Telehram-kanał «Kod 375» apublikavaŭ prajekt zakona «Ab amnistyi». Heta tolki prajekt, jon moža mianiacca. U prajekcie prapanujecca vyzvalić usich asudžanych ci abvinavačanych pa artykułach 293 i 342 («masavyja biesparadki» i «arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich»).
Heta samyja masavyja artykuły, pa jakich pravodzilisia represii 2020-2022 hadoŭ.
Ale tekst prajekta zakona ab amnistyi sfarmulavany tak, što jon daje mahčymaść vyzvalać ci nie vyzvalać ludziej advolna. «Rašeńnie ab prymianieńni abo nieprymianieńni hetaha Zakona prymajecca ŭ dačynieńni da kožnaj asoby indyvidualna», — havorycca ŭ prajekcie.
Heta daje šyrokija paŭnamoctvy ŭ interpretacyi zakona načalnikam kałonij, śledčym i prakuroram, a na spravie — robić luboje rašeńnie ab vyzvaleńni palityčnym. «Prymianieńnie hetaha zakona ažyćciaŭlajecca pa pastanovie načalnika papraŭčaj ustanovy, śledčaha izalatara, papraŭčaj ustanovy adkrytaha typu, orhana ŭnutranych spraŭ, orhana daznańnia, zaćvierdžanaha prakuroram, albo pa pastanovie śledčaha ci prakurora».
Prapisana taksama, što pad amnistyju nie mohuć trapić tyja, chto raniej byŭ sudzimy i atrymaŭ termin u kałonii, tyja, chto trapiŭ pad amnistyju ŭ 2015—2020 hadach.
Asobna pieraličana, chto adnosicca da złosnych parušalnikaŭ.
Treba adznačyć, što na palitviaźniaŭ biez razboru nakładvajuć masu spahnańniaŭ, praz što jany farmalna nie padpadajuć pad amnistyju ŭ farmuloŭkach hetaha prajekta.
Masavyja artykuły 130 (raspalvańnie varožaści), 368 (abraza prezidenta), 369 (abraza pradstaŭnika ŭłady) i 361 (zakliki da sankcyj) u prajekcie nie zhadvajucca, jak i prosta «mienš ciažkija» złačynstvy, asudžanych pa jakich zvyčajna pa amnistyjach vyzvalajuć.
