Hrupa navukoŭcaŭ z Čechii, Niderłandaŭ, Vialikabrytanii, Niamieččyny, Šviecyi i Aruby vyśvietlili, što «sercy ramantyčnych partnioraŭ, jakija spadabalisia adzin adnamu pry pieršaj sustrečy, pačynajuć bicca ŭ adnym rytmie».
Zhodna ź ich vysnovami, mienavita sinchranizacyju častaty bićcia sercaŭ pryniata ličyć iskraj, jakuju adčuvajuć zakachanyja. Daśledčyki byli ŭdastojenyja premii ŭ katehoryi «Prykładnaja kardyjałohija».
Łaŭreatam Šnobieleŭskaj premii ŭ 10 katehoryjach dastalisia papiarovyja cylindry, jakija simvalizujuć saboj «kantejnier dla zachoŭvańnia ŭsich ich viedaŭ». Akramia taho, pieramožcy atrymali kopii kupiur vartaściu 10 tryljonaŭ zimbabvijskich dalaraŭ. Aryhinały hetych banknot užo vyjšli z abaračeńnia i ŭjaŭlajuć tolki kalekcyjnuju kaštoŭnaść, pry hetym navat u pieryjad zvarotu ich možna było abmianiać tolki na niekalki dalaraŭ ZŠA.
Łaŭreaty ŭ inšych katehoryjach
Daśledniki ź Japonii atrymali Šnobieleŭskuju premiju ŭ katehoryi «Technika» za pracu, nakiravanuju na vyvučeńnie taho, kolki palcaŭ patrabujecca čałavieku, kab paviarnuć kruhłuju klamku ŭ zaležnaści ad jaje dyjamietra.
Premija ŭ katehoryi «Historyja mastactva» dastałasia navukoŭcam ź Niderłandaŭ, jakija znajšli na cahlanym posudzie indziejcaŭ majia śviedčańni taho, što jany vykarystoŭvali klizmy z durmanlivym źmieścivam u rytualnych abradach.
Premii ŭ katehoryi «Litaratura» za pracu pa vyvučeńni taho, što robić takimi składanymi dla razumieńnia jurydyčnyja teksty, udastojenyja daśledčyki z Kanady, ZŠA, Vialikabrytanii i Aŭstralii. U katehoryi «Bijałohija» Šnobieleŭskuju premiju atrymali daśledčyki anatamičnych asablivaściaŭ skarpijonaŭ z Brazilii i Kałumbii.
Premii ŭ katehoryi «Miedycyna» ŭdastoilisia navukoŭcy z Polščy, jakija vyśvietlili, što spažyvańnie marožanaha źnižaje bolevyja adčuvańni pacyjenta pry prachodžańni kursu chimijaterapii.
Navukoŭcy z Kitaja, Vialikabrytanii, Turcyi i ZŠA atrymali premiju za navukovuju pracu, pryśviečanuju tamu, pa jakim pryncypie vystrojvajucca kačaniaty, što iduć za mamaj-kačkaj.
Premiju ŭ halinie ekanomiki atrymali navukoŭcy ź Italii, jakija zacikavilisia pytańniem pra toje, čamu pośpiechu čaściej damahajucca nie samyja talenavityja, a samyja ŭdačlivyja.
Uznaharodu ŭ katehoryi «technika biaśpieki» atrymaŭ šviedski navukoviec, jaki stvaryŭ fihuru łasia dla praviadzieńnia aŭtamabilnych kraš-testaŭ.
Šnobieleŭskuju premiju miru atrymali daśledčyki z Kitaja, Vienhryi, Niderłandaŭ, Vialikabrytanii, Italii, Aŭstralii, Šviejcaryi i ZŠA, jakija raspracavali ałharytm, jaki dapamahaje vyrašyć, u jakich vypadkach lepš schłusić, a ŭ jakich varta skazać praŭdu.
