Fota: sacsietki
Ułada vyrašyła ŭdaryć pa studenckich pratestach prapahandaj. U hetuju baraćbu ŭklučylisia i čalcy Kampartyi Biełarusi, jakija majuć upłyŭ u Ministerstvie adukacyi z časoŭ pryznačeńnia Ihara Karpienki (zajmaŭ pasadu ministra da śniežnia 2021-ha), jaki byŭ raniej pieršym sakratarom kampartyi.
Adkaznym za pijar i adnym z aŭtaraŭ novaha kanała staŭ člen KPB i aktyvist Lihi kamunistyčnaj moładzi Raman Rol. Chto hety čałaviek?
Raman Rol da taho, jak zaniaŭsia palitykaj
25-hadovy chłopiec — minčuk. Dziacinstva jaho, miarkujučy pa ŭsim, było niaprostym. Jahony baćka niekalki razoŭ sudzimy. U pieršy raz atrymaŭ try miesiacy aryštu za kradziež aŭto. Paśla jašče dvojčy mieŭ terminy, 5 i 8 hadoŭ za machlarstva. U apošni raz — z kanfiskacyjaj majomaści. Baćki Rola raźvialisia ŭ 2013 hodzie — prykładna paśla zakančeńnia termina jahonaha baćki.
U niejki momant siamja pierajechała ŭ Kamiennuju Horku. U intervju Raman kazaŭ, što im vydali kvateru jak šmatdzietnaj siamji.
Raman i jahonaja maci. Fota: sacsietki
U 2015 hodzie chłopiec skončyŭ Licej BDU. Paśla pastupiŭ na histfak BDU na historyka-archivaznaŭcu, zajmaŭsia temaj «Publikacyi rasijskich archivaŭ pra paŭstańnie ŭ Bośnii i Hiercahavinie ŭ 1875—1878 hadach».
«Roma davoli cichi. Jon taki čałaviek-miem praz svajo beerseemstva i ŭdzieł u kamunistyčnych arhanizacyjach, — kaža znajomy, jaki vučyŭsia ź im na adnym patoku. —
Raman Rol z ukrainskimi kamunistami. Fota: sacsietki
Jon na našym fakultecie studatrady kuryravaŭ. Tam abiacali za niejkuju pracu, skažam, 60 rubloŭ, a dachodziła dziesiać.
Vyhladaŭ jon zvyčajnym chłopcam. Ničym takim nie vydzialaŭsia ani pa vučobie, ani ŭ asabistych adnosinach».
Kamunistyčnaja partyja Biełarusi i Liha kamunistyčnaj moładzi
Da KPB i Lihi kamunistyčnaj moładzi Rol dałučyŭsia nie paźniej za kaniec 2016 hoda. Jon zaŭvažany na adnym z subotnikaŭ, jaki ładzili čalcy arhanizacyi.
Raman Rol piaty źleva, kastryčnik 2016 hoda. Fota: sacsietki Lihi kamunistyčnaj moładzi.
Arhanizacyja była stvoranaja ŭ vieraśni 2016 hoda jak moładzievaje adździaleńnie KPB. Kuryravaŭ jaje stvareńnie Siarhiej Kliševič, jaki ŭ 2019 hodzie staŭ u avanhardzie hrupoŭki «maładych deputataŭ», jakich raniej anansavaŭ Łukašenka.
Rol kazaŭ, što «hanarycca svaim partbiletam» i što «Biełaruś pryjšła da važnaha hramadstva — sacyjalna-aryjentavanaha».
Pieradvybarčy vystup Ramana. Fota: BT
Rol dvojčy bałatavaŭsia ŭ deputaty ad KPB — spačatku na vybarach miascovych deputataŭ u 2018 hodzie, a paśla Nacyjanalnaha schodu ŭ 2019 hodzie, abodva razy byŭ adnym z samych maładych kandydataŭ. Ale jaho nie prapuścili — miesca zaniali bolš daśviedčannyja namienkłaturščyki.
«Žyvyja» jačejki Lihi kamunistyčnaj moładzi ciapier jość u Minsku i Homieli. Naličvajuć jany sumarna da pary dziasiatkaŭ aktyvistaŭ.
Karjerny rost
Davoli chutka Raman staŭ namieśnikam staršyni Lihi. Cikava, što nie jasna, chto nasamreč uznačalvaje hetuju strukturu navat na papiery. Pa źviestkach Miniusta — Stanisłaŭ Trajmak (jaki byŭ adnym z samych zamožnych kandydataŭ u deputaty ŭ 2018 hodzie), ale dziaržaŭnaja presa staršynioj pastajanna nazyvaje Kliševiča.
Prykładna ŭ hety ž čas Rol prasoŭvajecca pa karjery i ŭ BRSM — u niejki momant jon stanovicca kamisaram haradskoha štaba studatradaŭ, i jaho biaruć pracavać u struktury BRSM. Jahonaja apošniaja viadomaja pasada tam — namieśnik načalnika adździeła daśledča-kanstruktarskich rabot (što b heta ni značyła).
