Nahadajem, Złučanyja Štaty ličać, što prymianieńnie rasijskimi siłami bieśpiłotnikaŭ, atrymanych ad Irana, pakazała ich «šmatlikija niaŭdačy» na pole boju. Pra heta na bryfinhu ŭ piatnicu skazała namieśnica namieśnika ministra abarony ZŠA pa palityčnych pytańniach Saša Bejkier. Jana dadała, što iranskija drony nie dajuć Rasii technałahičnaj pieravahi ŭ poŭnamaštabnaj vajnie.
Amierykanski instytut vyvučeńnia vajny (ISW) piša, što vykarystańnie Rasijaj iranskich dronaŭ nie daje joj efiektu, paraŭnalnaha z tym, što akazali na chod vajny rakietnyja ŭstanoŭki HIMARS, jakija źjavilisia va ŭkrainskaj armii.
Rehularna i ŭkraincy paviedamlajuć, jak źbivajuć bolšuju častku iranskich dronaŭ. Ale ŭ čym ža ich niebiaśpieka?
Pieršaja prablema, što jany vielmi tannyja, kaštujuć usiaho dziasiatki tysiač dalaraŭ.
«Iranskija bieśpiłotniki nie takija ŭžo i darahija, uličvajučy, što jany ŭtrymlivajuć kamiercyjnyja kampanienty. Ukrainskaja adznaka Shahed-136 prykładna ŭ $20 000 hučyć pravilna. Jany mohuć być efiektyŭnymi, pakolki mohuć być vykarystany i dla udaraŭ pa vajennych celach, a taksama jak psichałahičnaja zbroja, kali atakujuć Adesu i Biełuju Carkvu, jakija znachodziacca daloka ad linii bajavych dziejańniaŭ», — tłumačyć Forbes Ukraina savietnik Centra stratehii, palityki, płanaŭ i prahram CNA, navukovy supracoŭnik Centra novaj amierykanskaj biaśpieki Semiuel Biendett.
Pa słovach analityka, jany mohuć być dastatkova dakładnymi. Ich zapuskajuć u vialikich kolkaściach, kab pieraadoleć ukrainskuju supraćpavietranuju abaronu i prajści jaje — rana ci pozna adzin Shahed-136 moža prakraścisia i trapić u cel. Hetaja nasyčanaść robić tannyja i šmatlikija drony takimi niebiaśpiečnymi.
Iranskija bieśpiłotniki nibyta ŭžo pačali źbirać na terytoryi Rasii z kamplektujučych, jakija dastaŭlajucca transpartnymi samalotami z Tehierana. Sa słoŭ Semiuela Biendetta, Rasija moža sama štodnia źbirać drony-kamikadze.
«Jość śćviardžeńnie, što niekalki rasijskich pradpryjemstvaŭ mohuć vyrablać dziasiatki takich dronaŭ štodnia. Uličvajučy ich nizki košt i adnosnuju nieskładanaść, całkam mahčyma, što Rasija zmoža sabrać abo vyrabić vialikuju kolkaść hetych bieśpiłotnikaŭ», — kaža daradca centra stratehij CNA.
Chacia drony našmat tańniejšyja, čym kryłatyja i balistyčnyja rakiety, ukrainskaj SPA moža być stratna i niavyhadna ich źbivać. Ukraincy traciać na tannyja drony darahija rakiety SPA, jakija taksama treba papaŭniać i pierazaradžvać ustanoŭki, a hety čas mohuć palacieć bolš efiektyŭnyja kryłatyja i balistyčnyja rakiety.
Rasija praciahnie teror nasielnictva ŭ haradach daloka ad linii frontu, vykarystoŭvajučy bolš tannyja i bolš masavyja technałohii, čym rakiety koštam miljony dalaraŭ. Dla rasijan važnaja nie stolki efiektyŭnaść takich udaraŭ, jak sam fakt psichałahičnaha i maralnaha cisku na nasielnictva Ukrainy, a taksama pierahruzka ŭkrainskaj supraćpavietranaj abarony.
Dy i nie varta zabyvać, što častka dronaŭ usio ž dalataje da celi, što robić ich vielmi niebiaśpiečnaj zbrojaj dla teroru nasielnictva.
