Siarod udzielnikaŭ byli samyja adyjoznyja praŭładnyja prapahandysty — Ihar Tur, Andrej Mukavozčyk, Dźmitryj Parton, Andrej Kryvašejeŭ, Kirył Kazakoŭ, Alona Radoŭskaja, Julija Arciuch, načalnica ŭpraŭleńnia ideałahičnaj raboty Minharvykankama Volha Čamadanava. Taksama byli zaprošanyja hałoŭnyja redaktary praŭładnych ŚMI Tochka.by i «Smartpriess» — adpaviedna, Pavieł Tuchto i Viačasłaŭ Ziańkovič.
Mižnarodnych haściej pradstaŭlaŭ, u pryvatnaści, francuzski žurnalist Adryjan Bakie. Heta časty hość rasijskich prapahandysckich šou, jaki śćviardžaŭ, što «na svaje vočy bačyŭ źvierstvy ŭkrainskaj armii», ale nie pradstaŭlaŭ nijakich faktaŭ. U minułym Bakie byŭ vajskoŭcam, jaki napisaŭ rezanansnuju knihu pra ŭłasnaje ranieńnie, jakaja akazałasia vydumkaj, pra heta šmat pisali ŭ francuzskaj presie.
U Minsku Bakie zajaviŭ, što choča raskryć vočy śvietu na toje, što adbyvajecca va Ŭkrainie. Jaho achvotna cytavali biełaruskija dziaržaŭnyja ŚMI.
Arhanizatarami forumu vystupali Ministerstva infarmacyi, Minharvykankam, Biełaruski sajuz žurnalistaŭ, BRSM, fakultet žurnalistyki BDU. Admietna, što siarod arhanizataraŭ adrazu dźvie struktury, źviazanyja ź JUNIESKA (śpiecyjalizavanaja ŭstanova AAN pa pytańniach adukacyi, navuki i kultury). Heta Nacyjanalnaja kamisija pa spravach JUNIESKA i instytut JUNIESKA pa infarmacyjnych technałohijach u adukacyi.
Sami arhanizatary forum nazyvali prosta: «Sieminar JUNIESKA». Emblema mižnarodnaj arhanizacyi źjaviłasia na aficyjnym łoha mierapryjemstva.
Nacyjanalnaja kamisija pa spravach JUNIESKA dziejničaje ŭ Biełarusi z 1956 hoda. Na siońniašni momant jaje kiraŭnik — ministr zamiežnych spraŭ Uładzimir Makiej. Heta biełaruskaja arhanizacyja.
A voś instytut JUNIESKA pa infarmacyjnych technałohijach u adukacyi — arhanizacyja mižnarodnaja. Pavodle infarmacyi, raźmieščanaj na sajcie, jon byŭ utvorany na hienieralnaj siesii JUNIESKA ŭ 1997 hodzie, instytut źjaŭlajecca strukturnym padraździaleńniem JUNIESKA. Ofis arhanizacyi znachodzicca ŭ Maskvie, a ŭznačalvaje jaho kitajski navukoviec Tao Čžań.
Radyjo Svaboda rabiła zapyt u instytut JUNIESKA pa infarmacyjnych technałohijach u adukacyi, kab daviedacca, čamu hetaja arhanizacyja vyrašyła padtrymać sieminar u Minsku, ale pakul adkazu tak i nie atrymała.
Admietna, što ŭ krasaviku 2022 hoda źlikvidavanaja biełaruskimi ŭładami Biełaruskaja asacyjacyja žurnalistaŭ atrymała ad JUNIESKA premiju Hiljerma Kana za ŭniosak u svabodu presy.
«Uručajučy premiju BAŽ, my padtrymlivajem usich žurnalistaŭ va ŭsim śviecie, jakija krytykujuć, vystupajuć suprać i vykryvajuć aŭtarytarnych palitykaŭ i režymy, pieradajuć praŭdzivuju infarmacyju i prasoŭvajuć svabodu vykazvańnia mierkavańniaŭ», — kazaŭ staršynia mižnarodnaha žury premii Alfred Łeła.
Radyjo Svaboda cikaviłasia ŭ pradstaŭnikoŭ BAŽ, jakaja praciahvaje pracu ŭ emihracyi, ci čuli jany štości pra mierapryjemstva pad ehidaj JUNIESKA i ci nie atrymlivali zaprašeńnia ŭziać udzieł u forumie, ale tam im adkazali, što čujuć pra sieminar upieršyniu.
