Supracoŭnik HUBAZiKa Artur Hajko byŭ ukarenieny ŭ «Čornuju knihu Biełarusi»
U vieraśni 2020 hoda novastvoranaja «Čornaja kniha Biełarusi» źbirała ludziej ŭ kamandu, dla pošuku i pravierki asabistych źviestak siłavikoŭ. Adnym z novych supracoŭnikaŭ staŭ Artur — jaho tvar pry pryjomie ŭ kamandu nichto nie bačyŭ, nie viedali i sapraŭdnaje proźvišča.
Jon staŭ adkazvać za biaśpieku — praviarać fajły, jakija prychodziać, prabivać ludziej pa bazach.
Byłaja redaktarka ČKB Janina Sazanovič kaža, što ŭ jaje ŭźnikli pytańni da novaha supracoŭnika ŭ samym pačatku jaho pracy.
«Asabliva, kali zatrymali pieršych ludziej, jakija byli infarmatarami. Tady padazreńni ŭźnikli ŭ jašče adnaho supracoŭnika, my pačali razmaŭlać pra heta i sprabavali razabracca, jak tak zdaryłasia. Ale nichto z nas nie prymaŭ rašeńnie, kaho brać na pracu i kaho zvalniać, my nie adkazvali za heta. My nie mahli pryniać takoje rašeńnie ŭ dačynieńni da Artura», — kaža jana.
Kiraŭnictvu Janina i jašče niekalki čałaviek raskazvali pra padazreńni ŭ dačynieńni da Artura, ale, pa słovach dziaŭčyny, nijakaj reakcyi ad ich na heta nie było.
«Daniił Bahdanovič [adzin z kaardynataraŭ ČKB na toj momant] tłumačyŭ tady, što jon vieryfikavaŭ Artura pa tym, što toj źliŭ 200 imionaŭ amapaŭcaŭ i vyviez ź Biełarusi niekalki dziaŭčat».
Padazreńni ŭzmacnilisia na pačatku minułaha hoda.
«U pryvatnym čacie aktyvistaŭ u sakaviku 2022-ha, paśla taho, jak usio vyjaviłasia (a viedali my, što Artur supracoŭnik HUBAZ, užo ŭ mai 2021-ha), Daniił pisaŭ, što ŭ Artura ciažarnaja žonka, jon jamu pra heta sam raskazvaŭ. Tady ja ŭ sacsietkach zajšła na staronku Artura Hajko, a tam byŭ fotazdymak ź ciažarnaj žonkaj. I heta było jašče adnym paćvierdžańniem».
Nakolki viadoma, ciapier Bahdanovič u ČKB nie pracuje.
Dziŭna, što paśla vykryćcia ahienta chłopiec praciahvaŭ ź im kamunikavać.
Jak supracoŭnik HUBAZiKa naohuł uznačaliŭ ČKB?
«Na toj momant Daniił stamiŭsia ad pracy i pajšoŭ u adpačynak. Skazaŭ, što Artur budzie zamiest jaho. Voś i ŭsio, — tłumačyć Janina.
— Jak uvohule źjaviŭsia Artur? Pieršapačatkova jon napisaŭ u bot ČKB. Paśla taho, jak Artur byŭ dadadzieny ŭ kamandu, jon viedaŭ, jak z kim treba razmaŭlać, kab čalcy bačyli ŭ im svajho siabra. I pastajanna kazaŭ, jaki Daniła kłasny i jak šmat usiaho robić».
Pa słovach Janiny, ciapier Bahdanovič kaža, što jaho pamyłki tut niama.
«Kali ŭsio ŭskryłasia, Artur napisaŭ Daniiłu, što ŭ jaho maci znachodzicca ŭ zakładnikach i što toj ničoha nie razumieje. Takim čynam jon sprabavaŭ paŭpłyvać na jaho. Nikomu z nas Artur pra heta nie raskazvaŭ, a tolki asabista Daniiłu», — dzielicca jana.
«U cełym u hetaj historyi było šmat ludziej, jość śviedki taho, što adbyvałasia. Ale pakul jany chočuć zastacca ananimnymi».
Sama Janina Sazanovič syšła z ČKB u kancy žniŭnia-pačatku vieraśnia 2021-ha z-za «niezdarovaj situacyi ŭ inicyjatyvie, u tym liku z-za pavodzin Daniiła Bahdanoviča».
«Naša Niva» taksama źviarnułasia da Bahdanoviča, ale jon nie staŭ kamientavać situacyju.
Chłopiec dahetul pracuje ŭ ahienctvie «Infapoint».
«Jon źjaŭlajecca supracoŭnikam, vykonvaje svaje akreślenyja funkcyi, zasvoiŭ uroki, — kaža kiraŭnica «Infapointa» Saša Ramanava. — Kirujuć arhanizacyjaj inšyja ludzi. Unutranyja pracesy nie vydajucca pa zrazumiełych pryčynach.
Zvolnić ź niezarehistravanaj ustanovy — uvohule ciažka ŭjavić, jak heta možna zrabić. Toj «Infapoint», jaki pracuje ciapier, skłaŭsia paźniej. Ale, kaniešnie, Daniił biaśpiekaj nie zajmajecca. Infarmacyja pra toje, što niejki Artur mieŭ dačynieńnie da «Infapointa» nie adpaviadaje rečaisnaści. Jon zajmaŭsia mienavita ČKB.
«Ciapier «Infapointam», jak ahienctvam, tak i nietvorkam, kirujuć zusim inšyja ludzi, jakija pra hetuju historyju tolki zdalok čuli i ni ź jakoj ahienturaj i blizka nie pierasiakalisia.
Sama situacyja soramnaja dla kampanii, i my robim usio, kab jana nie paŭtaryłasia», — adkazała Saša Ramanava.
Čytajcie taksama:
Hubazikaviec dzieviać miesiacaŭ byŭ u kamandzie Čornaj knihi Biełarusi. I ŭrešcie ŭznačaliŭ jaje
Na śpiavačku Meryjem Hierasimienka zaviali kryminałku pa «narodnym» artykule. Jaje pryznali palitźniavolenaj
Eks-dyrektara Barysaŭskaha zavoda ahrehataŭ abvinavačvajuć u chabarnictvie, kradziažy i słužbovaj padrobcy