Raman Rol na demanstracyi kala ambasady Litvy ŭvosień 2020 hoda. Fota: SB
A amal adrazu paśla žnivieńskich padziej 2020-ha jaho naznačyli kiraŭnikom pres-słužby BDUIR. Niadaŭna Rol chvaliŭsia, što pad jaho kiraŭnictvam jany zdoleli naładzić supracoŭnictva ź Biełaruskaj pravasłaŭnaj carkvoj:
«Studenty dapamahajuć śviataram u zdymkach filmaŭ, jakija prapahandujuć duchoŭnyja kaštoŭnaści. Tak, film «Siastra» sabraŭ na YouTube 200 tysiač prahladaŭ. Taksama na videachostynhu možna prahladzieć «Karotkija adkazy pra vieru i Carkvu». Śviatary ŭ videazvarotach adkazvajuć na pytańni, jakija chvalujuć studenckuju moładź: «Jak raspačać naviedvać carkvu?», «Jak vyjści z duchoŭnaha kryzisu», «Jak zastavacca vydatnikam i nie zahanarycca?», «Ci možna kadziravacca ad charčovaj zaležnaści?», «Ci pravilna praciahvać navučańnie, kali tabie nie padabajecca?», «Ci možna śpisvać na ekzamienie?» i hetak dalej».
Rol vykładaje i na kafiedry humanitarnych dyscyplinaŭ u BDUIR. Ciapier jon vučyć studentaŭ «Historyi biełaruskaj dziaržaŭnaści» i viadzie zaniatki pa ekanomicy.
Raskład i pasada Ramana ŭ BDUIR. Fota: bsuir.by
Zaličana, Zaličana i «Žoŭtyja źlivy. Adukacyja»
Kanał «Zaličana» prasoŭvaje prałukašenkaŭski paradak dnia dla moładzi. Jon kapiruje rytoryku dziaržśmi. I kali Rasija napała na Ukrainu, to i kanał taksama, pierajmienavaŭšysia ŭ «Zaličana». Paśla błakavańnia «Žoŭtych źlivaŭ» 4 červienia jon pierajmienavaŭsia ŭ «Žoŭtyja źlivy. Adukacyja», vidać, kab pavysić papularnaść.
Historyja imionaŭ kanała.
U pryncypie, kanał mała čym adroźnivajecca ad inšych prałukašenkaŭskich resursaŭ. Ułasnyja materyjały tam — heta rerajty navinaŭ sa ździekam ź biełaruskich simvałaŭ i palitźniavolenych (pryčym z danymi, atrymanymi ad siłavikoŭ), a taksama šmat rasijskaha paradku dnia.
Skrynšoty navinaŭ kanała
Ale pryčym tut Raman Rol? Prapahandysty pracujuć pa adnoj i toj ža mietadyčcy. Kab štučna pavialičyć achopy, adkaznyja za pijar adminy hrup pastajanna skidvajuć dopisy z kanałaŭ u adny i tyja ž čaty. «Zaličana» pijaryŭ karystalnik pad nikam «Roman Suvorov». Jak stała viadoma «Našaj Nivie», heta nik Rola.
Toj samy Roman Suvorov u čatach-ahrehatarach
Da taho ž, u adnym z pastoŭ jon zabyŭsia prybrać svajo aŭtarstva.
Skrynšot publikacyi ad 30 vieraśnia 2020 hoda. Vidać, što aŭtar — Raman Rol
Ën sprabavaŭ «nakidvać» i ŭ studenckija kanały, pryznanyja ekstremisckimi. U svaich paviedamleńniach jon zaklikaŭ da niezakonnych, pa mierkach biełaruskaj ułady, dziejańniaŭ i hłumiŭsia z refierendumu pa źmienach u Kanstytucyju.
Dopisy Ramana ŭ čat stačkama BDUIR u lutym 2021 hoda
Vyjavić suviaź kanałaŭ Lihi kamunistyčnaj moładzi, Kampartyi i «Žoŭtyja źlivy. Adukacyja» vielmi prosta — jany karystalisia adnymi i tymi ž botami dla zvarotnaj suviazi.
Boty zvarotnaj suviazi kanałaŭ. Tyja, što supadajuć, paparna padkreślenyja.
U niejki momant Ministerstva adukacyi zapuściła čat-bot zvarotnaj suviazi. I, niečakana, akazałasia, što jaho ž niejki čas vykarystoŭvali kanały «Zaličana» i «Kampartyja Biełarusi».
Boty kanałaŭ «Zaličana», «Kampartyja Biełarusi» i «Ministerstva adukacyi Biełarusi». Tyja, što supadajuć, padkreślenyja
Pry hetym cikava, što hetaja sietka kanałaŭ nie źviazanaja z aryhinalnymi «Žoŭtymi źlivami». Paśla pierajmienavańnia administracyja «Žoŭtych źlivaŭ» abvinavaciła kamandu «Zaličana» ŭ tym, što jany «prasoŭvajuć zmaharskija naratyvy».
Paviedamleńnie paśla było vydalenaje, ale zachavałasia ŭ kešy.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
