiž tradycyjnym padziełam chatniaj pracy i častatoj seksualnych adnosin.

Ramantyčnaja prychilnaść i seksualnaje žadańnie ŭkaranilisia nie tolki ŭ kultury, ale taksama ŭ bijałohii i evalucyi. Śćviardžajecca, što pamiž aksitacynam i testasteronam isnuje zvarotnaja zaležnaść. I heta moža aznačać, što čym bolš mužčyna kłapocicca pra svaich dziaciej, tym nižej u jaho ŭzrovień testasteronu.

Jak hramadstva pavinna razumieć i vyrašać stres, źviazany sa źmienaj rolaŭ? Niemahčyma i nie pažadana viartacca da śvietu, u jakim žančyny nie majuć vybaru, a mužčyny nie pavažajuć dasiahnieńni i ambicyi žančyn. Dla dasiahnieńnia najlepšych vynikaŭ treba adkryta abmierkavać pieravahi i ryzyki źmianšeńnia maskulinnaści mužčyn pry adnačasovym pašyreńni pravoŭ i mahčymaściaŭ žančyn i znajści harmaničny bałans.

Samyja paśpiachovyja pary, vierahodna, tyja, u jakich muž i žonka nie bajacca adnačasova pryniać i adroźnieńni, i roŭnaść połaŭ. Vielmi važna, kab pary pavažali ŭnikalnyja zdolnaści adzin adnaho i źviartali ŭvahu na bałans sił u šlubie.

A najlepšyja šluby — heta tyja, u jakich pary ščyra vykazvajuć svaje pačućci, a nie schilnyja rabić zdahadki i daviedvacca, što pamylajucca, kali stanovicca zanadta pozna.

Heta maralnaja pieramoha, što žančyny ciapier majuć mahčymaść być karmicielkami, ale hety kulturny prahres moža supravadžacca psichałahičnymi razładami, jakija varta vyvučać i razumieć jak na karyść mužčyn z žančynami, tak i na karyść dziaciej.

8

3

2

2

0

1

Nashaniva.com